1 Reve A̱sulazuva a damma,

<<Yi ivula̱ avana!

Tsa̱ a̱a̱kuru,

ma'yuwatan ma̱ cipa̱ ta̱ a aci a ama a̱ A̱sulazuva

adama a na ama a kuɗa ta̱ akucunu

reve a yuwaan wila̱ u va̱ aciyogbamu.

2 Isra'ila showen mu ta̱,

<A̱sula̱ a̱ tsu, tsu reve wu ta̱!>

3 Agba aza a Isra'ila a 'yuwan ta̱ ili i sa'ani,

ma'yuwatan gba ma ta saɓa le.

4 <<A̱ shuwa̱ ta̱ ngono babu a̱mu urevu,

reve a ɗangula azagbain babu na a̱mu n usuyi.

A yuwan ta̱ musula̱ na̱ zinariya oɓolo na̱ azurufa le

o foɓusoo aciyele ulungusu.

5 A̱vu Samariya! I vari ma̱dindim n ɗu n na i zuɗa̱i,

upan u va̱ u ta̱ ma̱puna̱ a aci e le.

Mantsa ma̱ ne ma ɗa yaa lyawa ulinga wa̱ a̱ma̱li?

6 A̱yi ma̱dindim'm diga Isra'ila ɗa!

Za vu ushe'en u ɗa yuwan niyi,

A̱sula̱ a ɗa shi!

A̱ ta̱ gba o ɓoso

a̱ma̱li a̱ ma̱dindim ma Samariya'a miri miri.>>

7 <<Adama a na ili i na i cu'wa̱in,

a̱ yi ɗa yaa gasa.

Akunku e ishina a na a̱ ri mishin a̱ ri na̱ a̱ga̱za̱ shi,

adama o ndolo a̱a̱ tsura̱ yira shi.

Ko na̱ u shi u matsan,

omocin a ɗa oo soɗu yi.

8 O soɗu ta̱ Isra'ila.

Gogo a̱ ta̱ pe a̱tsuma̱ a nɗa

she damma akarapalu a na a̱ ri nu ulinga shi.

9 Adama a na a̱ ka̱ra̱ ta̱ a̱ tyo Asuriya,

cine vu revei mololi mo una a agara a̱ nde'en.

Ifiramu tsulaa ta̱ aciya̱yi a za a na a yuwan tsipere.

10 Ko na u tsulayi aciya̱yi nɗa,

gogo n to ɓoloto le uba̱ta̱ u ta̱.

A̱ ta̱ da̱na̱ a̱ mingira̱sa̱ a̱tsuma̱ a̱ a̱tsuma̱lima̱

za̱la̱ vi iɓongi i mogono ma gbain.>>

11 <<Ko na wo o'woi Ifiramu

yuwan ta̱ musa'a na̱ a̱bunda̱

adama a mayan mo unusu,

wo o'wo yi ta̱ musa'a mo unusu.

12 N ɗanaa le ta̱ ili ya̱ a̱bunda̱ i wila̱ u va̱,

agba a tara le ta̱ tsi ili i sa'avu.

13 A ta casu kucci tsu une'e a̱ tyo ya̱'a̱ va̱,

adama a tama inama'a,

agba a̱mu A̱sulazuva ma uwwusa uyo'o u le shi.

To, gogo n ta cuwan ni iwuya i le,

reve n ca le a̱tsuma̱lima̱ adama a̱ nusu le.

A̱ ta̱ ka̱mba̱ Masar.

14 Isra'ila icina ta̱ za na yuwan niyi.

A̱vu u suwa a̱ba̱jini a̱ba̱jini o kobu.

Reve fo Yahuza suwaa

ilyuci'i ɓaɓu vu ucira va̱ a̱bunda̱.

Adama o ndolo n ta̱ lyungu akina a aci e ilyuci'i,

reve u kula̱to ba̱ta̱ vu ucira'a.>>