1 Ni mu buuna, baana ba ngu ba litondo, me na lehemene li ubwemonono na benu! Benu lili kinya a me na mutata a me wa moonyi. Benu ba lili bambaahi ba me, kwilalaani ba baakangama mu Pfumu.

2 Evodi na Syntike, me ndi mu unzayana benu, mu uyuhasana na ukangama mu Pfumu. 3 We kaka mbaahi a me wa taangu yoosi, me pondi we mu ukumbasa bakaasu baboole baniiba, ba baalwani na me mu mifudi mu uyabisa Musamu wu Mubwe. Me a handimbili Kelema na bambaahi ba me bakima ve, ba manduhi ma bo basonehe mu Muhanda a Moonyi.

4 Baani na kinya taangu yoosi mu Pfumu! Me pfutahala: baani na kinya! 5 Nyaha baatu boosi bamono bulembo bwa benu. Pfumu aka bebele. 6 A lihelene mitima mu pasi isiha ve. Ka mu mambu moosi, yabisaani mapondili ma benu huli Nzambi mu masambulu, mu manzayini, na mu pfutili matondo. 7 Na hyenze hya Nzambi, hi hyalutala buyedi bwosi, hyukeelese mitima mya benu na matsimi ma benu mu Kristo Yisu.

8 Baana ba ngu, mu umana, nyaha matsimi ma benu mabaakwilala taangu yoosi mu biina byosi bi bili bya mbuli, bi byahwama, bi byasungama, bi byatsyeme, bi bubaatondo, bi bubaasingasala, bi bibwe na bi byahwama mu muyusu. 9 Salilaani ndongisili yi benu laayihi na laayaki huli me, mu mambu ma me na mu mbiili a me. Na Nzambi a hyenze, uba na benu.

10 Me amoni kinya yindahi mu Pfumu, mu tooni ati litondo la benu mu me, laabwebuta mbutu yi nyatihi. Litondo mo liina, benu laabeedi na lo, ka benu a laabahi nzila yi umweese me love. 11 Me a handi mu undeele buuna mu tooni manzala ma me ve. Mu mbuli, ka mu tooni ati, me amiinziha uba mu kinya, tso mu hoole hu me ndi na hwo. 12 Me nzaabi ubaaba hutso buyaha, na me nzaabi kaka ubaaba hutso busina. Me anzihi ubaaba na kinya, mu taangu yi me ndi na byudya bi byafwana, napa mu taangu yi me ndi na nzala, tso mu taangu a mvwadu*, buuve yi limbunga. 13 Me utwala ukunda mambu moosi, mu likumbasa la Kristo wu ubaahwadisa me. 14 Bunuubu, benu laavaanga bubwe, mu ukumbasa me mu mapasi ma me.

15 We bu benu mwakulu liyabi, benu bisu Filiipo, mu taangu yi me ambaandihi ulongese Musamu wu Mubwe, ŋa me apali mu itaanzi hya Masedonya, libundu tso limosi a laakumbisi me ve. Ndulu ni benu laakatsimala me, mu mapasi ma me na mu makinya ma me. 16 Ka tso ŋa me ambedi hu musyenge a Tesalonika, benu laatsindihi me likumbasa la mbongo tsindaha yoole, mu umana mapasi ma me. 17 Me a handi mu undeele buuna, mu ubwesaha uyaka bungodu ve. Hi me ndi mu utsaha ni ti, Nzambi asyeme benu mu bungodu bwa benu.

18 Mu muhanda mo wunuuwu, me ndi mu utsingasala ti, me anzaka bungodu bwa benu bwosi, bu bwavyohelele iteesi. Bunuubu, bu Epafodite amiibehele me bungodu bwa benu, me miimbaha byosi bi me ndi na byo nzala. Bungodu bwa benu buli we nyafi ya tsulu yimbwe, bungodu bu Nzambi ubaasiinga na bu nde ubaamono kinya. 19 Na Nzambi a me uluusa benu mu biina byosi bi benu laavele na byo, we bu hu li busina bu muyusu a nde, mu Kristo Yisu. 20 Muyusu aba huli Nzambi Taata a bisu, mu bilima na bilima! Ameni!

21 Vaani mabwehe huli pasi muutu wu li mu buli la Yisu Kristo. Baana ba ngu ba bali na me, bamiiva benu mabwehe. 22 Bangidi boosi ba musyenge mo wunuuwu, bamiitsindaha benu mabwehe, fula-fula ba bali mu usala mu nzo a Kayisaali, pfumu a tsi a Looma. 23 Nyaha hyese hya Pfumu Yisu Kristo, hiba na benu boosi.