1 Baana baa ngu a me, a lisaha uba milongisi mi milahi mya mambu ma Nzambi ve. Benu liyaabi ti bisu baa libaalongese, sa liyaka tsundusu yi yalutala mifudi. 2 Bisu boosi libaadunga hu unzuhisini. Tso muutu velidunga mu biyambilili, nde li muutu wu akuha, wu ubaatwala ukuta linyutu la nde loosi. 3 Bisu a benu libaasusa mukudu wu itali mu minywa mi baburu, mana bo basiingala bisu a benu. Bu libaasusa mukudu wu itali mu minywa mi baburu, bisu a benu libaasuungaha nyutu a bo yoosi mu nzila. 4 Monwaani makuumbi ma nzali, mo mali mamanene. Bifula bi mifudi bibaatsindahala mo. Ka baya lilikeehe libaasuungaha mo mu nzila, na mo mabaayene hu mubiti likuumbi atondi. 5 Ni bumosi kaka mu limi la muutu. Lo lili mwa itini hya hoole hi linyutu, ka lo libaaduna bu lo lili tooni mavaanga ma malahi. Tsimaani mwaana a totobo a mbaahu yi yibaatsuha piinda yinene «vyaa»! 6 Limi la muutu kaka lili mbaahu. Lo lili, ŋa hati li binama bya nyutu, tsi yitindala ya ma mabi. Limi na mbuha mu linyutu la bisu. Lo libaasumana nyutu a bisu yoosi. Limi libaanyengese idiingu hya bisu hyoosi, bu lo laamiitehele unyenge hu mbeenge a mbaahu.

7 Muutu li na matwala ma uba na lituma ŋa yulu bibulu bya pila mu pila: bibulu bya mu piinda, banyunyi, bibulu bi bibaayene mu bali, bibulu bi bili mutso mibu. Byo byosi byaka hutso lituma la muutu. 8 Ka limi, muutu kini a hatwali ukuuta love. Mu tooni ati, lo lili iloho hi ibi, hi muutu huveletwala ukeelese, bu lo lili vilu-vilu. Lo laaluula mu myangala mi lipfu. 9 Bisu libaasalila limi mu uyusa Pfumu, Taata a bisu. Na bisu libaasalila lo kaka, mu usinga baatu ba Nzambi havanga mu ifwaani hya nde. 10 Mu munywa mo mumosi hubaapala mambu ma lisyeme na mambu tsingiili. Baana baa ngu a me, a hwafwana ubaaba buuna ve. 11 Mutswe a nzali mumosi, utwala upalisa mamba ma matendoho na mamba ma mvwinzini ve. 12 Baana baa ngu a me, muti a fiinge utwala ubuta mbutu a olive ve. Buuve muti a vinye mbutu a fiinge ve. Mutswe a nzali wa mamba ma mvwinzini, utwala upalisa mamba ma matendoho ve.

13 Tso ŋa hati la benu na muutu nga dyeele na buyedi, nde amweese bwo mu ndyatili a nde yimbwe. Nde amweese bwo kaka, mu mavaanga ma kulimini na mu bulembo bwa nde. 14 Ka tso benu laaluula mu nyengi na mu livupu li mitsotso, nyahaani umweese muyusu ti benu ni banga a dyeele. A libiyasa imbuli mu upfuta hwa benu ve. 15 Dyeele mo liina, a lili li libaamata hu yulu ve. Ka lo lili la ŋa toto ŋa, lo lili li imuutu na li mavupu ma mabi. 16 Mu tooni ati, muutu wu aluula mu nyengi na mu livupu li mitsotso, ŋa muvanga a nde, hyayuhu sa himonehele na ndyatili yimbi.

17 Ka muutu nga a dyeele li libaamata hu yulu, ateehele na mutima wu atsyeme. Titswene, nde atondo isuusi, kulimini na nzuhili. Muutu mo wuuna na kwili lingebe, na upalisa mbutu yimbwe. Nde a hubaasa buraandu ve, na nde a hali kaka na muwala ve. 18 Boosi ba bubaatondo hyenze ŋa hati la bo, bubaapalisa mbutu a hyenze na bubaakukaha mavaanga ma mabwe.