1 Nibakwesu, mbuli kuchiindi akuzyiindi, takukwe nchimweelede kulembelwa pe. 2 Nkaambo inywe lwanu mulizi kabotu kuti buzuba bwaMwami buyoosika mbuli mubbi mansiku. 3 ✝ Bantu nibayooti, "Kuli luumuno akukwabililwa," eelyo mpawaawo lunyonyooko luyooza alimbabo mbuli kumyongwa mbukuza kumwanakazi waamba kutumbuka, alimwi takukwe kuyooba kuchija pe, 4 nibakwesu, pesi inywe tamuli mumudima pe, nkaambo buzuba oobo tabukwe kuyoomugambya pe mbuli mubbi, 5 Nkaambo inywe moonse mulibana bamumuni abana basikati. Tatuli bana bamansiku nikuba bamumudima pe. 6 Aboobo eelyo tutawoni, mbuli bamwi mbubachita, pesi atusinsimuke alimwi akulibatamika. 7 Nkaambo aabo bantu boona, boona mansiku, abaabo bantu bakolwa, bakolwa mansiku. 8 Pesi, mbutuli basikati, ngatulibatamike, alimwi tusame lusyomo aluyando mbuli chikwabilizyo chakaango, abulangilizi bwalufutuko mbuli ngwaani yalubulo. 9 Nkaambo Leza teewakatusalila bukali pe, pesi kuti tujane lufutuko mukwiinda muMwami wesu Jesu Kkirisitu, 10 ooyo wakatufwida kuchitila kuti nikuba katuchili bawumi nikuba katufwide kuti tukapone anguwe. 11 Nkikaako amusungwazye umwi awumwi akuyakana, mbuli mbumuliikuchita kale.

12 Nibakwesu, tulamukumbila, kuti mulemeke aabo babeleka akati kanu alimwi bamuzulida muMwami abamuyiisya, 13 alimwi mubalemeke akubayanda kapati muluyando nkaambo kamulimu wabo. Akube luumuno akati kanu.

14 Nibakwesu, tulamusungwazya, kuti mubachenjezye bakandu, musungwazye bayoofu, mugwasye bakompeme, mube amoyo mulamfu kubantu boonse. 15 Amulange kuti kutabi umwi wanu ubweedezya chibi kuchibi, pesi choonse chiindi muyanduule kuchita kabotu kuli umwi awumwi akuli boonse.

16 Amukondwe lyoonse, 17 amukombe lyoonse, 18 mupe kulumba muzintu zyoonse; nkaambo eechi nkukuyanda kwaLeza kuli ndinywe muli Kkirisitu Jesu.

19 Mutakasyi Muuya, 20 mutasampawuli businsimi, 21 pesi musunke zintu zyoonse; mujatisisye eecho chibotu, 22 mulikasye kububi bwamusyobo woonse.

23 Leza waluumuno lwakwe amusalazye chakumaninina; alimwi muuya wanu amoyo amubili ubambwe kabotu akubula kampenda kukuboola kwaMwami wesu Jesu Kkirisitu. 24 Ooyo umwiita ulisyomekede, alimwi uyoochichita.

25 Nibakwesu, amutukombele.

26 Amujuzye bakwesu boonse akujuzyana kusalala.

27 Ndamulayilila muMwami kuti lugwalo oolu lukabalwe kubakwesu boonse.

28 Luzyalo lwaMwami wesu Jesu Kkirisitu lube andinywe.