1 Ni me Pahuli, wu li iluumbi hya Yisu Kristo, mu litondo la Nzambi.

Me ndi mu utsonehe huli bisu musyenge a Efeso*, ba bali ba buli la Nzambi, ba ngetetee na ba bali itwadi na Yisu Kristo. 2 Nyaha Nzambi Taata a bisu, na Pfumu Yisu Kristo, bava benu hyese na hyenze!

3 Liyuusaani Nzambi, Taata a Pfumu a bisu Yisu Kristo! Nde asyemi bisu bu nde haava lisyeme loosi li livupu la hu mbuha a hu mayulu, mu itwadi hya bisu na Kristo. 4 Tswamina pangili a tsi, Nzambi aba amiikwasoolo bisu mana bisu liba bangidi hwavele ipiha ŋa busu bwa nde. Mu litondo la nde, 5 Nzambi amiitswamina uvolo kesili ti, nde ukitusa bisu baana ba nde mu nzila ya Yisu Kristo. Maana ni ma nde haatondi mu bubwe bwa nde. 6 Bunuubu, livaani Nzambi muyusu, mu bungodu bu bubwe, bu nde haaviidi bisu na bunyanga bwosi, mu Mwana a nde wa bahala wu litondo.

7 Eye, makila ma Kristo maamiiyobolo bisu mu bubi, na Nzambi amiinyahula masumu ma bisu. Ni mu buuna, nde haamiimweese bisu busina bwa hyese hya nde, 8 hi nde haava bisu bu hwaafulala, na tsiki na nzaabili yoosi. 9 Mu bubwe bwa nde, Nzambi ayabisi bisu lisuunda la nde la tswehi, li nde haatswamini uvangimasa mu Kristo. 10 Lisuunda mo li Nzambi huukuhasa hu tsukusu a taangu, ni li ukuukaha byosi bi bili hu mayulu, na bi bili ŋa toto, hu tsina mutumi ndulu mumosi, ni Kristo.

11 Mu itwadi hya bisu na Kristo, bisu kaka laamiiyaka la bisu kabu li mukobe, li Nzambi haasiidi bisu lahi. Bisu ba nde haateehili usoolo, we bu hwaba lisuunda la nde wuuna, wu ubaavangimasa moosi, we bu hu li kesili na litondo la nde. 12 Nyaha livaani nde muyusu, bisu ba laabeedi batsomi mu usa hiitu mu Kristo!

13 Benu kaka, ŋa benu laayuhi tsaangu yi imbuli, na Musamu wu Mubwe wu abehili benu liyobolo, benu laasiidi imiinu mu Kristo. Buuna Nzambi akumi iliimbu hya nde mwakulu mu benu, iliimbu hi Livupu la Ngidi hi nde haasiidi lahi. 14 Livupu la Ngidi lili we kabu latsomi, mu bisiha bi nde haamiisa bisu lahi. Lo lili mu uva bisu hiitu ti bisu luubaha mukobe mo wuuna, ŋa liyobolo la bisu luuvangama. Buuna, liyuusaani bunene bwa Nzambi!

15 Ni mu buuna, bu me anzuha tsaangu imiinu hya benu mu Pfumu Yisu, na litondo la benu mu banga imiinu boosi, 16 me a haakolo mu ufutala matondo huli Nzambi mu tooni a benu ve. Me umbaatsima mu benu mu masambulu ma me, 17 na me ndi mu upondo huli Nzambi a Pfumu a bisu Yisu Kristo, Taata nga muyusu, mu uva benu Livupu la tsiki, li luukaabangula na ubaayabisa benu nde. 18 Nyaha nde ayalusa miisu mi mutima a benu, mana benu litsikaha, ki hiitu hyaakangama mu teelili yi nde haateeli benu, na ki busina bu muyusu a mabwe, ma nde haamiiswehele ba buli la nde. 19 Nyaha nde ayabisa benu, ki bunene bu matwala ma kimuhili, ma nde ali na mo mu bisu banga imiinu. Matwala mo maana, ni ma Nzambi haasalili na ibahala, 20 ŋa nde haasuuli Kristo ŋa hati la babaakwa, na haatsahisi nde ŋa mbahala a nde hu mbuha a hu mayulu✝. 21 Nzambi amiibyalisa Kristo ŋa yulu a pasi lituma, pasi matwala, pasi mifudi, pasi ipfumu na pasi nduhi kima yi buutwala utata, ndulu a ŋa tsi mo yiniiyi ve, ka naapa mu tsi yi yiuya. 22 Nzambi amiisuusa bisiha byosi hu tsina a miilu mya Kristo✝, na amiisuusa nde mu uba mutumi a libundu. 23 Libundu ni nyutu a Kristo, ni mu lo, Kristo ali mu umonehele nde woosi, nde wu li mu uluusa bisiha byosi✝.