1 Apa nda alavu alavu o ro na A̱sulazuva Mogono me Ili Suru o rocowiso numu: A̱tsuma̱ a̱ yi me ene ta̱ aasaka o ro tapu nu umatsun wu ɗanga winu. 2 Reve A̱sulazuva a damma,

<<Emos nye ve enei?>>

A̱vu n usu, <<Aasaka nu umatsun wu ɗanga winu.>>

Reve u damma mu,

<<A̱tyo ama a̱ va̱ aza a Isra'ila rawa ta̱,

ma̱a̱ da̱shi rungwa̱ le shi.

3 A̱tsuma̱ o urana u ndolo ishipa i le a̱tsuma̱ A̱a̱'isamapaɗa

o to o'wo mesun ma̱ a̱tsumola̱ngu.>>

A̱vu A̱sulazuva Mogono me Ili Suru damma,

<<A̱kwa̱kwa̱ a ta yuwan a̱bunda̱,

a̱ ta̱ da̱na̱ uba̱ta̱ biti!

Ko ilama aa uwwa shi!>>

4 Uwwai nda,

a̱ɗu aza a na yo ɓongishi alambi

i to kototosu alambi e iɗa'a.

5 I ta dansa aciya̱ɗu,

<<Mantsa ma̱ ne ma ɗa A̱buki o Woto u Sa'avu a̱ ka̱ra̱,

adama tsu wina itana ya̱ a̱ɗuma̱ a̱ tsu?

Hali urana u ne ɗa urana u wivuwun wa Ashibi o koto,

adama tsu tsura̱ mantsa ma na tsa̱ 'ya̱wa̱ na̱ yitabo awina?

A̱tsuma̱ atsulu a̱ tsu na a wina, tsu ta yuwan akunda nu ugbozu,

tsu lapa ugundo makundatsu

cine tsa paala za va atsulu.

6 Tsu ta gura tsula za vu ulambu

na̱ azurufa wo o'wo aagbashi a̱ tsu,

za na fo ili ya damatosun o una̱ wa atan a̱ta̱.

Waru tsu wina itana yu uɗuma̱ i na i ri ulobonu shi ni ikebe lon.>>

7 A̱sulazuva za na Yakubu ri a yuwusan uvaɗu na̱ a̱yi,

kucina ta̱ u damma,

<<Na amayun me icina na̱ linga vi iwuya i ɗu shi ko ke'en.>>

8 <<Iɗa i ta̱ je'en lipu adama a̱ nusu ɗu,

za na ri pe a̱tsuma̱ a̱ yi suru ta yuwan a̱tsumola̱ngu,

u ta̱ 'yon u usuɗuwa

u cipa̱ tsu Uɗolu wa̱ Nilu,

babu asuvu nden.>>

9 A̱vu A̱sulazuva a damma,

<<O urana u ndolo,

n ta zuwa urana uriya̱ nu urana aci,

nu urana uvaɗi u ta̱ rumba̱na̱.>>

10 N ta vadala a̱buki a̱ ɗu

wo o'wo a̱tsumola̱ngu.

Ishipa i ɗu suru

o to o'wo mesun ma̱ wiruta̱.

N ta zuwa akashi amuna o'wo ɗu itana yu otosu,

a̱vu mo o'woto aaci ɗu suru no ogbondo.

I ta yuwan mesun tsa a ama a na a lambai

mawun ma̱ ta̱ gba̱ɗa̱ gba̱ɗa̱ a na ri na̱ yi.

A cina ukosu, urana'a u to o'wo okono lon!

11 A̱vu A̱sulazuva Mogono me Ili Suru damma,

<<Na amayun rana ndolo ta̱ lo a̱ ta̱wa̱

na ma̱a̱ lyungu ambulu e iɗa'a.

Agba ambulu e ilyalya a ɗa shi ko gba akuli a̱ mini shi,

amma ambulu a mawwa ma adanshi a̱ A̱sulazuva.

12 Ama e te reme agara

diga a mala a̱ tyo a mala,

diga ugana a̱ tyo asana.

A̱ ta̱ da̱na̱ e ilaɗi elime na̱ a̱ca̱pa̱,

e izami ya adanshi a̱ A̱sulazuva,

agba a̱ tsura̱ yi shi.

13 O urana u ndolo,

esheli a sa'ani no olobo

a̱ ta̱ lima̱ adama a akuli.

14 Aza a na a yuwain akucunu

o una̱ wu unusu wa aza a Samariya, a dansa,

<N kucina ta̱ na̱ ma̱sula̱ ma Dan,>

ko, <N kucina ta̱ na̱ ma̱sula̱ ma Biyasheba,>

i cu'un ya ama o ndolo a̱ ta̱ riya̱

agba a̱a̱ da̱shi 'yon shi ko ke'en.>>