1 Nda adanshi a̱ Emos, za va aguɓa o ro vi iɗa ya Tekowa, alavu alavu na we enei a'wan e re kafu iɗa i jinga̱ɗa̱, a yashi i na Uziya shi mogono ma Yahuda, Yerobowam ulobo wa Yowash waru mogono ma Isra'ila.✝

2 A̱vu u damma,✝

<<Diga Sihiyona A̱sulazuva a̱ ta̱ ma̱gugwa̱,

Uɗyo wa̱ yi u ta̱ tsa tsata diga Urishelima.

Agalaci aza a aguɓa a kpanla ta̱,

waru ncilecile n Masasan ma Kame n 'yewe ta̱.>>

3 Apa nda ili i na A̱sulazuva a dammai:

<<O una̱ wu nusu wa̱ a̱bunda̱ a na Dimaska a yuwusan kuci,

ma̱a̱ bula̱ upan u va̱ shi.

Adama a na a faba ta̱

ama a Giliyadu na aaɗanga a̱ rumu.✝

4 Adama o ndolo n ta̱ lyungu na akina

a̱ tyo o u'wa wa Hazayel,

akina a na a lyuwa ba̱ta̱ vu upa'atan wu ucira

wa̱ Mogono Ben Hada.

5 Reve A̱sulazuva a damma,

n ta kuɗa una̱ntsu wu rumu wa Dimaska,

a̱vu n kototo mogono ma na ma̱ ri o Uka̱ri wa Aven,

oɓolo na̱ za na ri uguzu na aaɗanga diga Bet Eden.

Waru ama a Suriya a̱ ta̱ 'ya̱wa̱ tsugbashi e iɗa ya Kir.>>

6 Apa nda ili i na A̱sulazuva a dammai:

<<O una̱ wu nusu wa̱ a̱bunda̱ a na Gaza a yuwusan kuci,

ma̱a̱ bula̱ upan u va̱ shi.

Adama a na u pura̱i ama suru a̱ 'ya̱wa̱ tsugbashi,

a̱vu a winaa Edom.✝

7 Adama o ndolo n ta̱ lyunguwa̱ ukari wa Gaza na akina

na aa tama uba̱ta̱ wu upa'atan wu ucira wa̱ yi.

8 N ta̱ kototo mogono ma aza a Ashido,

oɓolo na̱ za na ri uguzu na aaɗanga a̱tsuma̱ a Ashikelon.

Waru ukere u va̱ u ta yuwan nla̱ngi na̱ Ekuron,

waru akapi a aza a Filistiya fo a̱ ta̱ kuwa̱!

A̱mu A̱sulazuva A̱sula̱ a ɗa n dammai ne.>>

9 Apa nda ili i na A̱sulazuva a dammai:

<<O una̱ wu nusu wa̱ a̱bunda̱ a na Taya a yuwusan kuci,

ma̱a̱ bula̱ upan u va̱ shi.

Adama a na a winai lyuci ma̱ɓula̱ e ekere a Edom,

agba a cuwan na̱ nzuwulai n muwun n tsuna̱wu shi.✝

10 Adama o ndolo n ta̱ lyunguwa̱ ukari wa Taya na akina

reve u tama uba̱ta̱ wu upa'atan wu ucira wa̱ yi.>>

11 Apa nda ili i na A̱sulazuva a dammai:

<<O una̱ wu nusu wa̱ a̱bunda̱ a na Edom a yuwusan kuci,

ma̱a̱ bula̱ upan u va̱ shi.

Adama a na a saɓa ta̱ a̱za̱ le na̱ matsun me pe'eni,

waru a saɓa ta̱ Isra'ila babu ene iliyali.

Upan wa ama a̱ Edom ma̱ da̱na̱ ta̱ a̱ ma̱puna̱,

Waru a̱ fa̱la̱ shi.✝

12 Adama o ndolo n ta̱ lyunguwa̱ Teman na akina,

agba u ta lyuwa uba̱ta̱ wu upa'atan wu ucira wa Bozura.>>

13 Apa nda ili i na A̱sulazuva a dammai:

<<O una̱ wu nusu wa̱ a̱bunda̱ a na aza Amon a yuwusan kuci,

ma̱a̱ bula̱ upan u va̱ shi.

Adama a na a̱ ɗa̱ra̱ ta̱ a̱ma̱ci a̱a̱tsuma̱

a na a̱ ri a̱tsuma̱ o upasu wa Giliyadu,

adama a̱ da̱shi a̱tyo e iɗa i le.✝

14 Adama o ndolo n ta̱ lyunguwa̱ ukari wa Raba na akina,

agba u ta lyuwa uba̱ta̱ wu upa'atan wu ucira wa̱ yi,

a ta yuwan yorori o urana wu uvon,

tso o upepu na̱ lipa̱ vu ulungusu o urana u ndolo.

15 A̱vu A̱sulazuva a damma,

Mogono me le ma̱ ta̱ 'ya̱wa̱ tsugbashi,

a̱yi na azagbain a̱ yi suru.>>