1 Reve A̱sulazuva a damma,

<<Yu uwwa ili i nda, a̱ɗu nan ganu!

I zuwa atsuvu, a̱ɗu aza a Isra'ila!

I zuwa atsuvu a̱ɗu a̱za̱ o u'wa u tsugono!

Uge'etosu u nda a aci a̱ ɗu a ɗa u ri.

Yo o'wo ta̱ maza ɗe a Mizfa,

i baza ta̱ igolo ɗe a Tabo.

2 I ka̱pa̱a̱ le ta̱ a̱a̱ka̱ri a̱ a̱ru'un ɗe Shitim,

n ta ca le oforo suru.

3 N reve ta̱ ili suru a aci a Ifiramu,

Isra'ila waru ri usokowu e ekere a̱ va̱ shi.

Ifiramu ka̱mba̱ ta̱ a yuwusan tsushakala gogo.

Isra'ila o'wo ta̱ idaba.

4 <<Linga le lyawa le

a̱ ka̱mba̱ uba̱ta̱ wa̱ A̱sula̱ e le shi.

Adama a na ruhu tsushakala to o okolo e le,

e reve A̱sulazuva shi.

5 Ugbawu wa aza a Isra'ila

wi isawan ta̱ a̱ ma̱ka̱ka̱n me le.

Aza a Isra'ila oɓolo na aza a Ifiramu a̱ ta̱ riya̱ a̱tsuma̱ o unusu u le,

Yahuda fo ta̱ riya̱ oɓolo ne e le.

6 Oɓolo ni inan i le ni ikyon i le

a̱ ta̱ 'ya̱wa̱ a zami A̱sulazuva,

agba a̱a̱ tsura̱ yi shi,

adama a na u lyawa le ta̱.

7 A yuwaan A̱sulazuva a̱ɓula̱ shi,

a̱vu a matsan mugirutu.

Gogo tsunda a̱buki o Woto u Sa'avu

u to kototo le oɓolo ni iɗa i le.>>

8 <<Yi ivula̱ avana a̱tsuma̱ a Gibiya!

Abulu a̱tsuma̱ a Rama!

I yuwan yisaali yu uvon a̱tsuma̱ a Bet Aven,

tsu to toni wu, Banyami!

9 Ifiramu to o'wo ofoli

o urana u na aa ca yi a̱tsuma̱lima̱.

A̱tsuma̱ o ugundo wa aza a Isra'ila,

n ta zuwa e reve ili i na yo o'wo amayun.

10 Azagbain a Yahuda o o'wo ta̱

cine vu revei aza a na a tsu vadala utyo wi iɗa.

N ta tsuwa̱a̱n le upan u va̱

cine vu revei mini.

11 O ɓongi ta̱ Ifiramu,

a̱vu a̱ rutsa̱ le o uge'etosu,

adama a na u ɗangwai u wala na̱ a̱ma̱li.

12 Amma n to o'wo cine vu revei mafawi uba̱ta̱ wa̱ Ifiramu,

waru cine vu revei ashami uba̱ta̱ wa Yahuda.>>

13 <<Na̱ Ifiramu e ene ubanakun wa̱ yi,

a̱vu Yahuda ene antsu a̱ yi,

a̱vu Ifiramu ka̱mba̱ Asuriya izami yi ikambishi,

a̱vu u lyungu azagbain uba̱ta̱ u mogono ma gbain.

Agba waa gura ka̱mba̱to ɗu gbaga shi

ko u yuwaan ɗu opocino a antsu a̱ ɗu shi.

14 N to o'wo cine vu revei kamu uba̱ta̱ wa̱ Ifiramu,

cine vu revei makamu uba̱ta̱ u tsugono tsa Yahuda.

N ta kara le mukari mukari a̱vu n yuwan mmalu n va̱.

N ta yuwan uka̱ru u va̱,

waru babu vuma na aa gura wawa le.

15 N ta̱ ka̱mba̱ uba̱ta̱ u va̱

she mantsa ma na a vadalai o unusu u le,

na a zami urewesu u va̱.

A̱tsuma̱ a̱ a̱tsuma̱lima̱ e le

a ta zami mu no okolo e le suru.>>