1 Ni mu buuna, siisaani mambu moosi mamabi. Nyahaani mapfuta, muwala, nyengi, na makusa mu bana. 2 Benu lili we baana ba bamiibuta. Sahaani mambu ma Nzambi ma mbuli, we bu mwaana ubaasaha unywa mabeelo ma ngu a nde. Mana mu mo, benu likula na liyaka liyobolo. 3 Mu tooni ati, baasonehe: «Benu laamoni buni Pfumu ali wu mubwe✝.»

4 Yasusahani huli Pfumu Yisu, nde wu li manya la moonyi, li baatu baabumi, ka Nzambi amiisoolo lo la talu. 5 Na benu mwakulu, we mamanya ma moonyi, kuukamaani mu utuunga nzo Livupu. Kuukamaani mu uvanga kabu li bangaanga ba Nzambi banga lehemene, baa bu uba na isalu hi ubaayeholo bungodu bu Livupu. Bungodu mo buuna, Nzambi usiinga bwo, mu tooni a Yisu Kristo. 6 Eye, mu Libuuku la Ngidi baasonehe:

«Me utsusa mu musyenge a Syoni,

manya li itungu.

Me amiitsoolo lo la talu yindahi.

Pasi muutu wu usa hiitu hya nde mu lo,

a hutwala umono tsonyi ve✝.»

7 Manya mo, libaava butsitu huli benu baa lili mu usa imiinu mu lo. Ka huli ba bali mu uvelesa imiinu:

«Manya li batungi baatiimbi,

laamikituha manya la ngu ŋa itungu hya nzo✝.»

8 Baabwesonehe bunuubu:

«Lo lili manya li libaakubasa baatu baku.

Lo lili manya li libaabwisa baatu✝.»

Tso baatu bubaakuba baku mu lo, mu tooni ati, bo bubaabisa usa imiinu mu mambu ma Nzambi. Maana ni ma mu uyiila bo.

9 Ka benu, benu lili ibaandu hibaasoolo, buli li bangaanga ba Nzambi baa Pfumu, buli li laatsyeme. Tso Nzambi hamiibaha benu, ni mu tooni ati, benu liyabisa mavaanga ma maasyenoho. Nzambi hapalisi benu mu piipidi, natee mu ukotese benu hutso liyalala la nde la kimuhili. 10 Tsomi, benu a laabeedi ibaandu ve. Ka bunuubu, benu lika ibaandu hya Nzambi. Benu baa laaveliyaka kwili lingebe, ka bunuubu Nzambi miikwila benu lingebe.

11 Bambaahi ba me baa litondo, benu lili bapyohi-nzila na byenyi ŋa toto mo yiniiyi. Ni mu buuna, me ndi mu upondo benu dyaambu limosi: siisaani mapeyu ma musunya. Mapeyu mo maana mu baalwanisa idiingu hya benu. 12 Baani na mbiili yimbwe ŋa hati li bangoyi. Tso bo bakesi benu ti benu bavangi baa ma mabi, bo sa bamono mbiili a benu yimbwe. Na bo sa bayusa Nzambi ilumbu hi nde hu uyamonehele.

13 Mu tooni a Pfumu, baakiinzaani batumi boosi: huli mutumi a tsi wu li na lituma ŋa yulu a baatu boosi, 14 na huli biduuka bya nde. Bo bali na isalu hi usyembe bavangi baa ma mabi, na ubaasilasa bavangi baa ma mabwe. 15 Nzambi tondi ti benu livaanga ma mabwe. Benu livaanga buuna, benu lu udibuha minywa mi bitsuudu bi byaveleyaba ma bo bu ubaasa. 16 Baadyataani we baatu ba bamiipala mu buviha. Ka bu benu laamiipala mu buviha, a litsima ti benu utwala uswehe mavaanga ma benu ma mabi ve. Ka baani baviha baa Nzambi. 17 Baakiinzaani baatu boosi, baatondwaani baana ba ngu baa benu baa imiinu, baabaani na boomo bwa Nzambi, baakiinzaani mutumi a tsi.

18 Benu basalili, baani na lisiingala na butsitu bwosi ŋa busu bu bapfumu ba benu. A lisiingala ndulu bapfumu ba bali ba babwe na bulembo ve, ka baasiingalaani napa ba bali na mutima wu munono. 19 Ka huli bubwe tso muutu li mu ukunda mapasi ma bali mu usiila nde hwavele a dyaambu, bu nde ali mu usiingala Nzambi.

20 Ki musyendo li, mu ukunda bikooti bi bali mu utete we, humbisa a hu we miisa dyaambu lilibi? Tso we li mu ukunda byo mu tooni a mambu ma mabwe ma we miivanga, huli bubwe ŋa busu bwa Nzambi. 21 Ni muliina Nzambi hateele benu, mu tooni ati, Kristo nde mwakulu amoni pasi mu benu. Nde asiisala benu ifwaani mana benu liduukala bondo la nde. 22 Mu Libuuku la Ngidi baasonehe: «Nde a hasiidi lisumu ve; dyaambu tso limosi li upfuta a laapali mu munywa a nde ve✝.» 23 Ŋa baatuhi nde, nde a hafutili bituhi ve; ŋa baamweesi nde pasi, nde a hasahi ulwaana ve. Ka nde asuusi myosi ŋa myoho mya Nzambi wu ubaatsundasa baatu na butsiitsa. 24 «Nde abiti nde mwakulu masumu ma bisu», mu nyutu a nde ŋa muti. Nde hasiidi buuna, mana bisu liba we baatu babaakwa ŋa busu bu masumu, na ubaha moonyi mu ukuhasa butsiitsa. Eeye, basonehe ti: «Ni mu tooni a mbuma a nde benu laabeloho✝.» 25 Mu tooni ati, benu laabeedi we «mameme ma maadimbala✝». Ka bunuubu, benu limiifutaha huli Mubungili a benu, na Keedi mivumu mya benu.