1 Pahuli na Timoteho, baviha ba Kristo Yisu. Bisu lili mu usonehele muhanda mo wunuuwu, huli boosi ba baakangama mu Nzambi, mu itwadi na Kristo Yisu. Bisu lili mu usonehele huli bakuutu ba libundu, na huli bakeelisi ba libundu ba bo boosi, ba bali hu musyenge a Filipo. 2 Nyaha Nzambi Taata a bisu na Pfumu Yisu Kristo, bava benu hyese na hyenze.

3 Me ndi mu upfutala matondo huli Nzambi, pasi taangu yi me ndi mu unzibwala moonyi mu benu. 4 Tangu yoosi yi me ndi mu utsambila mu benu, me ubaasambila na kinya. 5 Me umbaatsambila na kinya, mu tooni ati, benu laakumbisi me, mu uyabisa Musamu wu Mubwe, umata ilumbu hyatsomi, natee bunuubu. 6 Me ndi na hiitu ti: Nzambi wu abaandihi usa isalu hi hibwe ŋa hati la benu, ukwilala mu ubaasa hyo, natee hu tsukusu, mu ilumbu hi Kristo Yisu hu uyafutaha. 7 Hu li tsiitsa ti, me mba na matsimi ma bunuubu mu tooni a benu boosi. Me ndi mu utondo benu mu mutima a me woosi. Mu tooni ati, benu laakumbisi me mu isalu hi Nzambi havidi me, mu hyese hya nde. Benu laakumbisi me ŋa me ambedi bunyanga, mu ulwanila Musamu wu Mubwe, na uyabisa nde na mifudi myosi. Benu a laasuki ŋaana ve, ka benu laakumbisi me kaka natee mu taangu mo yiniiyi, yi me ndi mu mapanga. 8 Nzambi yaabi ti me atondo benu mu mutima a me woosi, we bu Kristo Yisu hatondo benu.

9 Mono ma me ndi mu upondo huli Nzambi, mu masambulu ma me ni ti, litondo la benu libaasinzakula. Me ndi upondo huli nde kaka ti, benu liyaba na utsikaha bubwe-bubwe, buni benu lafwana udyata ŋa busu bwa bana, mu nzaabili ya mbuli. 10 Ni buuna, benu luuyaba usilasa ndyatili yimbwe. Benu luuba banga imbuli na ba baavele na masyembo, mu ilumbu hya nziili a Kristo. 11 Benu luuba bisina bi mimbutu mi mavaanga ma mabwe mu Yisu Kristo, mana baatu boosi bava muyusu huli Nzambi.

12 Baana ba ngu, me tondi uyabisa benu ti mambu ma maayiili me, ni ma maasiidi ti Musamu wu Mubwe ayabaana mu mambuha moosi. 13 Ni mu tooni a maana, masadaadu moosi ma mu ubaakeelese pfumu a tsi a Looma, na bakima boosi, bayaba ti me ndi mu kondaayi, bu me umbaatsalila Kristo. 14 Titswene, bukondaayi bwa me bwamiihwadisa ba banzuhisini mu baana ba ngu, mu imiinu hya bo mu Pfumu. Na bo bali na ibahala, mu uyabisa Mambu ma Nzambi hwavele a boomo.

15 Mu mbuli, bana bali mu uyabisa Musamu a Kristo na nyengi, na mitsotso mu tooni a me. Ka bakima, bali mu uyabisa Musamu a Kristo na matsimi ma mabwe. 16 Bo baniiba, bali mu usa buuna, mu tooni ati, bo baatondo me. Bo bayaabi ti me ndi mu kondaayi, mu uvolele Musamu wu Mubwe mileembe. 17 Kabu latsomi la baatu, lili mu uyabisa Kristo mu mutima wu mubi. Bo bali mu usa lo na nyengi yoosi mu tooni ati, bayaabi ti me ndi mu kondaayi. Bo bali mu utsima urangisa mapasi ma me.

18 Liina a lili dyaambu la tsongo ve. Lo kaka a lili mu ukwamisa me ve. Tso hwaba ti mu matsimi ma mabi, buuve mu matsimi ma mabwe, la tsoongo ni ti, bo bali mu ulongese mambu ma Kristo. Ni mu tooni a maana, me ndi na kinya. Na me umbwetsinzamono kinya, 19 mu tooni ati mapasi mo maana mu ubita hu liyobolo la me, mu nzila yi masambulu ma benu, na mu nzila yi likumbasa li Livupu la Yisu Kristo. 20 Li me ndi mu ukeele na usa hiitu mu lo ni ti, me a handi na tsonyi mu pasi dyaambu ve. Li me ndi mu utondo loloyi, we mu pasi taangu na hiitu hyoosi ni ti, Kristo uyaka muyusu mu nyutu a me. Me tso amba moonyi, me tso akwa.

21 Ka mu me, Kristo ni idiingu hya me. Na lipfu, aka ni kaluha a me. 22 Ka tso me mbwemba moonyi mu usa isalu hya kaluha ŋa toto, buuna me a hanzaabi hi me utsoolo ve. 23 Me amiiteleme ŋa busu bwa mambu moole. Tsimi a me yatsomi ni mu ukwa, mana me tsahala na Kristo. Liina ni li lafulala bubwe. 24 Ka hwafulala talu huli me, mu uba moonyi ŋa toto mo yiniiyi, mu tooni a benu. 25 Ni mu buuna, me ndi na hiitu mu liina, na me nzaabi ti, me ukwilala ŋa hati la benu boosi, mu ukumbasa benu. Mana benu likula, na benu liba na kinya mu imiinu. 26 Na bu me unzapfutaha huli benu, benu luuba na kinya yi yafulala mu tooni a me, mu mambu ma mabwe ma mali mu Yisu Kristo.

27 Pasi bu buuyiila, dyataani we bu hwayelemene na Musamu wu Mubwe wa Kristo. Tso me nzidi, tso me pelinza, me mbanzuha babaaleele ti, benu laavangama mu matsimi mamosi, na lili mu usala itwadi mu mutima mumosi, mu ulwanila Musamu wu Mubwe wu bisu laayaki. 28 A liba na boomo bu bambene ba benu ve. Mu bo, hiina ni iliimbu hya ti bo buudimbala. Ka mu benu, hyo ni iliimbu hya ti benu luuyoboho, na lo lili mu umata huli Nzambi. 29 Ka Nzambi hava benu hyese hi usalila Kristo, ndulu a mu usa imiinu hya benu mu nde ve, ka napa mu umono pasi mu nde. 30 Bunuubu, we bu benu liyabi, mudiingu wu benu lili mu ulwana, ni nde mumosi wu benu laamoni me mu ulwana hutsomi, na wu me kini mu umbwendwana.