1 Yi ivula̱ avana a̱tsuma̱ a̱ Sihiyona,

i saala zuva Masasan ma̱ va̱ ma Akiza!

Lyawa ama a na a̱ ri nden a̱tsuma̱ e iɗa'a suru e je'en lipu,

adama a na urana wa̱ A̱sulazuva u ta̱ lo a̱ ta̱wa̱

waru u yuwan ta̱ zuzu.

2 Urana wi irumbu u ɗa na̱ a̱tsuma̱lima̱,

urana we eleshe oɓolo ni irumbu i pici i ɗa.

Tsi irumbu i na a bazai zuva vu nsasan

ne ɗa o oɓolo a̱soja o ucira a̱ ri lo a̱ ta̱wa̱,

waru a̱ da̱shi ene cu'un va̱ yi shi, diga a mantsa a̱ tyo a mantsa.

3 Akina a̱ da̱na̱ ta̱ a lyuwusa elime a̱ a̱soja,

a̱ca̱pa̱ e le waru elentsu a akina a̱ ta̱ da̱na̱ lyuwusa.

Elime e le iɗa'a i ta̱ da̱na̱ ulobonu tsa̱ a̱a̱rumbu a Adini,

amma a mantsa ma na a̱ ka̱ra̱i,

reve wo o'wo a̱tsumona.

Na amayun babu ili i na ya la'a diga e ekere e le.

4 Iroci ya apapari'i o rotso ta̱ iroci yi ido,

e ilaɗi cine vu revei ido yu uvon.✝

5 A tsu'yan zuva vu nsasan,

ilama i le cine vu revei ilama yi ikeke yi ido ɗa,

na̱ ma̱gugwa̱ cine vu revei akina a malyuwa,

tsa ali o uvon o ucira na a darai adama o uvon.

6 E menee me ele nɗa n tsu da'wan ta̱,

waru urewesu wu nɗa'a suru u tsu la̱nga̱ ta̱.

7 A tsu yuwan ta̱ tsa̱ a̱za̱ o uvon,

a tsu pasa ta̱ ukari tsa̱ a̱soja.

A tsu wala ta̱ ugeru ugeru,

babu vuma na tsu takatsuwa.

8 A tsu uwulai o ugeru shi,

za suru tsu wala ta̱ mejege o ure wa̱ yi.

A tsu ɓatsalai ta̱ a̱tsuma̱ a n'yuwatan nle

waru babu vuma na tsi isawaton le.

9 A̱ tsu 'ya̱wa̱ ta̱ na̱ a̱ ta̱wi a̱tsuma̱ a̱ lyuci,

a̱ tsu da̱na̱ ta̱ e ilaɗi o ukari a uwa a 'wa.

A tsu uwa ta̱ nu usowoto wu upepu tse evu.

10 A̱ ma̱ka̱ka̱n me ele iɗa i tsu jinga̱ɗa̱ ta̱,

zuva va zuva tsu je'en ta̱ lipu.

Waru urana na̱ woto o tso o'wo ta̱ irumbu,

italyo'o fo aa casu ekan shi.✝

11 Nu uɗyo wu ucira wa̱ yi,

A̱sulazuva a damma ta̱ a̱soja a̱ yi,

a̱soja a̱ yi a̱ ri kece shi!

A̱soja a na a yuwusan tsutoni nu udammu wa̱ yi

a̱ ta̱ nu ucira lon.

Na amayun urana wa̱ A̱sulazuva a̱ba̱jini a ɗa,

za na a casu wovon lon,

zane ɗa aa la'a?✝

12 Apa ili i na A̱sulazuva a dammai,

<<Ko gogo,

i ta gura ka̱mba̱ uba̱ta̱ u va̱ no okolo a̱ ta̱,

na akuli na̱ mesun, na̱ a̱tsumola̱ngu.>>

13 Wukaru wa̱ a̱tugu a̱ɗu u rawa shi,

lyawa okolo a̱ɗu o roco uvadalasa u ɗu.

I ka̱mba̱ uba̱ta̱ wa̱ A̱sulazuva A̱sula̱ a̱ɗu,

adama a na u ta̱ ni isa'ani waru u tse ene ta̱ iliyali,

icigi ya̱ yi i tsu vadala shi,

waru u tsu vadala ta̱ e ili i na u dammai waa yuwan.

14 N na̱ i ka̱mba̱ uba̱ta̱ wa̱ A̱sulazuva,

zane ɗa revei ko u ta vadala diga a majiyan ma̱ yi

u zuwa ɗu aba'un?

U ta gura wo o'wo i cayisa

kucci vi ishina na̱ kucci vi ili yo oso

uba̱ta̱ wa̱ A̱sulazuva A̱sula̱ a̱ ɗu.

15 Ivula̱i avana ɗe Sihiyona!

I zuwa akuli a akiza adama a na yo o'wo cece!

I ɗe iɓolo ya̱ akiza!

16 I ɓoloto wa ama!

I tawaa A̱sulazuva iɓolo ya akiza'a!

I ɓoloto mbara

na̱ muwun oɓolo na aza a na aa apusa maani!

Lyawa vali vu kasa'avu lyawa aasula a̱ yi,

kasa'avu fo u lyawa aarungutsu a̱ yi.

17 Lyawa nan ganu a na a yuwusan a̱ga̱nda̱ a̱ ma̱ka̱ka̱n ma̱ A̱sulazuva,

e memere ma̱ mo u'uwata wa̱ a̱a̱'isa̱ na̱ masa'a a̱ shon.

