1 Hutsomi, benu laabeedi we ba baamiikwa mu tooni a ma mabi ma benu, na mu masumu ma benu. 2 Benu laabeedi na mbiili a baatu ba tsi mo yiniiyi. Benu laakasiingala mutumi a matwala ma mabi, ma maaba ŋa hati la yulu na toto. Ni livupu li lili mu usalila mu ba bubaatuna Nzambi lolo yiniiyi. 3 Hutsomi, bisu kaka laabeedi boosi mu kabu la baatu mo baana, ŋa bisu laakadyata we bu hu li manzala na matsimi ma bisu ma mabi. Mu tooni imuutu hya bisu, bisu baatu laahwama na kesi a Nzambi we baatu bakima boosi.

4 Ka Nzambi aluula mu kwili lingebe! Bunene bu litondo la nde mu bisu ni ti, 5 bu bisu laabeedi babaakwa mu tooni a ma mabi ma bisu, Nzambi abweva bisu moonyi mu Kristo. Ni mu hyese hya Nzambi benu laayobihi. 6 Mu itwadi hya bisu na Yisu Kristo, Nzambi asuuli bisu mu babaakwa, na atsahisi bisu itwadi na nde hu mbuha ya hu mayulu. 7 Mu bubwe bu nde haamweesi bisu mu Yisu Kristo, nde atondi umweese mu tsi yi yiuya, busina bwa kimuhili bwa hyese hya nde. 8 Ni mu hyese hya Nzambi benu laayobihi mu tooni imiinu hya benu. Liyobolo mo liina a lili mu umata huli benu ve, lo ni bungodu bwa Nzambi. 9 Liyobolo mo liina, a lili kaluha a mavaanga ma benu ve. Na buuna, muutu utwala ubula mabyoho ve. 10 Mu mbuli, bisu mavaanga ma Nzambi. Nde avaangi bisu mu itwadi na Yisu Kristo, mu ukuhasa mavaanga ma mabwe, ma Nzambi haaba haamiitswamina uvangimasa, mana bisu lisalila mo.

11 Yibuhalaani moonyi baana benu laaba hutsomi! Benu a lili Bayudaayo mu ubuta ve. Ni mu buuna, Bayudaayo bali mu uleele benu ti benu ba «baavelekete». Ka uto ti bo, bali mu uteele bo ba «baakete» mu tooni iliimbu hya ketili hi baasa mu nyutu a bo. 12 Eye, mu taangu mo yiina, benu laabeedi ba baaveleyaaba Kristo. Benu laabeedi byenyi, benu a laabeedi ba ibaandu hya Nzambi ve. Benu a laabeedi hutso manzuhisini ma Nzambi haasiidi malahi ve. Benu laakaba mu tsi hwavele hiitu, hwavele uyaaba Nzambi. 13 Ka bunuubu, mu itwadi hya na Yisu Kristo, benu ba laabeedi lala, baayasusala benu bebele na Kristo, mu tooni bungodu bu makila ma nde.

14 Eye, Kristo ni hyenze hya bisu, nde wu asa ti Bayudaayo na bangoyi baba buli limosi. Mu nzyehulili a nyutu a nde ŋa kuruwa, nde abwiisi ibaha hi hyakakaba bo na hi hyakasa bo iboho. 15 Kristo atsambimisi mikele mi Bayudaayo na matumili, na makesili ma myo, mu utuunga ŋa hati li Bayudaayo na bangoyi, buli limosi li linyatihi mu itwadi hya na nde. Buuna ni bu nde haatuungi hyenze. 16 Mu lipfu la nde ŋa kuruwa, Kristo apfuuti bo boosi mu nyutu mosi, na anongisi bo na Nzambi. Mu kuruwa a nde, nde atsali iboho hya bo. 17 Buuna, Kristo ayidi mu uyayabisa Musamu wu Mubwe wa hyenze, huli benu ba laabeedi lala na Nzambi, na huli ba baabeedi bebele✝ na Nzambi. 18 Mbuli, ni mu Kristo bisu boosi, Bayudaayo na bangoyi, luutwala mu uyene ŋa busu bwa Nzambi Taata, mu likumbasa li Livupu la Ngidi ndulu limosi.

19 Buuna, benu bangoyi, benu a lisaali byenyi na bapyohi-nzila ve. Ka bunuubu benu lika muutu mumosi na bangidi, binama bya buli la Nzambi. 20 Baamiituunga benu mu tuungili yi biluumbi na mimbihuli bali bibeene, yi Yisu Kristo nde mwakulu ali manya li ituungu. 21 Nde ni wu li mu uva mifudi mya nzo yoosi, na wu li mu utelemese yo na uvangimasa yo nzo a ngidi ya Pfumu. 22 Mu itwadi hya na Kristo, benu kaka limiikoto mu tuungili a nzo, mu uba itwadi na bana boosi, nzo yi Nzambi ali mu utsahala mu Livupu la nde✝.