1 Nibakwesu, kumamanino, tulamukumbila akumusungwazya muMwami Jesu, kuti mbuli mbumwakayiiya kulindiswe mbumweelede kupona akubotezya Leza, mbuli mbumuliikuchita kale, ngamuchite mbuboobo lyoonse. 2 Nkaambo mulaazi malayilile ngitwakamupa mukwiinda munguzu zyaMwami Jesu. 3 Nkaambo ooku nkuyanda kwaLeza, kusalazigwa kwanu, kuti mulikasye kumalalane, 4 kuti umwi awumwi wanu azibe mbwayelede kuzyotolola mubili wakwe mubusalali abulemu, 5 peepe muzisusi zyamubili mbuli batakombi batazi Leza; 6 kuti kutabi muntu ubisya, akujanina munyina mweenya munkani eeyi, nkaambo Mwami nguupa chisubulo muzintu eezi zyoonse, mbuli mbutwaka muchenjezya kale. 7 Nkaambo Leza teewakatwiitila busofwazi pe, pesi kupona mubusalali. 8 Nkikaako kufumbwa ukaka malayilile aaya, takakili muntu pesi ukakila Leza, ooyo upa Muuya Usalala wakwe kulinduwe.

9 Lino atala aluyando lwabunyina taakwe cheelelo chakuti umwi amulembele, nkaambo inywe lwanu mwakayiisigwa aLeza kuyandana, 10 alimwi nichoonzyo mulabayanda boonse bakwesu muMasedoniya yoonse. Nibakwesu, tulamusungwazya, kuti muchite oobo chakwiindilila, 11 kuti muyandisye kupona chuumunizi, mudunamine azyanu, akubeleka amaboko aanu, mbuli mbutwakamulayilila 12 kuchitila kuti mupone buumi bululeme kuli baabo balikunze, alimwi mutabi mukuli kuli bamwi.

13 Bakwesu, tatuyandi kuti mubule luzibo, atala abaabo balede, kuti mutawusi mbuli bamwi mbubachita aabo batakwe bulangilizi. 14 Nkaambo mbukunga tulasyoma kuti Jesu wakafwa akubuka lubo, nikuba boobo, mukwiinda muli Jesu, Leza uyoomweeta antoomwe abaabo bakafwa mulinguwe.

15 Nkaambo eechi tulachaamba kulindinywe ajwi lyaMwami, kuti iswe nitubawumi, bacheede mane kukuboola kwaMwami, tatukwe kuyootalika pe kuli aabo bafwide. 16 Nkaambo Mwami lwakwe uyooseluka kuzwa kujulu akoompolola kwakulayilila, akwiita kwamupati wabaangelo, amundindimina wamweembo waLeza. Alimwi bafwide muli Kkirisitu bayootalika kubuka. 17 Eelyo iswe nitubawumi, nitucheede, tuyoobwezegwa aamwi ambabo mumayoba kuti tukaswaanane aMwami mumulengalenga; alimwi aboobo tuyooba aMwami kwalyoonse. 18 Nkikaako amuumbulizyane amajwi aaya.