1 <<Mantsa ma na maa ciga n yuwaan aza a Isra'ila opocino biti,

a̱vu unusu wu ugundo wa Ifiramu wu uta̱ a alanga eteshe,

oɓolo ni iwuya ya Samariya.

Suru nle aza yipalishi a ɗa.

Ele evu ɗa, a̱za̱ a̱ nga̱la̱la̱i.

2 Agba a gura reve

a na n cuwain ni iwuya i le shi.

Nusu le tu uka̱nda̱ruwu ne e le,

ili suru a̱ ma̱ka̱ka̱n ma̱ va̱ ma ɗa u ri.>>

3 <<A tsu zuwa ta̱ mogono ma yuwan ma̱za̱nga̱ ni iwuya i le,

a̱vu a zuwa azagbain a uwwa uyo'o

ne epen e le.

4 Suru nle a̱za̱ e tsipere tsa ɗa,

usuɗuwu cine vu revei wuwan u na u tsu da̱na̱ usuɗuwu

diga a mantsa ma na o umbai yira

hali u 'yon.

5 O urana wa̱ a̱buki o mogono'o

azagbain o tso o'wo ta̱ usowu

na̱ masayan,

a̱vu u canana ukere oɓolo na̱ a̱za̱ o ulamu.

6 Okolo e le a̱ ta̱ tsa wuwan,

a̱ tsu ta̱wa̱ yi ta̱ ni ikpa'a.

Upan u le u tsu suɗuwa ta̱ ayin ma̱ɓula̱,

reve nu usana u baza cine vu revei elentsu a akina.

7 Suru nle a̱ tu usuɗuwu cine vu revei wuwan,

o tsu soɗu ta̱ azagbain e le.

Ngono nle suru a̱ riya̱ ta̱,

a̱tsuma̱ e le babu za na ɗe numu.>>

8 <<Ifiramu ja̱mba̱ra̱ ta̱ aciya̱yi na̱ nɗa,

wo o'wo tsa aakala a na a vadalai shi.

9 Omocin a ta lyuwusa ucira u le,

agba e reve na̱ za ndolo shi.

A̱nji e le a̱ ta̱ ka̱mba̱sa̱ yono

agba e reve shi.

10 Uvaɗu wa Isra'ila u ta yuwusan adanshi a aci a̱ yi,

agba na̱ ne suru

u ka̱mba̱ uba̱ta̱ wa̱ A̱sulazuva A̱sula̱ a̱ yi shi

ko u zami yi shi.>>

11 <<Ifiramu ta̱ tsa muɗa,

a̱ tsu luma̱ yi ta̱ babu usa̱n waru babu aci.

Gogo u ta̱ da̱na̱ e ɗesu va Masar,

reve na alanga a jima u ka̱ra̱ a̱ tyo Asuriya adama u tsura̱ ikambi.

12 A mantsa ma na a̱a̱ ka̱ra̱, n ta variya le igolo i va̱,

a̱vu n rono le cine vu revei nnunu ma zuva.

A mantsa ma na mu uwwa nle a mmalu oɓolo,

a̱vu n reme le.

13 Addama a ta cina le, adama a na a lyawa numu!

Ukototosu u ta̱ da̱na̱ a aci e le, adama a na a̱ 'ya̱sa̱a̱n numu a aci!

N shi ta̱ a ciga n wawa le,

agba a̱vu a̱ ka̱ra̱ a yuwusan epen a aci a̱ va̱.

14 A̱ showen mu diga o okolo e le shi,

amma a̱ da̱na̱ ta̱ e mesun a̱ a̱ga̱da̱ e le.

Reve a pupaɗa lipu le cine vu revei atakpaci,

a patishi ishina oɓolo na̱ masayan ma̱ inabi.

Reve waru a̱ 'ya̱sa̱a̱n mu a aci.

15 Ko na n rito nle

a̱vu waru n da̱shi ekere e le ucira,

na̱ ne suru a yuwan ta̱ ifoɓi i wuya a aci a̱ va̱.

16 A̱ ka̱mba̱ uba̱ta̱ wa̱ A̱sulazuva Mogono shi,

reve wo o'wo tsu utan u na u ri gbaga shi.

A̱ to una azagbain e le na̱ matsun me pe'eni

adama a adanshi o uvaɗu u le.

A̱yi ndolo ta zuwa fo a yuwaan le ulamu

e iɗa ya Masar.>>