1 Apa nda ili i na A̱sulazuva Mogono me Ili Suru mo roco numu a alavu alavu. Me enei ta̱ o foɓuso oɓolo a apapari a na ri wa'a shi a mantsa ma na o kotoi ugasa adama o mogono, una̱ta̱ na mantsa ma na wunlya wo utusa̱. 2 A̱tsuma̱ alavu alavu'u, me ene ta̱ apapari'i a tamai a̱vu'un o uta̱nu suru a̱tsuma̱ e iɗa'a, reve n damma,

<< A̱sulazuva Mogono me Ili Suru, n te e ipati ya̱ wu,

vu yuwaan ama a̱ wu gafura!

Cine a yuwan limatan va Yakubu la'a?

Ele na ri wa'a!>>

3 Reve A̱sulazuva a̱ bula̱ ifoɓi ya̱ yi,

u damma, <<Ili i nda yaa fara shi.>>

4 Reve A̱sulazuva Mogono me Ili Suru ma̱ da̱shi roco mu alavu alavu o ro. A̱vu me ene A̱sulazuva zagbain e ɗesu akina u ge'eto a ama a̱yi. A̱vu akina'a a lyuwa mala ma na ma̱ ri a̱ru'un lon, hali fo a lyuwusa iɗa'a. 5 Ɗaɗa n dammai,

<<A̱sulazuva zagbain, yuwan ankuri

vu lyawa!

Cine a yuwan limatan va Yakubu la'a?

Ele na ri wa'a!>>

6 A̱vu A̱sulazuva a vadala ifoɓi ya̱ yi,

<<Ili ya̱ ndolo ya fara shi.

A̱mu A̱sulazuva a ɗa n dammai ne.>>

7 Apa nda ili i na A̱sulazuva a̱ da̱shi roco numu: A̱tsuma̱ alavu'u, me enei ta̱ mishin zuzu nu uɓaɓu u ro u na a suwai na amunga o uritosu wu usaa. A̱sulazuva'a u da̱na̱ ta̱ uguzu na amunga o uritosu wu usa'a o ukere wa̱ yi.

8 Reve A̱sulazuva a damma mu,

<<Emos, nye vee enei?>>

Reve n usu, <<Amunga o uritosu wu usaa.>>

Reve A̱sulazuva a damma,

<<Na amayun na amunga o uritosu wu usaa u nda u ɗa

mo roco cine ama a̱ va̱ aza a Isra'ila

e remei uɓaɓu u na u ka̱ra̱i mejege shi.

Ma̱a̱ da̱shi rungwa̱ nusu le shi.

9 O to ɓoso ba̱ta̱ va̱ a̱ga̱nda̱

vu ugundo wa̱ Ishiyaku,

na̱ ba̱ta̱ va̱ a̱ga̱nda̱ a Isra'ila

waru o to o'wo okongo.

N ta̱ 'ya̱sa̱n matsun me pe'eni mo uvon

nla̱ngi nu u'wa wa Yerobowam.>>

10 Reve Amaziya ganu ve Betel lyungu ni ikaka uba̱ta̱ wa̱ Yerobowam mogono ma Isra'ila adansa, <<Apa Emos a yuwusan ifoɓi a aci a̱ wu a̱tsuma̱ o u'wa wa Isra'ila. Ili i na wa dansa ta̱ 'ya̱sa̱n ugbozu wi iɗa'a. 11 Adama a na Emos ta dansa,

<< <Yerobowam ta̱ kuwa̱ a̱tsuma̱ o uvon,

waru a̱ ta̱ pura̱ ama a Isra'ila a̱ tyo tsugbashi

diga e iɗa i le a̱ tyo iɗa i ro.> >>

12 Reve Amaziya damma Emos, <<A̱vu za yindi! Suma a̱ tyo e iɗa ya Yahuda, vu zami ɗe ilyalya ya̱ wu, a̱vu vu yuwan adanshi e ikaka ya̱ A̱sula̱ a̱ wu ɗe. 13 Amma she vu da̱shi yuwan adanshi e ikaka ya̱ A̱sula̱ a̱tsuma̱ e Betel wan. Adama a na Betel uba̱ta̱ wa̱ a̱ga̱nda̱ o mogono ma ɗa, waru pa ɗa A̱a̱'isamapaɗa o tsugono tsa̱ yi tsa̱ ri.>>

14 A̱vu Emos usu Amaziya u damma, <<A̱mu vumava̱sula̱ ɗa shi, waru ulinga u nda ulinga u va̱ u ɗa shi. A̱mu za va aguɓa ɗa n shi, waru n shi ta̱ a̱ ka̱lyuwusa̱ ɗanga vu ubiri. 15 Reve A̱sulazuva a tara mu diga uba̱ta̱ wa aguɓa e ikyon, a̱vu u damma mu, <'Ya̱wa̱ vu yuwaan ama a̱ va̱ aza a Isra'ila adanshi e ikaka ya̱ A̱sula̱.>

16 <<To, gogo vu uwwa adanshi A̱sulazuva,

a̱vu na va dansa

she n yuwan adanshi e ikaka ya̱ A̱sula̱ a aci o u'wa wa Isra'ila wan,

waru she n yuwan alajiya a aci o u'wa wa Ishiyaku wan.

17 Adama o ndolo apa nda ili i na A̱sulazuva dammai,

<Ka va̱ wu to o'wo aashakala a̱tsuma̱ a̱ lyuci,

muwun ma̱ wu olobo ne esheli,

oto o una le na̱ matsun me pe'eni.

Waru e te e ne'eshen iɗa ya̱ wu na amunga o uritosu,

a̱vu na aciya̱wu waru vu ta̱ kuwa̱ e iɗa yi idaba.

Waru ama a Isra'ila itamaha yi lo shi a̱ ta̱ pura̱ le

diga a̱tsuma̱ e iɗa i le a̱ tyo e iɗa i ro tsugbashi.> >>