1 Benu bisu Ngalatiya, ba baavele buyedi! Na aloho benu? Baamweesi benu paayalala, buni baakomini Yisu Kristo ŋa muti. 2 Me tondi ti benu liva me ndulu mvutu mu hyuhu mo hinihi: Benu laayaka Livupu la Nzambi, mu tooni a bu benu laakuhasa Mikele mya Moose myosi? Vooti mu tooni ati benu laasiidi imiinu mu Musamu wu Mubwe wu benu laayuhi? 3 Buni benu lu utwala uba na butsudu bwa pila yi? Bi benu laabaandiha mu Livupu la Nzambi, benu litondi usukasa mu mifudi mya benu mwakulu? 4 Moosi ma benu laabingala, maka ma mu pu? Naana! Mo utwala uba ma mu pu ve! 5 Ni buuna, Nzambi wu ava benu Livupu la nde na wu li mu uvanga bipadi ŋa hati la benu, a hali mu ukuhasa maana mu tooni ati benu lili mu udyata hutso Mikele mya nde ve. Ka mu tooni, ati benu lili mu usa imiinu mu Musamu wu Mubwe. 6 Abrahami asiidi imiinu mu Nzambi, na Nzambi amoni nde muutu wu akuha, mu tooni imiinu mo hina. 7 Benu lafwana mu uyaaba lo: Babali na imiinu mu Nzambi, ni bo bali baana ba Abrahami. 8 Nzambi aleeli mu mambu ma nde, ti nde sa akitusa babavele Bayudaayo mu uba baatu ba baakuha mu imiinu ŋa busu bwa nde. Ni mu buuna, nde abweleele huli Abrahami dyaambu lilibwe li: «Nzambi sa asyeme bibandu bya ŋa toto byosi, mu tooni a we✝.» 9 Abrahami asiidi imiinu mu Nzambi na baasyemi nde. Ni mu buuna, boosi babali mu usa imiinu sa basyeme bo, we bu baasyemi Abrahami nga imiinu. 10 Ka babali mu usingama mu Mikele mya Moose, baamikoto mu tsingili, we bu baasonehe bunuubu: «Aba wu baasinga, woosi wu avelehwada mu usalila moosi ma baasonehe mutso muhanda Mikele.» 11 Imbuli ni ti, a huli na muutu tso mumosi wu utwala uba wu akuha ŋa busu bwa Nzambi mu tooni Mikele ve. Mu tooni ati, hutso Muhanda Mikele baasonehe bunubu: «Woosi wu Nzambi hubaasa ti nde aba wu akuha mu imiinu hya nde, sa aba moonyi✝.» 12 Ka Mikele a myasingama mu imiinu ve. Na baabwesonehe bu: «Woosi wu li mu usalila mamali mu Mikele, sa aba moonyi mu myo✝.»

13 Bu Kristo akituhi iloho hya tsingili ŋa mbuha a bisu, nde ayobili bisu mu tsingili Mikele. Mabasonehe ma Ngidi mali mu uleele: « Aba wu baasinga, pasi nde wu akwa mu swe ŋa muti✝.» 14 Ni mu buuna, lisyeme li baasiidi Abrahami nzuhisini, laatoodi kaka huli bangoyi, mu tooni a Yisu Kristo, na mu nzila imiinu, bisu boosi lili mu uyaka Livupu li Nzambi asiidi nzuhisini.

15 Baana baa ngu, me polo benu ifwaani mu mbiili a bisu ya pasi ilumbu, mana benu litsikaha ma me tondi uleele: ŋa muutu amiisonehe nzuhisini la nde bu hwafwana, teehele nde mu ukwa, tso muutu mumosi utwala utuna lo, tso ubwese iloho imosi ŋa yulu ve. 16 Ni buuna ka, Nzambi hasiidi manzuhisini ma nde huli Abrahami na huli mwaana a nde. Mabasonehe a mali mu uleele ve ti: «Huli baana ba nde». Ka we wu uleele ti, hi hyabaha ba banzuhisini. Mabasonehe ma Ngidi mali mu uleele ti: «Huli mwaana nde.✝» Ni mu umweese ti ndulu muutu mumosi akangama mu lo, ni Kristo. 17 Me tondi uleele bunuubu: Nzambi abandihi usa nzuhisini we bu hwafwana. Mikele mya Moose mi myayidi humbisa maakama mana maku matatu ma bilima, utwala ufwinzala kesili mo yiina, tso umaasa nzuhisini ya Nzambi ve. 18 Ka tso mukobe wu Nzambi ubaava, li mu uyila mu nzila Mikele, buuna a husaali mu tooni a nzuhisini ve. Ka Nzambi aviidi Abrahami lisyeme mu nzila a nzuhisini. 19 Tsalu Mikele aba ki yo? Baabwesi Mikele ndulu mu umweese huli baatu, mavaanga ma bo ma mabi. Sa huba buuna, natee bu imbisa hya Abrahami hi baasili nzuhisini, hyuya. Mikele mo minimi bapofi baasanguli myo, humbisa a nzonzi mumosi, Moose. 20 Nzonzi ubaateleme ŋa boole bamiikakana. Ka mu tooni a nzuhisini, Nzambi ndulu siha ali. 21 Utwala mu uleele ti Mikele mili mu ulwanisa manzuhisini ma Nzambi? Naana! Utwala uvangama ve! Tso baaviidi matwala huli mukele mu uva moonyi huli baatu, buuna mukele akiikitusa baatu baba ba baakuha. 22 Ka Mabasonehe ma Ngidi, mali mu uleele ti toto yoosi yili hutso lituma li masumu. Toto yili yi yasumaha, mana banga a imiinu mu Yisu Kristo bayaka bungodu bu Nzambi hasiidi bo nzuhisini.

23 Tswamina imiinu mu uya, bisu laabedi hu tsina Mikele, baakatihala, mu ubaakeele taangu yi Nzambi hubangula bisu imiinu. 24 Ni mu buuna, Mikele myaba we keedi wu ubita bisu huli Kristo. Mana bisu liba ba baakuha ŋa busu bwa Nzambi, mu nzila imiinu. 25 Ka bu imiinu hyamiiya, bisu a laasaala hu tsina lituma la keedi mo wuuna ve. 26 Mu taangu mo yiniiyi, benu boosi laaka baana ba Nzambi mu imiinu mu Yisu Kristo. 27 Mu tooni ati, benu boosi ba baatondehe mu Kristo, benu laamiilwata Kristo. 28 A husaali na lisobosono ŋa hati li Muyudaayo na Mungeleke ve, ŋa hati li muviha na wu li bunyanga, ŋa hati li mukaasu na bahala. Benu boosi laaka mumosi mu Yisu Kristo. 29 Umono ti benu lili baa Kristo, benu lili imbisa hya Abrahami. Na benu sa liba babyalili ba mukobe wu Nzambi hasiidi nzuhisini huli Abrahami.