1 A̱sulazuva a damma ta̱,

<<A̱yi ɗa nda a̱tsuma̱ a rana nda na a mantsa ma nda,

n ta̱ ka̱mbuwa̱a̱ Yahuda na̱ Urishelima na aba'un e le.

2 N to ɓoloto nɗa suru,

a̱vu n ta̱wa̱to le o Uka̱ri wa Jehoshafa.

Uba̱ta̱ u ɗaɗa mee ge'eto le adama a ama a̱ va̱,

adama a na e bete'we ta̱ ama a̱ va̱ aza a Isra'ila diga a̱tsuma̱ e le

reve fo e ne'eshen iɗa i va̱.

3 Reve a zuwa agita adama a ama a̱ va̱

reve a kita'wa olobo o una̱ wa aashakala,

a wina esheli adama a masayan ma na oo sowo.>>

4 <<Gogo tsunda! Nye i ɗa i ri na̱ a̱yi a aci a̱ va̱, a̱ɗu ilyuci ya Taya na̱ Sidon oɓolo na̱ mulyuci ya Filistiya? I ta tsupusa mu adama e ili i na n yuwain? Ni i ta tsupusa mu, n ta̱ ka̱mbuwa̱a̱ ɗu atsupu a̱ɗu e ekere a̱ɗu babu usa̱n.✝ 5 Adama a na i pura̱ mu ta̱ azurufa na̱ zinariya, aza a na a̱ ri itana isa'ani i va̱ na i pura̱i a̱ tyo asula a̱ a̱'isa̱ a̱ɗu. 6 Reve waru i purisa̱ a ama a̱ va̱ aza a Yahuda na aza a Urishelima a̱vu i winaa a̱ a̱za̱ e Heleni tsa̱ra̱ a̱ 'ya̱wa̱to le alanga ni iɗa i le.>>

7 Reve A̱sulazuva a damma, <<Ka̱lyuwa̱i, n ta̱ ta̱wa̱to le diga uba̱ta̱ u na i wina nle, reve fo n yuwaan ɗu ili i na i yuwaan nle. 8 N ta wina olobo ne esheli a̱ɗu a̱ tyo e ekere a ama a Yahuda, reve e le gba a wina le a̱ tyo e ekere a ama a Sabeya, ɗe e iɗa ya alanga ya Arama. A̱sulazuva a ɗa a dammai ne.>>

9 Reve A̱sulazuva a dammisa,

<<Dammai ili i nda a̱tsuma̱ a nɗa:

I foɓo uvon!

'Ya̱sa̱in ali o uvon!

I zuwa a̱soja a rawa zuzu,

a dara adama o uvon.

10 I ka̱mba̱to a̱ba̱ri e iluma a̱ɗu o o'wo mutsun mu pe'eni,

mutsun wukoɗu we eten gba mbata.

Lyawa za babu ucira damma, <N ta̱ nu ucira!>✝

11 Ta̱wa̱i gogo gogo, a̱ɗu nɗa suru mu upasu suru,

i ɓoloto ɗe.

Vu zuwa a̱soja o uvon a̱ wu a̱ cipa̱, A̱sulazuva!

12 <<Lyawa nɗa n 'yon a̱ ka̱ra̱,

a̱ tyo o Uka̱ri wa̱ Jehoshafa,

adama a na ɗe ɗa ma̱a̱ da̱nu

tsa̱ra̱ n ge'eto nɗa suru upasu suru.

13 Nusu le yuwan ta̱ a̱bunda̱.

Vuta̱la̱i ugonu u ɗu, yipaɗa le

adama a na itana yu uɗuma̱ yi ina ta̱.

Ta̱wa̱i, i dadasa le cine i tsu dadasa umatsun u ina̱bi,

adama a na uba̱ta̱ u mokpoko u ina̱bi u shiwan ta̱,

hali na a̱ba̱jini a̱ba̱jini a ara'atsu a shiwain a̱ ri o moco adama a na iwuya i le i yuwan ta̱ a̱bunda̱ lon.>>✝

14 Oɓolo a̱ a̱bunda̱

a̱ ta̱ pe e ipiri o uka̱ri wu uge'etosu!

Adama a na urana wa̱ A̱sulazuva u yuwan ta̱ zuzu

o uka̱ri wu uge'etosu.

15 Urana na̱ woto aa ta yuwan irumbu,

italyo'o waru a buwa aa casu ekan shi.

16 A̱sulazuva a ta yuwan adanshi nu uɗyo u gbain diga Sihiyona,

reve u yuwan tsata diga Urishelima,✝

uvaɗi na̱ zuva e te je'en lipu.

Amma A̱sulazuva o to o'wo upa'atan wu ucira wa ama a̱ yi,

na aatsura waru adama a aza a Isra'ila.

17 <<Tsundolo tsa ɗa yee reve na a̱mu ɗa A̱sulazuva A̱sula̱ a̱ ɗu,

waru i ta̱ reve a na n ri nden a̱tsuma̱ a̱ Sihiyona,

aagaɗi a akiza a̱ va̱.

Urishelima ta̱ da̱na̱ na akiza,

babu waru omocin a na a̱a̱ da̱shi kuru pe.>>

18 <<O urana u ndolo

nsasan n to oco masayan ma sa'avu,

a̱vu agaɗi e yeneto maani,

reve ɗolu va Yahuda suru e yene na̱ mini.

Lyusu mini ta̱ yene

diga o U'wa wa̱ A̱sulazuva,

reve u ca Uka̱ri wa Akashiya mini.

19 Amma Masar to o'wo okongo,

Edom waru a̱tsumona a na a̱ ri ni ili shi,

adama e iwuya i na a yuwayin

ama a Yahuda,

adama a na o ocoi mpasa ma aza a babu unusu

a̱tsuma̱ e iɗa ya Yahuda.

20 Amma Yahuda gba to o'wo

uba̱ta̱ wu nden wa ama a̱ va̱ hali hali,

Urishelima waru ta̱ da̱na̱ lo diga a mantsa a̱ tyo a mantsa.

21 N ta tsupa unusu u wocosu wu mpasa wu za na ri nu unusu shi,

maa yuwan le gafura shi,

a̱mu A̱sulazuva n ta̱ da̱na̱ nden a̱tsuma̱ a̱ Sihiyona.>>