1 Uwwa yi adanshi a̱ A̱sulazuva,

a̱ɗu aza a Isra'ila,

A̱sulazuva a̱ ta̱ a̱ nla̱ngi na aza a na a̱ ri na̱ nden e iɗa'a,

<<Babu mejege babu icigi,

waru babu urevu wa̱ A̱sula̱ e iɗa'a.

2 She misululai kuci, epen a ɗa nda oɓolo na̱ munulai,

na̱ wivu na̱ tsipere, nu urocosu u mala'a mo ucira,

na̱ wocosu wu mpasa mantsa suru.

3 Adama o ndolo a ɗa iɗa i 'yewei,

ili i na i ri pe waru a̱ kuwusa̱.

Inama yu una suru oɓolo na̱ nnunu,

na̱ mugula n na n ri pe a̱tsuma̱ a mala a̱ ta̱ ma̱kuwa̱.>>

4 A̱vu A̱sulazuva a damma,

<<She za tawaa nan za wan,

ko i tawaa vuma ro na addama wan,

adama a na na̱ nan ganu ɗa

n ri a̱ nla̱ngi goon.

5 Adama o ndolo n to foro nan ganu ayin nu urana,

ama̱sula̱ fo a̱ ta̱ riya̱ oɓolo na̱ a̱ɗu.

Adama o ndolo n to kototo Isra'ila mma ɗu.

6 O kototo ta̱ ama a̱ va̱ adama o ulambu wu urevu.

Adama a na i 'yuwain urevu,

n 'yuwan ɗu ta̱ yo o'wo nan ganu a̱ va̱.

Adama a na waru yi icinai na̱ wila̱ wa̱ A̱sula̱ a̱ ɗu,

a̱mu fo n te icina na̱ muwun n ɗu.

7 Agba a̱ yi ɗa nda a mantsa ma na nan ganu a̱a̱ da̱shishi a̱bunda̱,

ne ɗa fo mayan mo unusu a̱a̱ da̱shishi a̱bunda̱.

N ta̱ gba a vadala tsugbain tse ele wo o'wo ili i wono.

8 A̱tsuma̱ o unusu wa ama a̱ va̱ a ɗa a lyuwusa,

waru a̱ to utsa̱n a̱tsuma̱ e iwuya i le.

9 Cine ama a̱ ri, ne ɗa nan ganu a̱ ri.

N ta ca le a̱tsuma̱lima̱ adama e re le,

a̱vu waru n tsupa le adama a linga le.

10 A ta lyuwa agba a̱a̱ cuwa̱n shi,

a yuwan tsushakala waru a̱a̱ da̱shi a̱bunda̱ shi.

Adama a na a lyawai A̱sulazuva

o toniyi musula̱ n ro.>>

11 Reve A̱sulazuva a damma,

<<Tsushakala na̱ masayan ma sa'avu,

na akuci a masayan

a ta tawusa ugbozu wa ama a̱ va̱.

12 A tsu zami ta̱ urevu uba̱ta̱ wa̱ a̱ma̱li a na a yuwain na̱ ɗanga,

a yuwusan majiyan aɗanga a mmalu e le a̱ ta̱ usu le.

Ruhu tsushakala rono le ta̱ a̱ tyo o ure u vama,

reve a lyawa A̱sula̱ e le e teme tsushakala.

13 Reve a ca kucci ɗe zuva vu nsasan.

Reve a̱ kula̱to kucci vu ukula̱tosu a agaɗi,

waru za̱la̱ vu ɗanga vo Oku oɓolo na̱ ɗanga gbain,

adama a na lulu le tu uyo'o.

Adama o ndolo a ɗa esheli a̱ ɗu a yuwain tsushakala

a̱vu ejene a̱ ɗu a̱ ka̱ra̱ a yuwusan tsipere.

14 Maa ca esheli a̱ ɗu a̱tsuma̱lima̱

na a yuwusan tsushakala shi,

ko ejene a̱ ɗu

na a yuwusan tsipere shi,

adama a na a̱ɗu ali fo i ta yuwusan ne.

Waru i to vosun na aashakala a̱ a̱'isa̱,

waru i to tonishi aashakala o ro a alanga.

Za na 'yuwain a zuwa atsuvu o to kototo yi suru.

15 <<Ko na yaa yuwusan tsushakala,

a̱ɗu aza a Isra'ila,

she yo oto pe Yahuda wan.

She i 'ya̱wa̱ Gilga wan,

she i 'ya̱wa̱ Bet Aven wan.

She i kucina, <Na̱ A̱sulazuva a na a̱ ri wuma wan!>

16 Aza a Isra'ila a̱ ta̱ na aciyogbamu,

cine vu revei a̱na̱wun a nan.

Cine tsa ɗa A̱sulazuva a lyuwato le

tsa mokyokyon

a̱tsuma̱ a̱ a̱ba̱jini o uba̱ta̱ wa alyuna?

17 Ifiramu ɓolo ta̱ na̱ musula̱,

lyawa niyi!

18 A mantsa ma na o kotoi yisowishi i le,

a̱vu a uwa elime na̱ tsushakala babu uro.

Azagbain e le a la'a ta̱ ciga ili i wono

ula'awu na̱ tsugbain.

19 Lipa̱ ta̱ pura̱ le a̱ ka̱ra̱,

a̱vu kucci le o o'wo le ili i wono.>>