1 <<Vu ɗe a̱za̱ a̱ wu olobo, <A̱ɗu ama a̱ va̱* ɗa,> a̱za̱ a̱ wu esheli waru vu ɗe le, <Aza a na a̱ tsura̱i iliyali.> >>

2 <<I ɓara mma ɗu,

i ɓara yi,

adama a na ka va̱ ɗa u ri shi,

a̱mu waru vali va̱ yi ɗa n ri shi.

Pati niyi u lyawa wutu tsa aashakala,

waru wu kasa na aza na oo kpukpokuso yi maani.

3 Na ne ɗa shi, n ta̱ ba̱ɗa̱ yi

n lyawa yi ataɓu cine u da̱na̱i o urana u na a matsan niyi.

N ka̱mba̱to yi tsa̱ a̱tsumona,

tsi iɗa yu u'yewu,

a̱vu mu una yi na akuli.

4 Mee ene iliyali i muwun ma̱ yi shi,

na wo o'woi ele a̱za̱ a̱ va̱ ɗa shi,

muwun n tsipere n ɗa.

5 Adama a na mma le gura guza̱ aciya̱yi shi,

ɗaɗa u matsan nle a̱tsuma̱ o wono.

Adama a na u damma ta̱, <N to toni aza a na a ciga numu,

adama a na a ca mu ta̱ malyuwa na̱ mosowoo,

na̱ a̱punda̱ o uzula̱ no okoro a sa'ani,

oɓolo na̱ mani'in ma̱ zetun na̱ masayan ma̱ inabi.> >>

6 <<Adama o ndolo,

n ta̱ ka̱nda̱ruwa̱ Isra'ila nu ukari wa awanda.

A̱mu n ta̱ titiga̱ re va̱ yi,

adama u puwa̱n u lamba ure u na wo toni.

7 U to toni aza a na o voyin na̱ yi,

agba waa cina le shi.

U ta zami le,

agba wa̱a̱ tsura̱ le shi.

Ɗaɗa waa damma,

<N ta̱ ka̱mba̱ uba̱ta̱ u vali vu ufaru u va̱,

adama a na nden mu ufaru n la'a ta̱ za na maa yuwusan gogo!> >>

8 Koto u reve a na

a̱mu ɗa n shi acasu yi ishina'a shi,

na̱ masayan ma̱ ina̱bi na̱ mani'in ma̱ zetun,

za na ca niyi zinariya oɓolo na̱ azurufa pere,

na a yuwain ulinga ne ele a̱ zuɗa̱i Ba'al shi.

9 Reve A̱sulazuva a damma,

<<Adama o ndolo n ta̱ ushi ishina i va̱

a mantsa ma na u rawai ugasa,

oɓolo na̱ masayan ma̱ ina̱bi ma̱ va̱ mantsa ma na u yuwain.

N ta̱ ushi a̱punda̱ a̱ va̱ oɓolo no okoro a sa'ani a̱ va̱ a na n ca niyi

na wa̱ zula̱ tsura̱ wu pala ataɓu a̱ yi.

10 To, gogo tsunda n ta lyawa yi ataɓu a alanga e eteshe,

a̱ ma̱ka̱ka̱n ma aza a na o voyin na̱ yi.

Agba babu za na aa wawa yi e ekere a̱ va̱.

11 N te isawaton a̱buki a̱ yi suru,

a̱buki a aa'wan,

oɓolo na̱ a̱buki o Woto u Sa'avu, na̱ rana va Ashibi,

na̱ a̱buki a na u zuwai suru.

12 N to una a̱ɗuma̱ a̱ ina̱bi a̱ yi,

oɓolo na̱ ɗanga vu biri va̱ yi, aza a na u dammai,

<Ele nda e le ɗa ili i na n tsura̱i

uba̱ta̱ wa aza a na o voyin na̱ mu na a ca numu.>

N ta̱ ka̱mba̱to a̱ɗuma̱ a̱ ina̱bi e le atsusa,

na inama yu una ya tama.

13 N ta ca yi a̱tsuma̱lima̱

adama a rana na u kula̱toi kucci vi ili i ma̱guru a̱ tyo ya Ba'al.

U yuwaan ta̱ aciya̱yi yisukumishi oɓolo na̱ nkawani n zinariya,

u toni aza a na o voyin na̱ yi.

A̱vu wi icina na̱ mu.>>

14 <<Adama o ndolo, uwwai nda, n ta kpara yi.

A̱vu n tara yi a̱ tyo a̱ a̱tsumona,

a̱vu n yuwaan yi adanshi ben.

15 Ɗe ɗa ma̱a̱ ka̱mbuwa̱a̱ yi na̱ a̱ɗuma̱ a̱ inabi a̱ yi.

A̱vu n ka̱mba̱to Uka̱ri wa Ako una̱ntsu u mazuwa mo okolo.

Ɗe ɗa wa̱ usu mu

cine u da̱na̱i a mawun,

a mantsa ma na wu uta̱i e iɗa ya Masar.✝

16 A̱sulazuva a damma ta̱,

o urana u ndolo, vu ta̱ ɗe mu <Vali va̱,>

Va̱a̱ da̱shi ɗe mu na aala <Ba'al* va̱ shi.>

17 Adama a na n ta tawa aala a Ba'al

o una̱ wa̱ yi.

A buwa waru a̱ da̱shi cuwan na ala e le shi.

18 O urana u ndolo n ta yuwaan le nzuwulai

ni inama yu una oɓolo na̱ nnunu,

ni ili yi ika̱ta̱pu

adama ama a̱ va̱ a yuwan nden n lafiya nle.

N ta tawa utan oɓolo na̱ matsun me pe'eni

nu uvon e iɗa'a,

tsa̱ra̱ i da̱nu gbaga.>>

19 <<N ta zuwa wu vo o'wo ka va̱ hali hali.

N ta̱ olo wu a̱tsuma̱ a amayun na̱ a̱ɓula̱,

n roco wu icigi i na i tsu vadala shi

waru n roco wu iliyali.

20 N ta yuwan lolo na̱ a̱vu a̱tsuma̱ a amayun,

waru vu ta̱ reve na a̱mu ɗa A̱sulazuva.>>

21 A̱sulazuva a damma ta̱,

<<O urana u ndolo n ta̱ usu.

A̱mu n ta̱ usuwa̱ zuva va zuva,

a̱vu e le a̱ usuwa̱ uvaɗi.

22 Uvaɗi gba u ta̱ usu ni ishina, oɓolo na̱ masayan ma̱ ina̱bi na̱ mani'in ma̱ zetun, a̱vu a̱ usu Yezireyel.*

23 N ta̱ shuwa̱ ama a̱ va̱ e iɗa'a adama a aciya̱va̱.

N to roco iliyali i va̱ a̱ tyo uba̱ta̱ wu za na n rocoyi iliyali shi,

n ta damma aza a na n ɗeyi, <Ama a̱ va̱ shi,> <A̱ɗu ɗa ama a̱ va̱!>

A̱vu e le a damma,<A̱vu ɗa A̱sula̱ a̱ tsu!> >>✝