1 Baana baa ngu, tso bayabiisa muutu bikuma mu uvanga lilibi, benu baa lili na livupu la Nzambi, suungahaani nde mu bulembo. Na kebe we mwakulu kaka, mu uvelebwa mu lobese. 2 Baabitasanaani mipfuna: buna benu sa likuhasa mukele a Kristo.

3 Tso muutu li mu unyeme mu biita la nde, hwavele uba na tsongo, nde li mu upfuta nde mwakulu. 4 Pasi muutu abaakengese mavaanga ma nde mwakulu. Buuna, nde utwala unyeme mu nde mwakulu, ka a mu muutu mukima ve. 5 Mu tooni ati, pasi muutu ahwama na mavaanga ma nde.

6 Nyaha muutu wu bamiilongese mambu ma Nzambi, akaba bi nde ali na byo na mulongisi a nde. 7 Kebaani: Nzambi a bubaakwede ve. Bi muutu ubaakuna✝, ni bi nde ubaakukaha. 8 Woosi wu ubaakuna mu musunya, nde sa akuukaha bi byabolo; bi bibaabita hu lipfu. Ka woosi wu ubaakuna mu Livupu, nde wuuna sa akuukaha bya moonyi wu bilima na bilima. 9 A likolo mu uvanga ma mabwe ve. Mu tooni ati, sa likuukaha mu taangu yi yafwana, tso livelimweese ikolili. 10 Ni mu buuna, bu taangu yimonihili, libaavaangaani ma mabwe huli pasi muutu, fula-fula huli baana ba ngu ba imiinu mu Kristo.

11 Me mwakulu ndi mu utsonehele benu mu taangu mo yiniiyi, we bu benu lili mu udihula bunene bu bisono bya me. 12 Boosi ba bali mu ukwamisa benu ketili, bali mu usaha umonehele mu imuutu hya bo. Bo bali mu ukwamisa benu ketili, mana a batsundasa bo we ba bali mu usa imiinu mu kwili a Kristo ŋa kuruwa. 13 Ka ba baakete bo mwakulu a bali mu ukiinza Mikele ve. Bo batondi ti bakete benu, mana bo basa nyeme mu ketili a benu. 14 Ka mu me, nyeme a me a yili mu biina byosi ve, ndulu mu kwili a Pfumu a bisu Yisu Kristo ŋa kuruwa. Mu nde mavaanga ma mabi moosi mamiikwa. Me kaka amiikwa ŋa busu bu mavaanga ma tsi. 15 Ni mu buuna, tso huli wu baakete, buuve wu baavelekete, tsongo yove: hya tsongo, ni mu ukituha muutu wu munyatihi. 16 Huli boosi ba bali mu usiingala ndongisili a me, me ndi mu undeele bunuubu: Nyaha hyenze na bubwe bwa Nzambi, biba mu bo na mu buli la Nzambi loosi! 17 Bunuubu, muutu a habwesa me mangongo. Mu tooni ati, bikidi bi me ndi na byo, ni biliimbu bi bili mu umweese ti me aka wa Yisu. 18 Baana baa ngu mu Kristo, nyaha lisyeme la Pfumu a bisu Yisu Kristo, liba na benu boosi! Ameni!