1 A̱ɗu aza a Isra'ila,

ka̱mba̱i, uba̱ta̱ wa̱ A̱sulazuva A̱sula̱ a̱ ɗu.

I riya̱ ta̱ adama a̱ nusu ɗu.

2 I ka̱mba̱ uba̱ta̱ wa̱ A̱sulazuva na adanshi

i damma yi, <<Vu yuwaan tsu gafura vu nusu suru,

vu ushi tsu ne ekere e re,

reve a̱tsu na aciya̱tsu tsu cuwa wu na̱ na̱ tsu,

o una̱ u kucci vo ogono e inan.

3 Asuriya aa gura wawa tsu shi,

tsaa gura kumba e ido shi,

tsaa gura da̱shi damma ili i na ekere a̱ tsu a yuwain, <Musula̱ n tsu> shi,

adama a na e ekere a̱ wu a ɗa

mkpa'an n tsu tsura̱ isa'ani.>>

4 Reve A̱sulazuva a damma,

<<Ucina̱ u na a̱ shi a vadala na̱ mu,

n ta yuwan le gafura

reve n ciga le na amayun,

adama a na upan u va̱ u von ta̱ aci e le.

5 N to o'wo tsa a'iza uba̱ta̱ wa aza a Isra'ila.

Ɗaɗa woo ɓoso tsa̱ yipa̱lu yu una.

U ta yuwan aralu

tsu uɗanga u Lebanon,

6 ototopi a̱ yi a ta kungwa.

Ulobonu wa̱ yi u to o'wo tsu uɗanga u zetun,

ma̱guru ma̱ yi waru tsu uɗanga u Lebanon.

7 Ama a̱ ta̱ da̱shi da̱nu a̱ lulu va̱ yi.

U ta bala tsi ishina.

U to ɓoso tsa ataci,

ala a̱ yi o to o'wo tsa masayan ma̱ Lebanon.

8 A̱vu Ifiramu, nye ma̱a̱ da̱shi yuwan na̱ a̱ma̱li?

N ta̱ usu yi reve n ka̱lyuwa̱ yi.

N ta̱ tsu uɗanga u na u ri na̱ a̱vu'un a̱lima̱ kuci.

Utsuru u limatan wa̱ wu uba̱ta̱ u va̱ u ɗa wu uta̱i.>>

9 Zane ɗa ri nu ugbozu? U te reve ili i nda.

Zane ɗa ri nu urevu wi ili? U ta̱ tsura̱ urevu wi ili i nda.

Re va̱ A̱sulazuva ta̱ mejege,

za va̱ a̱ɓula̱ tsu kuru ta̱ a̱tsuma̱ e le.

Amma aza a na a̱ tsu 'ya̱susa̱n a aci a̱ tsu ta̱ɗa̱tsa̱ ta̱ a̱tsuma̱ e le.