1 Ni bumosi kaka, benu bakaasu, baani na lisiingala ŋa busu bu balumi baa benu. Tso lisiidi buuna, uba ti na babahala ŋa hati la bo ba bali mu uvelesa imiinu mu Mambu ma Nzambi, babaha imiinu mu mbiili bakadi ba bo. 2 Bo bu ubaha imiinu, bu bo bali mu umono mbiili a benu ya ngidi yi likiinzu. 3 A lisaha uba yoli-yoli mu nyutu mu pandili a naanga a benu, mu bilabu bya wolo, buuve mu bikutu bi byafulala bubwe ve. 4 Ka yoli-yoli a nyutu a benu, yafwana uba ya hutso mutima. Ni yoli-yoli yi yuvelebiya, yi livupu li bulembo na la hyenze. Ni liina lili la talu ŋa busu bwa Nzambi. 5 Ni buuna hutsomi, bakaasu bangidi ba baakasa hiitu mu Nzambi, baakamweese yoli-yoli a bo. Bo baakasiingala balumi ba bo. 6 We ifwaani hya Sara wu akasiingala Abrahami, akateele nde «pfumu a me✝». Bunuubu, benu laaka baana ba nde, tso benu lili mu uvanga mambu ma mabwe, hwavele a boomo.

7 Benu balumi kaka, bu benu lili mu utsahala na bakadi baa benu, yaabaani ti bo a bali na mifudi ve. Ka baakiinzaani bo, mu tooni ati, itwadi na benu, bo bu ubaha bungodu bwa moonyi wu umata huli Nzambi. Benu lisa buuna, dyaambu tso limosi a lu usa ikahu mu masambulu ma benu ve.

8 Ni mu buuna, baani benu boosi matsimi mamosi. Baani na kwili lingebe mu bana, na bulembo, na litondo li mutima na kulimini. 9 A lifutala lilibi mu lilibi ve, tso ituhi mu ituhi ve. Ka futalaani bunuubu: «Nyaha Nzambi asyeme benu!» Mu tooni ati, ni muliina Nzambi hateele benu, mana benu liyaka lisyeme. 10 Mabasonehe ni maniima:

«Muutu wu utondi uba na idiingu hi ibwe,

na umono bilumbu bya kinya,

nde afwana ubaavelekusa na ubaavelepfuta.

11 Nde afwana ubaatahuha na bubi,

nde afwana ubaavanga ma mabwe,

na nde afwana ubaasaha hyenze taangu yoosi.

12 Mu tooni ati, miisu ma Pfumu mali taangu yoosi ŋa yulu a baatu babaasungama,

na matswi ma nde mali bwasi mu ubaayuha masambulu ma bo,

ka Pfumu ubaabisa baa bubaavaanga lilibi✝.»

13 Na utwala uvangila benu libi, tso benu laahwada mu ubaavanga libwe? 14 Tso benu lili mu umono pasi mu tooni a ma mabwe ma benu lili mu uvanga, baani mu kinya! Mu tooni ati, baasonehe: «A liba na boomo bwa baatu ba bu utwala uvangila benu libi ve, na a liheleene mitima ve✝.» 15 Ka baayusaani Kristo mu mitima mya benu we Pfumu a benu wa Ngidi. Baavangamaani mu ubaakala linyutu la benu, ŋa busu bwa ba bali mu ufuula benu tooni a hiitu hya benu. 16 Baasaani buuna na bulembo na likiinzu. Babaani na matsimi ma maatsyeme, mana ba bali mu ukusa benu mu ndyatili a benu yimbwe ya baa Mukristo, bakwa tsonyi mu makusa ma bo. 17 Tso liina ni litondo la Nzambi, hwafulala bubwe mu umono pasi mu uvanga lilibwe, ka a mu uvanga ma mabi ve.

18 Ka Kristo nde mwakulu amoni pasi ya nzyeni, mu tooni masumu ma baatu. Nde wa tsiitsa, mu babaaveletsiitsa, mu ubita benu huli Nzambi. Baadubi nde mu linyutu, ka Nzambi asuuli nde mu Livupu. 19 Mu matwala ma Livupu mo liina, nde ayalongese te mavupu ma maaba hutso a kondaayi*. 20 Ni mavupu ma maabisi usiingala nde mu taangu a tsikulu, ŋa Nzambi hakakeele na mukami, bilumbu bi Nowa hatungi likuumbi la nzali. Mwana a baatu pwombo baakoti hutso likuumbi mo liina na baafuuhi mu mamba. 21 Mamba mo maana aba ni ifwaani hya tondihili yi yili mu ufuuhasa benu taangu yi. Tondihili mo, a yili mu uswaha mbiindu a nyutu a benu ve. Ka ni mu usobo mbiili ŋa busu bwa Nzambi, mu matsimi ma maatsyeme. Tondihili yili mu ufuuhasa benu, mu tooni ati Yisu Kristo asuuhi mu babaakwa. 22 Nde wu ayeni hu yulu, na wu li ŋa mbahala a Nzambi, hu nde ali mu utuma bapofi, na bipfumu bikima, na matwala ma hu yulu.