1 Uwwai nda Isra'ila, poloi atsuvu

e idanshi yi ishipa ya̱ a̱tsumola̱ngu a na maa yuwusan adama a̱ ɗu!

2 <<Usheli u va̱ Isra'ila riya̱ ta̱,

waru waa gura 'yon shi.

A lyawa yi ta̱ nven e iɗa,

babu za na a̱a̱ 'ya̱sa̱n yi.>>

3 Apa ili i na A̱sulazuva Mogono me Ili Suru ma dammai Isra'ila:

<<Lyuci gbain na a̱soja ukpakukupa (1,000) o uta̱i,

ukpaku (100) u ɗa goon aa pasa,

lyuci gbain na ukpaku (100) wu uta̱i,

kupa ɗa goon aa pasa!>>

4 Apa ili i na A̱sulazuva a dammai Isra'ila:

<<Zami numu adama i la'a.

5 Amma she i zami mu e ekere a̱ma̱li a Betel wan,

ko gba i 'ya̱wa̱ Gilga wan,

ko i pasa a̱ tyo Biyasheba wan.

Adama a na ama a Gilga a̱ ta̱ pura̱ le a̱ tyo tsugbashi

waru Betel to o'wo ili ye pere.>>

6 <<I zami A̱sulazuva adama i la'a,

na̱ ne ɗa shi u ta lyawa ɗu

n ta lyuwa u'wa wa̱ Isuhu cine revei akina,

akina'a u ta lyuwa Betel.

Waru babu za na aa gura kimusa̱ yi!

7 Wo yo'ono ɗu shi, a̱ɗu naa i vadalayi uge'etosu u mejege ucina̱,

u to o'wo okono e ekere alambi,

i ta tsugbisa mejege hali a̱ tyo e iɗa!>>

8 A̱yi na u yuwain o oɓolo e italyo'o o ndolo

Moton na̱ muwun ma̱ yi

na̱ meten na̱ musa̱n na̱ mozomu,✝

za na ka̱mbuwa̱i irumbu alanzu,

za na ka̱mbuwa̱i urana irumbu,

za na tsu rono mini ma mala reve wo oco yi

o urewesu wu uvaɗi o una̱ wi iro'i,

A̱sulazuva a ɗa ala a̱yi!

9 U tsu ta̱wa̱a̱ ta̱ nu ukototosu uba̱ta̱ wu upa'atan wu ucira,

adama ilyuci yi kari o oco.

10 A̱ɗu ama a Isra'ila,

i 'yuwan ta̱ za na tsi isawaan amayun

uba̱ta̱ wu uge'etosu o una̱ntsu u lyuci,

oɓolo na̱ za na adansa ili i ro shi she mejege.

11 Amayun,

i ta tsugbusa alambi,

a zuwusa le na a ca ɗu ilyalya i le babu ucigu.

Ko na wo o'woi i suwai saa

na atali a na e she'ein,

Amma ya̱ da̱nu pe a̱tsuma̱ e le shi.

Ko na i cu'wa̱in a̱ɗuma̱ a̱ ina̱bi a sa'ani a sa'ani,

yoo sowo masayan me le shi.

12 Adama a na n reve ta̱ a̱bunda̱ a̱ nusu ɗu

na̱ cine nusu ɗu ri uwuyanu.

I to ɓongishi a̱za̱ a̱ a̱ɓula̱,

a̱ ushishi utowusu wu una̱.

A̱vu i putsaa a yuwaan za vu ulambu wu ucira

uge'etosu wa amayun uba̱ta̱ o una̱ntsu u lyuci.

13 Ashe, ili ya asalama i ɗa shi,

na a̱za̱ o ugbozu a̱ ɓa̱ruyi na̱ le

a̱tsuma̱ a mantsa me e iwuya ma nda.

14 Zamiyi isa'ani o una̱ wi iwuya,

adama i la'a.

