1 Na bunuubu, baana ba ngu a me, baani na kinya bu benu lili itwadi mu Pfumu. Ka huli me, me a handi mu umono budwa, mu ubweyabisa benu mambu ma me atsonihili benu ve. Na huli benu, mandoongi mo maana, mu ukandiha benu.

2 Kebaani mu bavangi ba ma mabi! Kebaani mu bamvwa mo baniba! Kebaani mu milongisi mi mili mu upfuta benu ti, tso a baakete benu ve, benu a lili mu kabu la baana ba Nzambi ve! 3 Bisu ni ba Nzambi ubaamono ti bisu laamilwata iliimbu hya ba Mukristo ba mbuli. A bo ve! Bisu lili mu uyusa Nzambi mu likumbasa li Livupu la nde. Bisu lili na nyeme mu Yisu Kristo, na hiitu hya bisu, a hili mu bi muutu hu utwala uvanga mu mifudi mya nde mwakulu ve. 4 Mu umono bubwe, me kaka utwala usa hiitu mu bi muutu ubaavanga.

Tso baatu bakima bubaasa hiitu hya bo mu mavaanga ma imuutu, buuna me kaka utwala usa hiitu hya me hu hwafulala mu mo. 5 Me, baaketi me mu ilumbu hya pwombo, hya hu mbisa a mbutili a me. Me musi Isereli mu ubuta, wa buli la Benyameni. Bakaaha ba me boosi bisu Ebeleho. Ka uto ti mu kiinzili mikele mya Moose, me ndi mu kabu li Bafarisi. 6 Ka uto ti mu lehemene li me ambedi na lo mu Nzambi, me akakwamisa bayihi ba Yisu. Muutu utwala usyembe me mu uvelekiinza Mikele ve, mu tooni ati, me akakiinza myo myosi.

7 Ka bisiha byosi bi me akamono ti byo na pfuta yimbwe mu me, aka kaluha ve, mu tooni a Kristo. 8 Mu mbuli, me ndi mu umono bisiha mo biniibi byosi, bi byavele na kaluha. Mu tooni ati, busina bu bwafulala kaluha, ni nzaabili a Yisu Kristo Pfumu a me. Mu tooni a nde, me atsiinga utimba biina byosi bi byavele na kaluha, mana me mbuuna Kristo. Eye, me ndi mu umono byo we bya nzododo mu me. 9 Me atsiidi buuna, mana bayabiisa me wu akangama mu nde mu butsiitsa bu imiinu mu Kristo. A mu butsiitsa bwa me, bu buumata mu Mikele ve. Ka mu imiinu hi hyasiingama mu Kristo, me umba butsiitsa. Ni butsiitsa bu buumata huli Nzambi. 10 Hi me ndi mu utsaha hyoosi, ni uyaaba Kristo bubwe-bubwe, na uyaaba matwala ma tsuuhili a nde mu babaakwa. Hi me tondi, ni umono mapasi we bu nde hamoni, na ukwa mu tooni a nde, we bu nde hakwidi mu me. 11 Ni mu buuna, me umba na hiitu ti Nzambi usuula me kaka ŋa hati la babaakwa.

12 Me a handi mu undeele ve ti me amiinzaka musyendo, buuve ti me amiito mu itesi hya muutu wu akuha. Me ndi mu ukwada mu tiinu, mana me mbaha musyendo mo wuuna. Mu tooni ati, Yisu Kristo nde mwakulu amiibuuna me. 13 Baana ba ngu, mu me mwakulu, me a handi na tsimi ti me amiimbaha kaluha ve. Ka me ndi mu utsa isiha imosi: me ndi mu upusana ma mwakulu, na usa mifudi mu ubaalabitala ma hu busu. 14 Me ndi mu ukwada mu uyene tiinu hu busu. Mu tooni ati, Nzambi li mu uteele me mu uyaka musyendo hu yulu, mu itwadi na Yisu Kristo.

15 Bisu ba lili mu umono ti bisu ba laakula mu livupu, ni tsimi mo yiina yafwana ubaaba na bisu. Na tso mu dyaambu limosi benu lili na matsimi ma maasobono, Nzambi uyalusa matsimi ma benu. 16 Ka ndulu, mu itesi hi bisu a benu laamiito, lidyataani mu itwadi.

17 Benu boosi, duukalaani mbiili a me baana ba ngu a me. Bisu laaviidi ifwaani. Ni mu buuna, talaani buni huli ndyatili a ba bubaaduukala ifwaani mo hiina. 18 Ka, ba banzuhisini bali mu uvelesiisa mbiili a bo yimbi. Bo bali mu umonehele bambene ba Kristo wu akwidi ŋa muti. Me akandeele benu lo taangu yoosi. Ka bunuubu, me mbwendeele benu lo na bililu. 19 Hu tsukusu idiingu hya bo, Nzambi ubungasana bo, mu tooni ati, bo ubaasaha uywatisa mapeyu ma bo ma musunya. Bo bali mu usuusa muyusu a bo mu moosi ma mu baamweese bo tsonyi. Bo ubaatsima ndulu mu bisiha bi idiingu hya ŋa toto. 20 Ka mu bisu, bisu baatu ba Ipfumu hi mayulu. Bisu lili mu usinzakeele nziili a Pfumu Yisu Kristo, mu uyayobolo bisu. 21 Nde ukimbusa nyutu a bisu yi yaatsambama, mana yo yifwanina na nyutu a nde yi muyusu, mu matwala ma nde. Ni nde li na matwala ma ususa pasi muutu na pasi isiha hu tsina lituma la nde.