1 Ana Ifiramu yuwain adanshi, ama e je'en ta̱ lipu,

a ca yi ta̱ tsugbain a̱tsuma̱ a Isra'ila.

Amma u yuwan ta̱ unusu a yuwusaan Ba'al a̱ga̱nda̱ reve u kuwa̱.

2 Gogo a ta lyuwusa elime nu unusu,

a yuwusaan aciyele a̱ma̱li na̱ azurufa le,

uruma u sa'ani,

suru nle ulinga u maruma u ɗa.

A yuwan ta̱ adanshi adama a ama a nda:

<<A ca ta̱ kucci vu vaɗilima̱

reve a katala yi.>>

3 Adama o ndolo o to o'wo tsa a'iza o usana,

tsa a'iza o usana a na a̱ tsu puwa̱n.

O to o'wo cine vu revei owopo a na upepu u tsu pura̱ a mantsa mo uyeluwu,

cine waru vu revei mikyon n tsu uta̱ o usowoto wu upepu.

4 Reve A̱sulazuva a damma,

<<A̱mu ɗa A̱sulazuva A̱sula̱ a̱ a̱ɗu,

a mantsa ma na i da̱na̱i a̱tsuma̱ a Masar,

i reve A̱sula̱ o ro shi, she a̱mu goon,

babu na̱ a̱mu, babu Za vi Iwawi i ro.

5 A̱mu ɗa n ka̱lyuwusa̱ nɗu a̱tsumona,

e iɗa yu u'yewu.✝

6 Ana n lyuwato le, a̱ cuwa̱n ta̱.

Ana a̱ cuwa̱in, reve a̱ 'ya̱sa̱n avangaci,

a̱vu e icina na̱ a̱mu.

7 Adama o ndolo n ta̱ ta̱wa̱ le tsa kamu,

tsu uta̱su u ɗa ma̱a̱ piri le o ure.

8 N ta̱ riya̱a̱ le tsa biya na a usai muwun,

n ta̱ riya̱a̱ le a̱vu mu ɓatsa nka̱ka̱n n le.

Cine vu revei kamu ɗa maa tama le.

Cine vu revei nama vu una ɗa maa kara le mukari mukari.>>

9 <<O kototo ɗu ta̱, aza a Isra'ila,

adama a na i ta̱ a̱ nla̱ngi na̱ a̱mu, i ta̱ a̱ nla̱ngi na̱ za na aa kambusa ɗu.

10 Te ɗa mogono ma̱ wu, ma na maa wawa wu?

Te ɗa azagbain e ilyuci i ɗu suru,

aza a na i dammai,

<Ca numu mogono na azagbain>?✝

11 N ca ɗu ta̱ mogono a̱tsuma̱ o upan u va̱,

reve n tara yi o upan wu usuɗuwu u va̱.>>✝

12 <<Unusu wa Ifiramu u tu uzuwu,

nusu va̱ yi tu uɗanu.

13 Mɓa̱la̱ mu ka limatan n ta̱wa̱ ta̱ ya̱'a̱ yi,

agba a̱yi mawun ma ɗa babu ugbozu.

Ana mantsa ma rawai,

u 'yuwan ta̱ a na aa matsan yi.

14 N ta wawa le diga o ucira wu uba̱ta̱ wa̱ a̱kwa̱kwa̱,

n ta wawa le diga o ukwa̱.

Ukwa̱ te ɗa mɓa̱la̱ ma̱ wu?

Te ɗa, ucira wa̱ wu uba̱ta̱ wa̱ a̱kwa̱kwa̱?

<Mee ene iliyali ya̱ wu shi,>✝

15 ko na u balai a̱tsuma̱ a ama a̱ yi,

upepu wa asana wa̱ A̱sulazuva u ta̱ ta̱wa̱,

a lapusa diga a̱tsumona.

Reve esu a̱ mini a̱ yi e 'yewe,

reve waru oko'o e 'yewe.

A̱ ta̱ pura̱ itana i sa'ani

i mopon me izuwa ya̱ yi suru.

16 Ama a Samariya a ta tanu unusu u le,

adama a na a yuwayin A̱sula̱ e le aciyogbamu.

A̱ to una le na̱ matsun me pe'eni.

A ta gasa muwun n le mupaɗi mupaɗi,

a̱ma̱ci a̱a̱tsuma̱ e le waru a̱ ta̱ ɗa̱ra̱ le.>>