22 Bakadi, siingaani uba hu tsina lituma li balumi ba benu, we bu benu libaasiinga uba hu tsina lituma la Pfumu. 23 Mu tooni ati, mulumi ni mutswe a mukadi, we bu Kristo ali mutswe a libundu li lili nyutu a nde, na li nde ali Muyobili a lo. 24 We bu libundu libaasiinga uba hu tsina lituma la Kristo mu mambu moosi, ni buuna kaka bakadi baafwana usiinga uba hu tsina lituma li balumi ba bo, mu mambu moosi.

25 Balumi, tondwaani bakadi ba benu, we bu Kristo haatondi libundu na haayehuli moonyi a nde mu tooni a lo. 26 Kristo atondi ubyalisa baatu ba libundu la nde huli Nzambi, hu mbisa utsyemese lo mu mamba na mu Musamu a nde. 27 Nde atondi umweese libundu huli Nzambi hutso muyusu a lo loosi, li laavele na toodi, tso munyuda, tso masyembo makima, ka libundu la ngidi na li laavele na ipiha. 28 Bumosi kaka, balumi baafwana utondo bakadi ba bo we nyutu a bo mwakulu. Woosi wu ubaatondo mukadi a nde, ubaatondo nde mwakulu. 29 Eye, a hu li na muutu tso mumosi wu abelele nyutu a nde mwakulu ve. Ka muutu ubaabuungala nyutu a nde na ubaakele yo, we bu Kristo ubaasa mu libundu, 30 li lili nyutu a nde yi bisu boosi lili binama.

31 We bu baasonehe: «Ni mu buuna, bahala luusiisa taata a nde na ngu a nde mu ukangama na mukadi a nde, na bo baboole buukituha nyutu mosi✝.» 32 Hu li ŋaniiŋa na imbuli hi hyasweme: me ndi mu undeele mu tswehi yi yitali Kristo na libundu. 33 Ka yo yaahwama kaka na benu: hwafwana ti pasi mulumi abaatondo mukadi a nde we nde mwakulu, na pasi mukadi abaakiinza mulumi a nde.