Lyawa le a damma, <<A̱sulazuva,

vee ene iliyali ya ama a̱ wu.

She vu lyawa ama a agadu a̱ wu a uwwa wono wan,

hali na nɗa n ro maa yuwan tsugono aci e le.

Adama nye ɗa aa damma a̱tsuma̱ a nɗa

<Te ɗa gba A̱sula̱ e le?> >>

18 Reve A̱sulazuva a yuwan tsushu'un adama e iɗa ya̱ yi

a̱vu we ene iliyali ya ama a̱ yi.

19 Reve A̱sulazuva a̱ usu avasa ama a̱ yi u damma,

<<A̱yi ɗa nda, n ta̱ lyungusa̱a̱ ɗu

ni ishina na̱ masayan oɓolo na̱ mani'in ma̱ zetun,

agba i ta̱ cuwa̱n ne le.

Agba ma̱a̱ da̱shi ka̱mbuwa̱ ɗu ili yi izo'oshi

e ekere a nɗa waru shi.

20 N to lo apapari alanga na̱ a̱ɗu,

oɓolo na̱ a̱soja o ugana na a̱ riya̱a̱ ɗu nu uvon.

N to lo le a̱ tyo a̱tsumona a na a̱ ri babu ili,

aza a na a̱ ri elime a uwa a Mala ma Akpaɗi ma asana,

aza a na o tono le a̱ca̱pa̱ a uwa a Mala ma Araba wa̱ a̱livu.

Ushamu wa̱ a̱kwa̱kwa̱ le u ta̱ 'yon zuva,

ushamu wi iwuya i le i ta̱ ɓa̱ru ba̱ta̱ biti.

Na amayun a̱mu A̱sulazuva

n ta yuwan linga va asalama!

21 She vu uwwa wovon wan, a̱vu iɗa,

vu yuwan ma̱za̱nga̱ na̱ mere,

adama a na a̱mu A̱sulazuva

n yuwan ta̱ linga va asalama.

22 She yu uwwa wovon wan, a̱ɗu inama yu una,

adama a na anlya a̱tsumona a̱ lima̱na̱ ta̱,

ɗanga waru a matsan ta̱ muwun,

ɗanga vu biri oɓolo na̱ a̱ɗuma̱ a̱ inabi

a ta a limatan babu usa̱n.

23 I yuwan ma̱za̱nga̱, a̱ɗu ama a̱ Sihiyona,

yuwain mere e ekere e ili i na A̱sulazuva a̱ A̱sula̱ a̱ ɗu a yuwaan nɗu,

na u ca yi iro'i yu ufaru,

waru u lyunguwa̱ ɗu na̱ mini ma̱ lyushi a mantsa ma na wuntsayi.

24 Osoroto a ta shiwan ni ishina,

a̱ba̱jini e nden a ta shiwan hali o oco,

na̱ masayan ma̱ inabi oɓolo na̱ mani'in ma̱ zetun.>>

25 <<N ta̱ ka̱mbuwa̱ ili i na apapari suru

a tamai a̱tsuma̱ a'wan nda,

ko apapari ɗa

ko akyun e keke'en

ko oɓolo akyun o ro ɗa,

ko akyun o ro a na a yuwusan agara a ɗa,

oɓolo a̱ba̱jini a̱ a̱soja a̱ va̱ na n lyunguwa̱a̱ nɗu.

26 Diga gogo i ta lyuwa hali i cuwa̱n,

reve i cuwa Aala A̱sulazuva A̱sula̱ a̱ ɗu,

za na yuwain linga va asalama adama a̱ ɗu.

Ama a̱ va̱ aa buwa a uwwa wono shi.

27 A̱ɗu Isra'ila i ta̱ gba reve a na n ri oɓolo a̱ ɗu,

waru i reve a na a̱mu A̱sulazuva A̱sula̱ a̱ ɗu a ɗa,

waru babu lo za ro.

Waru ama a̱ va̱ a buwa a uwwa wono shi. >>

28 <<Na̱ a̱yi ndolo koto,

n ta̱ tsuwa̱a̱n a ama a̱ va̱ Ruhu va̱ suru.

Olobo a̱ɗu ne esheli a̱ɗu a ta yuwan adanshi e ikaka ya̱ A̱sula̱,

mbara nɗu n ta yuwan alavu,

olobo ne esheli a̱ɗu e te ene alavu alavu.✝

29 Hali fo agbashi a̱ɗu ali na̱ a̱ma̱ci

n ta̱ tsuwa̱a̱n le Ruhu va̱ a rana ndolo.

30 N to roco ili ya asalama

zuva no o uvaɗi,

a ta yuwan mpasa na akina oɓolo na̱ a̱kutsu a̱ mikyon.

31 Kafu uta̱wu wa̱ a̱ba̱jini o urana u ndolo

u wovon wa̱ A̱sulazuva,

urana u to o'wo irumbu,

woto waru san tsa mpasa.✝

32 U ta̱ waru o'wo

za na suru ɗeyi a ala a̱ A̱sulazuva

adama e izami yi ikambishi a ta wawai.✝

Waru a̱tsuma̱ a Masasan ma̱ Sihiyona na̱ a̱tsuma̱ a̱ Urishelima

a̱ ta̱ tsura̱ iwawi,

cine a̱mu A̱sulazuva n dammai,

a̱tsuma̱ a aza a na a buwai,

a̱ ta̱ na aza a na a̱mu A̱sulazuva me ɗesu.>>