1 Reve A̱sulazuva a damma,

<<Ifiramu ta guɓusa upepu,

u to tono upepu wa asana urana ma̱ɓula̱

waru a̱ da̱shishi epen nu u'ya̱susa̱n wu ugbozu.

A yuwan ta̱ nzuwulai na aza a Asuriya,

reve a tanu mani'in ma̱ zetun a̱ tyo Masar.

2 A̱sulazuva a̱ ta̱wa̱ ta̱ na adanshi a aci a Yahuda.

U ta ca Yakubu a̱tsuma̱lima̱ adama e ili i na u yuwain,

reve waru u tsupa yi adama a linga va̱ yi.

3 Pe a̱ a̱a̱tsuma̱ u reme ta̱ a̱civa̱ a za va̱ yi.✝

Ana u rawai vali reve u yuwan mpolo na̱ A̱sula̱.✝

4 U yuwan ta̱ mpolo na̱ malingata ma̱ A̱sula̱ a̱vu u lyuwa aci a̱ yi.

U shon ta̱ a̱vu u pati isa'ani ya̱ yi.

U cina ta̱ A̱sula̱ ɗe Betel,

ɗe ɗa u yuwain adanshi na̱ yi.✝

5 A̱sulazuva, A̱sula̱ o oɓolo a̱ a̱soja a zuva,

A̱sulazuva a ɗa ala a na a̱ ri n cuwusan na̱ a̱yi!

6 Vu ciga vu 'yuwan vu ka̱mba̱ uba̱ta̱ wa̱ A̱sula̱.

Vu ɓa̱na̱ icigi na̱ a̱ɓula̱,

reve vu purosu A̱sula̱ a̱ wu kuci.>>

7 Reve A̱sulazuva a damma,

<<Aza a atsulu na awina a tsu yuwan ta̱ ulinga ni ili ya akunda a babu ulobonu,

a ciga ta̱ yipalishi.

8 Ifiramu damma ta̱,

<N ta̱ nu utsuru wa̱ a̱bunda̱, n tsura̱ ta̱ ikebe.

Nu utsuru u va̱ suru

a̱a̱ tsura̱ mu ni iwuya ko unusu shi.> >>

9 <<A̱mu ɗa A̱sulazuva A̱sula̱ a̱ ɗu,

za na uta̱a̱ nɗu e iɗa ya Masar.

N ta zuwa i da̱nu waru a̱tsuma̱ o ogodo a̱ ɗu,

cine a yuwusain a mantsa ma̱ a̱buki a na n zuwai.

10 N yuwan ta̱ adanshi na ama̱sula̱,

n roco le ta̱ alavu alavu a̱ a̱bunda̱

reve n yuwaan le adanshi ni iroci o una̱ wa ama̱sula̱.>>

11 <<Giliyadu ta̱ na ahali a awuya?

Ama a̱ yi a̱ ri na̱ a̱ɓula̱ shi!

A ta casu kucci vi inan ɗe Gilga?

Musa'a n le n to o'wo cine vu revei oɓolo a atali

e iɗa i na a lumai.>>

12 Yakubu suma ta̱ a̱ tyo e iɗa ya Suriya.

Yakubu linga ta̱ adama u tsura̱ ka,

waru adama u tsupa adama a̱ yi,

u guɓusa ta̱ ikyon.✝

13 A̱sulazuva a yuwan ta̱ ulinga na̱ vumava̱sula̱ u ta̱wa̱to Isra'ila diga Masar,

na̱ vumava̱sula̱ ɗa u ka̱lyuwusa̱ niyi.

14 Ifiramu zuwa ta̱ A̱sulazuva a yuwan upan lon.

A̱sulazuva a̱ yi a ta yuwaan yi

cine u yuwain adama o unusu wa̱ yi u wocosu wu mpasa

na adama e ili i wono i na u yuwain.