1 Isra'ila da̱na̱ ta̱ tsa ataci a na a balasa,

u matsan ta̱ muwun adama a aciya̱yi.

Muwun ma̱ yi a balasa,

a̱yi a̱ da̱shi suwusa musa'a.

Cine iɗa ya̱ yi yaa lyuwusa elime,

ne ɗa atsura a na waa yuwusaan a̱ga̱nda̱ aa lyuwusa elime.

2 Okolo e le a̱za̱ e ikpa'a a ɗa,

gogo a ciga a 'yuwan a̱ ushi akunda o unusu u le.

A̱sulazuva a̱ ta̱ rukutsa̱ musa'a n le

reve u lungusa̱ atsura a na a yuwusaan a̱ga̱nda̱.

3 Ɗaɗa aa damma, <<Tsu ri na̱ mogono shi,

adama a na tsu ri o wovon wa̱ A̱sulazuva shi.

Agba ko na̱ tsu shi na̱ mogono,

nye i ɗa waa yuwaan tsu?>>

4 A yuwan ta̱ nzuwulai ma̱ a̱bunda̱,

a yuwan akucunu e epen

a̱vu a̱ usula̱i.

A̱vu uge'etosu wu uta̱

cine vu revei anlya a na a̱ ri na̱ tsukono a atsusa a cimba.

5 Ama a na a̱ ri nden a̱tsuma̱ a Samariya a uwwa ta̱ wovon

adama o uzuɗu u ma̱dindim ma̱ a̱ma̱li ma Bet Aven.

Ama a̱ yi a̱ ta̱ showen yi.

Ne ɗa fo nan ganu a̱ a̱ga̱nda̱ a̱ a̱ma̱li,

adama a na tsugbain tsa̱ a̱ma̱li'i wu kasa ta̱ ne le.

6 A ta tara yi a̱ tyo Asuriya

tsu une'e uba̱ta̱ u mogono ma gbain.

A ta zuwa Ifiramu o wono,

a̱vu Isra'ila uwwa wono adama a̱ a̱ma̱li a̱ yi.

7 Samariya na̱ mogono ma̱ yi mo to koto

cine vu revei mini ma̱ tsu pura̱ maɗanga.

8 A̱ ta̱ lungusa̱ ba̱ta̱ va̱ a̱ga̱nda̱ e iwuya ya agaɗi,

a̱yi ɗa unusu wa Isra'ila.

Awanda oɓolo ne ma̱lyo a ta kungwa

reve a pala musa'a n le.

Reve a damma nsasan n le, <<Pala ntsu!>>

Reve a damma agaɗi, <<Riya̱a̱ ntsu!>>✝

9 Reve A̱sulazuva a damma,

<<Diga a mantsa ma Gibiya, i yuwan ta̱ unusu, a̱ɗu aza a Isra'ila,

reve i lyuwa elime.

Uvon u lyuwa a aci

aza a na a yuwusan iwuya a̱tsuma̱ a Gibiya shi?✝

10 A mantsa ma na n cigai, n ta ca le oforo.

Nɗa n to ɓoloto a yuwan uvon ne e le

reve a zuwa le wunlu adama a̱ nusu va̱ a̱bunda̱ e le.>>

11 <<Ifiramu a̱na̱wun a nan a ɗa

na a yuwain aguta za na a uwwusa uyo'o wo osoroto,

gogo n zuwaa ta̱ yinlu i sa'ani ya Isra'ila

a̱gba̱la̱ o ume.

N ta̱ gba̱ra̱ Ifiramu.

Yahuda ciga u 'yuwan u luma,

Yakubu ciga u 'yuwan wu ɓoso iɗa adama a aciya̱yi.

12 I cu'wa̱a̱n aciya̱ɗu a̱ɓula̱,

a̱vu i gasa amayun a na a̱ ri n koto shi,

a̱vu yi ɓoso iɗa i na koto a lumai shi.

Adama a na mantsa ma na yaa zami A̱sulazuva a ɗa,

adama u ta̱wa̱

u ro'oo ɗu a̱ɓula̱.

13 Amma i cu'wa̱n ta̱ iwuya,

a̱vu i gasa ulambu wa̱ a̱ɓula̱,

i lyuwa ta̱ muwun me epen.

Adama a na yi isawain o ucira wa aciya̱ɗu

na̱ a̱soja o ukpakukupa ukpaku u ɗu,

14 mesun mo uvon ma̱ ta̱ 'yon a̱tsuma̱ a ama a̱ ɗu.

Reve ba̱ta̱ vu ucira ɗu a̱ ra̱mo suru,

cine Shalman ra̱moyi Bet Abel o urana wu uvon,

a na a kpasu'wai nan mma oɓolo na̱ muwun n le.

15 Tsundolo tsa ɗa aa yuwaan ɗu, a̱vu Betel,

adama a̱ba̱jini e iwuya ya̱ wu.

Na̱ wasasa,

o to kototo mogono ma Isra'ila suru suru.>>