Adama A̱sulazuva A̱sula̱ o oɓolo a̱ a̱soja a zuva

da̱na̱ oɓolo na̱ a̱ɗu,

ununa i dammai u ri.

15 I suma iwuya, i guza̱ isa'ani,

i yuwan uge'etosu u mejege

uba̱ta̱ wu uɓolotosu o ukobu u lyuci.

U ta gura wo o'wo A̱sulazuva A̱sula̱ o oɓolo a̱ a̱soja a zuva

to roco akapi a limatan va̱ Isuhu icigi.

16 Adama o ndolo apa ili i na A̱sulazuva A̱sula̱ o oɓolo a̱ a̱soja a zuva a dammai,

za na a̱ yi ɗa A̱sulazuva,

<<A ta yuwan mesun e re,

a ta uwwa yisali ya̱ a̱tsuma̱lima̱ ba̱ta̱ suru a̱tsuma̱ a̱ lyuci.

E te ɗe acimbi a̱ ta̱wa̱ a yuwan mesun,

aza a na a gurai mesun lon a̱ ta̱ ta̱wa̱ a̱ da̱na̱ a̱ga̱nda̱ e mesun.

17 Reve A̱sulazuva a damma,

mesun ma̱ ta̱ da̱na̱ a̱tsuma̱ a̱ a̱ɗuma̱ a̱ ina̱bi a̱ ɗu suru.

Adama a na n to utula̱i e memere ma̱ ɗu, n ca ɗu oforo.

18 A̱tsuma̱lima̱ a ta cina ɗu, a̱ɗu na yaa pura urana wa̱ A̱sulazuva!

Nye ɗa urana wa̱ A̱sulazuva aa yuwan ɗu?

Urana u ndolo u ta̱ da̱na̱ irumbu agba ekan shi.

19 U to o'wo she damma vuma na sumayi kamu,

reve u riya̱ e ekere a biya.

Ko waru tsu za na uwai o u'wa,

u zuwai ekere a̱yi o uɓaɓu,

a̱vu yo ka̱ɗa̱ yi.

20 Urana wa̱ A̱sulazuva urana wi irumbu ɗa, agba ekan shi,

irumbu pici, babu ko ekan ko keꞌen shi?>>

21 Reve A̱sulazuva a damma,

<<N 'yuwan ta̱ a̱buki e itoni e idaba a̱ ɗu

waru maa uwwusa uyo'o wi iɓolo i la̱nga̱ i ɗu shi!✝

22 Ko na̱ shi i ta̱wa̱a̱ mu

na̱ kucci vu ukula̱tosu ɗu,

na̱ kucci vi ishina ɗu, ma̱a̱ ushi le shi.

Waru ma̱a̱ ushi iliyamunga i ɗu i na i ri na̱ lipu shi

aza a na i ca numu

kucci muwwulai.

23 I tawa mu ure nu uɗyo wu ishipa n ɗu!

Moo poloo mesun me ikumburu i ɗu atsuvu shi.

24 Amma lyawa a yuwan uge'etosu u mejege,

waru u da̱na̱ uba̱ta̱ suru tsa̱ mini mo uɗolu ma na mee yeneshe.

A̱ɓula̱ waru tsu uɗolu u na wee 'yewe shi!

25 <<Isra'ila i ta̱wa̱a̱ mu ta̱ na̱ kucci nu ucasu

a̱tsuma̱ a a'wan amunga a̱tsumona?

26 Amma a̱vu i 'ya̱sa̱n ruma musula̱ n ɗu

aza a na i yuwayin aciya̱ɗu,

va Sikot a̱ma̱li a na i ɗeyi mogono,

na̱ Kaiwan a̱ma̱li a̱ ɗu yi iroci italyo'o.

27 Amma a̱vu A̱sulazuva a damma,

za na ala a̱ yi a ɗa A̱sula̱ o oɓolo a̱ a̱soja a zuva,

adama o ndolo n ta̱ ca̱co ɗu a̱ tyo e iɗa i ro tsugbashi asana na̱ Dimaska.>>