1 Apa nda adanshi a na A̱sulazuva a dammai Juwe ulobo wa̱ Petuwe.

2 Uwwai nda, a̱ɗu mbara,

poloi atsuvu a̱ɗu na i ri nden a̱tsuma̱ e iɗa!

Cu'un vi ili i nda i fara ta̱ ɗe

a rana ɗu ɗa?

Ko a rana vu nkaya n ɗu?

3 I damma muwun n ɗu adama a ɗa a̱yi,

waru lyawa muwun nɗu n damma muwun nle,

muwun, muwun n muwun n ɗu a damma

mantsa ma na ma̱a̱ ri a̱a̱ ta̱wa̱.

4 Ili i na oɓolo a apapari a tama a lyawai,

a̱vu akyun a gbagbain a̱ ta̱wa̱ a tama,

ili i na akyun a gbagbain a tama a lyawai,

a̱vu apapari e keke'en a̱ ta̱wa̱ a tama,

apapari e keke'en a tama a lyawai,

a̱vu o oɓolo a apapari o ro a̱ ta̱ ta̱wa̱ a tama.

5 'Yoyin a̱ɗu ososowi, a̱vu i shon!

Saalai, a̱ɗu na yoo sowuso masayan,

saalai adama a masayan ma sa'avu,

adama a na a usa yi ta̱ a̱ na̱ ɗu.

6 Adama a na iɗa i ro i riya̱a̱ ta̱ iɗa i va̱,

oɓolo a ɗa a na a̱ ri nu ucira lon,

a̱soja a̱ yi a̱ ri n kece shi.

Ucira wa anga apapari o ndolo a̱ ta̱ tsa za vu kamu,

tsa a kamu vu ka na ri o upan.✝

7 Oɓolo o ndolo a yuwan ta̱ ulungusu

wu uɗuma̱ wa aataci a̱ ina̱bi a̱ va̱,

a̱vu a̱ lungusa̱ ɗanga vu ubiri va̱,

a̱vu a̱ pucu'wan a̱vun a ɗanga'a,

a̱vu a̱ ka̱mba̱to eten e le a̱ ka̱mba̱ u'uri puka̱!

8 Shoyin mesun mo a̱tsumola̱ngu tsu usheli

u na ri wotowu na akashamuna a̱ a̱tsumola̱ngu

adama o ukwa̱ we eegeɓe a̱yi.

9 Babu kucci vi ishina ko kucci vi ili yo oso

a̱tsuma̱ o U'wa wa̱ A̱sula̱.

Nan ganu a ta yuwusan mesun ma̱ a̱tsumola̱ngu,

e le na a yuwusaan A̱sulazuva a̱ga̱nda̱.

10 Atsusa a̱ la̱nga̱ ta̱,

iɗa i ta̱ mesun tsa za va̱ a̱tsumola̱ngu,

adama a na a̱ lungusa̱ ta̱ ishina,

waru masayan ma sa'avu me 'yewe ta̱,

reve mani'in ma̱ zetun mo koto!

11 Yuwain a̱tsumola̱ngu a̱ɗu acimbi!

I saala, a̱ɗu a̱za̱ mokpoko mo umatsun inabi!

Saalai adama o oroci a yitabo oɓolo na̱ yitabo,

adama a na itana yu uɗuma̱ i la̱nga̱ ta̱.

12 A̱ɗuma̱ a̱ inabi e 'yewe ta̱ cece!

Ɗanga vu biri a kpanla ta̱ suru,

ne ɗa fo ɗanga na a̱ tsu ɗe ruma fo e 'yewei,

oɓolo na̱ da̱bina̱, oɓolo na̱ ɗanga muwun m peme,

ɗanga va atsusa na tsu matsan suru 'yewe ta̱,

na amayun ma̱za̱nga̱ mo koto ta̱ cece

diga e ekere a vaɗilima̱.

13 I oto akashamuna a̱ a̱tsumola̱ngu,

a̱ɗu nan ganu,

reve i saala,

a̱ɗu na yaa yuwusaan A̱sula̱ a̱ga̱nda̱ elime a masa'a.

Uwai a̱tsuma̱ A̱a̱'isa̱,

ya asa a̱tsuma̱ a akashamuna a̱tsumola̱ngu,

a̱ɗu na yaa yuwusaan A̱sula̱ a̱ va̱ a̱ga̱nda̱!

Adama a na babu kucci vi ishina na̱ kucci vi ili yo oso

a̱tsuma̱ o U'wa wa̱ A̱sula̱ a̱ɗu.

14 Lapai ulingi adama a na a yuwan akuli,

i yuwan ɗewu vi iɓolo ya akiza.

I ɓoloto mbara oɓolo na aza a na a̱ ri nden e iɗa'a

a uwa a̱tsuma̱ o U'wa wa̱ A̱sulazuva A̱sula̱ a̱ɗu,

adama e showen A̱sulazuva.

15 A̱tsuma̱lima̱ adama o urana u ndolo!

Adama a na urana wa̱ A̱sulazuva u yuwan ta̱ zuzu,

a̱tsuma̱lima̱ a ɗa diga uba̱ta̱ u Mogono me Ili Suru ma na ma̱ ri lo a̱ ta̱wa̱!✝

16 E esu a̱tsu a ɗa a̱ lungusa̱i ilyalya i tsu,

a̱tsuma̱ a̱tsu babu ma̱za̱nga̱ na̱ mere

o u'wa wa̱ A̱sula̱ a̱ tsu.

17 Icu'un yi ca̱'a̱n i shama ta̱ e iɗa

babu itana a̱tsuma̱ mpon,

mpon waru fo o ɓoso ta̱,

adama a na ishina i 'yewe ta̱ a nan.

18 O'o n ne'en cine inama i ri yaa yisaali.

Oɓolo e inan a̱ ra̱pula̱ ta̱

adama a na a̱ ri na anlya a na a yuwan alyuna shi.

Waru oɓolo e ikyon na̱ mgbele

a ta uwwusa a̱tsuma̱lima̱.

19 A̱sulazuva ya̱'a̱ wu ɗa n ri ya̱a̱ mesun!

Adama a na akina a̱ kula̱to ta̱ anlya alyuna

elentsu a akina a̱ kula̱to ta̱ ɗanga va atsusa suru.

20 Ko inama yu una fo

a ta yuwusan mesun a̱ tyo ya̱'a̱ wu,

adama a na ɗolu 'yewe ta̱ cece,

waru akina a̱ kula̱to ta̱ uba̱ta̱ wa alyuna.