1 Bakwesu, nkaambo inywe lwanu mulizi, kuti kumuswaya kwesu kulindinywe teekwakali kwabiyo pe. 2 Pesi nikuba boobo twakali twapenzegwa kale alimwi akufwisigwa bweeme kuFilipi, mbuli mbumuzi, twakaba abusichaamba muli Leza wesu kuti tukambawuke makani mabotu aLeza kulindinywe mukwiinda mukulwanisigwa kupati. 3 Nkaambo kukombelezya kwesu takuzwi kumiyeeyo italuleme pe nikuba kuchita chitaluleme alimwi tatuliikweezya kweneena kufumbwa muntu pe. 4 Kwiinda boobo, lyoonse twambuula mbuli bantu bakazumininwa aLeza akusyomegwa amakani mabotu, aboobo tatukambawuki kuti tubotezye bantu pe, pesi Leza, ooyo usunka myoyo yesu. 5 Mulizi loko kuti teetwakaza amajwi akumubotezya pe, nikuba teetwakasama chisamo chabusindya pe kukumweeneena, chabusindya pe, Leza ngukamboni wesu. 6 Teetwakali kuyanduula kulumbayizigwa kuzwa kubantu pe, nikuba kuzwa kulindinywe nikuba kuli bamwi, 7 nikuba kuti twakaleelede kusesa mbuli batumwa baKkirisitu. Pesi twakali bombya akati kanu, mbuli mwanakazi unyonsya bana bakwe. 8 Nkaambo kaluyando lwesu ndutwakali aalo kulindinywe twakali libambilide kuti twaabane andinywe peepe makani mabotu luzutu azwa kuli Leza pesi alubo abuumi bwesu. Mwakali bayandisi loko kulindiswe. 9 Bakwesu, choonzyo mulayeeya mbutwakabeleka kapati akuminwa sikati amansiku, kuti tutabi angutulemezya, nitwakali kumukambawukila makani mabotu aLeza.

10 Muli bakamboni besu, aLeza alubo, twakali basalali biyeni abaluleme abatakwe kampenda mukupona kwesu akati kanu nibasyomi; 11 nkaambo mulizi biyeni, mbuli wisi abana bakwe, 12 twakasungwazya umwi awumwi wanu alimwi twakamuumbulizya akumulayilila kuti mupone buumi bweelela Leza, umwiita mubwami abulemu bwakwe.

13 Alimwi tulumba Leza lyoonse aswebo nkaambo kacheechi, kuti nimwakatambula ijwi lyaLeza ndimwakamvwa kulindiswe, mwakalizumina peepe mbuli ijwi lyabantu pesi mbuli mbulibede, ijwi lyaLeza, libeleka mulindinywe nibasyomi. 14 Nibakwesu, nkaambo kanu, mwakaba bayiyi bambungano zyaLeza muli Kkirisitu Jesu zili muJudiya, nkaambo mwakapenzegwa zintu zyeelene kuzwa kubantu bakulindinywe mbuli mbubakachita kuzwa kubaJuda, 15 bakajeya aamwi Mwami Jesu abasinsimi, akutwaanda, akunyemya Leza akukazya bantu boonse 16 akutukasya kukambawuka kuli batazi Leza kuti bafutulwe, aboobo mbuli lyoonse kuti bazuzye mweelwe wazibi zyabo. Pesi bukali bwaLeza bwabasikila kumamanino!

17 Nibakwesu, mbukunga twakali pambukene andinywe, kwakayindi kaniini, mubuntu peepe mumoyo, twakasungwaala kapati alimwi achiyandisyo chipati kuti tumubone busyu kubusyu; 18 nkaambo twakali kuyanda kuti tuze kuli ndinywe, ime, Pawulu, lubo alubo, pesi Satani wakatukasya. 19 Nkaambo mbuuli bulangilizi bwesu nikuba lukondo nikuba musini wakulikankayizya kunembo lyaMwami wesu Jesu kukuboola kwakwe? Tamweesi ndinywe na? 20 Nkaambo choonzyo muli bulemu alukondo lwesu.