1 <<A̱tsuma̱lima̱ a ta cina aza a na a̱ ri a̱ nden m mawwa mo uyo'o

a̱tsuma̱ a̱ Sihiyona,

na aza a na e inda a̱ ta̱

a̱ nden n lafiya a Masasan ma Samariya,

a̱ɗu na i ri ama a gbagbain

a nɗa n na e revei nda,

a̱ɗu na aza a Isra'ila a̱ 'ya̱wusa̱

izami yi ikambishi ya̱'a̱ ɗu!

2 Gawain i 'ya̱wa̱ a̱ lyuci va Kalne ye ene yi,

diga ɗe reve i 'ya̱wa̱ Hamat lyuci gbain.

Reve i zura̱ a̱ cipa̱ a̱ lyuci va Gat a Filistiya.

A la'a ta̱ ba̱ta̱ re tsugono tsa̱ ɗu?

Iɗa i le i la'a ta̱ za ɗu mgbain?

3 Wo yo'ono ɗu shi,

a̱ɗu na i dammai urana wa̱ a̱tsuma̱lima̱ a̱ ta̱wa̱ shi,

amma linga vi iwuya i ɗu

ta̱ ca̱cosu urana'a u ta̱wa̱ zuzu!

4 Wo yo'ono ɗu, a̱ɗu na i ri o vosun

a̱ a̱ga̱da̱ a na a yuwain na anga a agiwa shi,

reve yi ba̱ruwa̱

a apada o uga'an.

A tamasa inama yi ikyon diga a̱tsuma̱ o oɓolo a̱ ɗu

na̱ ma̱dindim n na n ri na̱ lipu.

5 A canasa ishipa na̱ maɗata ma̱ kumburu,

a majiyan tsuwe'e tsa̱ ɗu cu'un va̱ Da̱wuda ɗa.

6 I to sowuso masayan ma̱ ina̱bi

a munda,

waru i ta putalasa mani'in me ikebe,

agba i yuwan a̱tsumola̱ngu adama o ulungusu wu ugundo wa̱ Isuhu shi.

7 Ili yi lo shi a̱ɗu ɗa aza a na a fara

pura̱ a̱ tyo tsugbashi,

a̱buki a̱ɗu na̱ mawwa mo uyo'o u ɗu

o to koto.>>

8 A̱sulazuva mogono me Ili Suru ma kucina ta̱ na aciya̱yi,

a̱yi A̱sula̱ o oɓolo a̱ a̱soja a zuva a damma ta̱,

<<N ciga uvaɗu wu ugundo wa Yakubu shi,

n 'yuwan ta̱ ba̱ta̱ vu ucira va̱ yi.

N ta ca lyuci'i

oɓolo ni ili i na i ri pe suru e ekere a n'yuwatan.>>

9 Ko na̱ shi ama kupa a ɗa a buwai a̱tsuma̱ o u'wa u ta̱, a̱ ta̱ kuwa̱. 10 Waru na̱ mmaci n na ma̱a̱ ciɗo lipu le a̱ ta̱wa̱ adama a tanu lipu le o uta̱ a alanga a̱vu e ece za na buwai pe upa'awun, <<Nanza buwa ta̱ pe oɓolo na̱ a̱vu?>> N na̱ a̱ usu, <<O'o,>> za yeci'i u damma, <<Rungwa̱i! She ɗe ala a̱ A̱sulazuva wan adama she ili i ro i cina wan.>>

11 Agba a̱ yi ɗa nda A̱sulazuva a cayi udammu,

o ɓoso u'wa u gbain wo o'wo ma̱buta̱,

u'wa u ke'en waru a̱ ka̱mba̱to yi okomo.

12 Ido i tsu suma ta̱ a atali?

Ko a ta gura cimba mala ni inan yi iluma?

Amma i tsu vadala ta̱ uge'etosu u mejege wo o'wo tsukono,

wuma wa̱ a̱ɓula̱ waru okono.

13 A̱ɗu na i ri a̱ ma̱za̱nga̱

adama a na i lyuwai a aci

e ekere a̱ lyuci va Lo Deba, za na a tarai ili shi,

a dansa, <<Nu ucira u tsu u ɗa

tsu lyuwai Karmayim shi?>>

14 Reve A̱sulazuva a damma,

<<A̱yi ɗa nda, n ta̱ 'ya̱sa̱n nɗa n ro

na a yuwan tsushu'un na̱ ɗu aza a Isra'ila.

Nɗa n ta̱ ɓongi ɗu

diga o uwata wu upasu wa Lebo Hamat

a̱ tyo o Uka̱ri wa Araba.>>