1 Baana, bu benu laakangama mu Pfumu, siingalaani babuti ba benu mu tooni ati, buuna ni bu hwafwana. 2 «Kiinza taata a we na ngu a we✝» wuuna ni mukele watsomi wu li na lahi. Lahi mo lili mu uleele bunuubu: 3 «Mana we ba mu kinya, na ti idiingu hya we hiba hi ila ŋa toto✝». 4 Benu babuti, a liva baana ba benu kesi mu tooni a mbiili a benu ve, ka baakulasaani bo mu ubaava mandoongi na tsungili yi Pfumu ubaatondo.

5 Benu baviha, baasiingalaani bapfumu ba benu ba ŋa toto na kulimini, na likiinzu, na mutima wu ayuluha we benu balili mu usalila Kristo. 6 A lisa buuna ndulu ŋa busu bwa bo mu umweese bo kinya ve, ka baasanaani isalu hya bo mu mutima a benu woosi, mu ukuhasa litondo la Nzambi we baviha ba Kristo. 7 Baasalilaani bo na kinya yoosi, mu tooni ati, benu Pfumu lili mu usalila, ka a baatu ve. 8 Yibuhalaani moonyi ti pasi muutu, tso nde li muviha buuve bunyanga, tso vaangi ma mabwe, Pfumu usyende nde.

9 Benu bapfumu, saani bumosi kaka mu baviha ba benu. A laabakanina usa bo bubi. Yibuhalaani moonyi ti, Pfumu a bo na wa benu ni nde mumosi wu li hu mayulu, nde wu avele na buraandu✝.

10 Mu umana, hwadisaani mivumu mya benu mu Pfumu, na mu matwala ma nde moosi. 11 Lwataani bilwanili byosi bya Nzambi, mana benu likalila nyutu ŋa busu bwa soho la Saatana. 12 Mu tooni ati, mudiingu a bisu a mu ulwanisa musunya na makila ve. Ka bisu lili mu ulwanisa matwala, batumi na bipfumu bya tsi ya piipidi ya dunga-dunga, matwala ma mavupu ma mabi ma mali hu mayulu. 13 Ni mu buuna, lwataani bilwanili byosi bya Nzambi, mana benu likalila nyutu mu ilumbu hya tsisu, hu mbisa ulwana natee hu tsukusu, benu luubwehwada uba mu tele.

14 Ni mu buuna, baavangamaani: hadaani imbuli we mudi a mu luungu. Lwataani butsiitsa we ikutu hi mudiingu. 15 Lwataani bikoodi bya benu, ni lehemene li uyalongese Musamu wu Mubwe wa hyenze. 16 Mu pasi taangu, kaangaani imiinu, ni ilwanili hi ibaapfubaha linyutu. Ilwanili hi hyutwala udimasa mbaahu makongo moosi ma Nga Bubi. 17 Volwaani kaka ibudu hi mudiingu, ni liyobolo, na sabila wu Livupu la Ngidi✝, ni Musamu a Nzambi. 18 Baasambilaani taangu yoosi mu baatu ba Nzambi, mu masambulu ma pila mu pila na mu mapondili moosi, baasambilaani mu Livupu. Baani na mukonono mu ubaasambila mu bangidi boosi. 19 Baasambilaani mu me kaka, mana Nzambi adibula matsimi ma me, mu upalisa mikuma mya tsiitsa ŋa me ukaanzambila, na me mbanzabisa matswehi ma liyobolo ma Musamu wu Mubwe na hiitu hyoosi. 20 Tso bu me ndi mutso a kondaayi, me ndi iluumbi hi Musamu wu Mubwe mo wuuna. Buuna, baasambilaani mana me mbanzabisa nde na hiitu hyoosi, we bu hwafwana.

21 Tisiike✝, mwana a ngu abisu wu litondo, wu li musalili a Pfumu wa ngetetee, sa ava benu mapolo moosi ma me, mana benu liyaaba, buni me ndi. 22 Me miitsindaha benu nde, mana benu liyaaba buni bisu lili na mu uhwadisa benu.

23 Nyaha Nzambi Taata, na Pfumu Yisu Kristo bava huli baana ba ngu, hyenze na litondo napa imiinu. 24 Nyaha hyese hya Nzambi hiba na boosi ba bubaatondo Pfumu a bisu Yisu Kristo, mu litondo li luuvesuka.