1 Mono ma me tondi uleele: Bu mubyalili mukobe akini mwaana a ngebe, lisobosono love ŋa hati la nde na muviha. Tso bu babaaleele ti byosi bya nde. 2 Nde li hu tsina lituma la keedi a nde, na la baatu ba bali mu ukeelese busina bwa nde, natee mu taangu yi taata a nde hakese. 3 Bisu kaka ni pila mosi, bu laaba bikenyi, bisu laabeedi baviha baa mavupu ma mali mu utuma tsi. 4 Bu taangu yi baakese yaatoodi, Nzambi atsindihi Mwana a nde: Wu mukaasu habuti, wu aba hu tsina Mikele mi Bayudaayo. 5 Mwana mo hayidi mu uyobolo ba baaba hu tsina lituma li Mikele, na mu uva bisu bunyanga mu ukituha baana ba Nzambi. 6 Mu tooni ati, benu ni baana ba nde, Nzambi atsindihi mutso mitima mya bisu, Livupu la Mwana a nde, Livupu li libaafulaha: «Abba! Taata!» 7 Ni mu buuna, we a hasaala muviha ve, ka we mwaana. Mu tooni ati we li mwaana, we mubyalili mukobe, wu Nzambi haswehele baana ba nde.

8 Hutsomi, benu aba a laayaba Nzambi ve. Benu laabedi baviha ba banzambi ba bali binzanzambi. 9 Ka bunuubu, bu benu limiiyaaba Nzambi, buuve bu Nzambi amiyaaba benu, buni benu lu ubwefutahala hutso lituma li mavupu mo maana? Mavupu ma bumvwemvengi, na ubwekituha baviha baa mo? 10 Benu lili mu uvolo taangu yindahi, mu ubaatsikaha bilumbu, batsungi, makesili ma matangu na bilima. 11 Me ndi na boomo ti, isalu hi me anzatsala ŋa hati la benu, hiba hya mu pu. 12 Baana baa ngu, me ndi mu unzayaana huli benu. Baani we me mu tooni ati, me ndi we benu. Benu a laavangila me dyaambu lilibi tso limosi ve.

13 Yibwalaani moonyi ti, taangu yi me anzabisi benu Musamu wu Mubwe, yabisa latsomi, me amba mubeedu. 14 Na mu bubeedu bwa me, bu bwakakwamisa benu, benu a laanyasuli me, tso ubelele me ve. Ka benu laayaki me we pofi a Nzambi, we Yisu Kristo nde mwakulu. 15 Ki pila a kinya benu laaba na yo! Ka hima hya yiila benu? Me ndi mu utiila benu imbangi mo hinihi: tso hwafwani uba buuna, kini benu laasonzili miisu ma benu, mu uva me mo. 16 Bunuubu, me ka muboho a benu bu me miinzabisa benu imbuli? 17 Baatu mo baana, ba bali mu usaha uyabisa benu Musamu wu Mubwe mukima, lehemene la bo mu benu a lili lilibwe ve. Bo bali mu usaha utahusa benu na me, mana benu likangama mu bo. 18 Hwafwana bubwe mu ubaamweese lehemene la benu pasi taangu, mu mavaanga ma mabwe. Ka ndulu a mu taangu yi me ndi ŋa hati la benu ve. 19 Baana ba me, we mukaasu nga misoongo, me ndi mu umbwemono misoongo mu benu, we me wu li mu ubwebuta benu. Misoongo mo miina myukwilala natee bu Kristo huuba moonyi mu benu. 20 Me tondi uba itwadi na benu, na usobo bitoyili. Mu tooni ati, matsimi ma me mali mu uhelene mu benu.

21 Leelaani ati me, benu baa litondi uba hu tsina lituma li Mikele, benu a lili mu uyuha ma Mikele mili mu uleele ve? 22 Mu tooni ati, mu mabuuku ma Moose baasonehe ti Abrahami abahi baana boole ba babahala. Mumosi wu a na mukaasu wu muviha, wuna na mukaasu wu bunyanga. 23 Ka wu nde habuti na mukaasu wu muviha, baabuti nde mu litondo li musunya. Wu nde habuti na mukaasu wu bunyanga, baabuti nde mu nzila ya nzuhisini la Nzambi. 24 Kuma mo yiniiyi, yili na mbindulili yi yasweme: bakaasu baboole bali mu umweese manzuhisini moole. Lahi limosi mu mamoole, li baasiidi ŋa yulu isyelo hya Sinayi. Ni mu lo baabuti baana babali baviha, mu nzila ya Agali. 25 Buuna Agali ni isyelo hya Sinayi hu tsi a Arabiya. Nde li mu ufwanina na Yeruselemi la loloyiniyi. Mu tooni ati, nde li mu buviha na baana ba nde. 26 Ka Yeruselemi ya hu yulu, yili bunyanga. Yo ni ngu a bisu. 27 Mu tooni ati, baasonehe:

«Ba mu kinya!

We mukaasu inguma,

we wu avele na baana,

fulaha mu kinya!

We wu aveleyaaba misoongo mya mbutili!

Mu tooni ati, litangu la baana ba mukaasu wu baatimba,

lu ulutaala la baana ba mukaasu wu baakwele✝.»

28 Ka benu, baana ba ngu, benu lili we Isaki: baana ba baabuta we bu huli nzuhisini la Nzambi! 29 Ka we mu taangu a tsomi, mwaana wu baabuti mu makila akatsuta wu baabuti mu Livupu la Nzambi. Loloyi kaka, huli mu uvagama buuna. 30 Ka Mabasonehe ma Ngidi, mali mu uleele bunuubu: «Binga muviha mo wunuuwu na mwaana a nde. Mu tooni ati, a hwafwana ti mwaana wu mukaasu muviha abuta, akaba mukobe a taata na mwaana wu mukaasu bunyanga abuta ve✝.» 31 Ni mu buuna, baana ba ngu, bisu a benu a lili baana ba mukaasu wuli muviha ve. Ka bisu a benu baana ba mukaasu wuli bunyanga.