1 Nkaambo kacheechi ime, Pawulu, ndimwaange waKkirisitu Jesu muchiimo chanu batazi Leza pe, 2 ✝ kandiyeeya kuti mwakamvwa atala abubanzi bwaluzyalo lwaLeza oobo bwakapegwa kulindime nkaambo kanu, 3 amunzila insiiswa mbuyazibikana kulindime achiyubunuzyo, mbuli mbundakalemba mubufwiifwi. 4 Nimuyoobala eechi muyoomvwisisisya maanu aangu ali munsiswa yaKkirisitu, 5 eeyo yakatazibikana kubana babantu kuli aamwi mazyalani mbuli mbuyakayubununwa lino kubatumwa bakwe basalali abasinsimi mukwiinda aMuuya; 6 ✝ mbumbuboobo, batamuzi Leza mbubakaba basilukono, zizo zyamubili uumwi, alimwi basibulidilani bwachisyomezyo chamuli Kkirisitu Jesu mukwiinda mumakani mabotu. 7 Ayaaya makani mabotu ndakachiitwa kuba mulanda kwiinda muchipo chaluzyalo lwaLeza eecho nchindakapegwa mukubeleka kwanguzu zyakwe. 8 Kulindime, nikuba kuti ndimuchalizi kapati kuli boonse basalali, oolu luzyalo lwakapegwa kulindime, kukukambawuka kuli batamuzi pe Leza buvubi butamvwisisyiki bwaKkirisitu, 9 ✝ alimwi kuti ndichite bantu boonse babone kuti makanze ansiiswa isitikide kuzwa kale muli Leza ooyo wakalenga zintu zyoonse; 10 kuti mukwiinda mumbungano kuyubununwe busongo busiyenesiyene bwaLeza kuti bukonzye lino kuzibikana kubweendelezi amunguzu zyamasena alikujulu. 11 Eechi chakali mumabambe atamani aayo ngakazuzikizya muli Kkirisitu Jesu Mwami wesu, 12 muli ooyo ngutujisi busichaamba akutayoowa amweenya mukwiinda mulusyomo lwesu mulinguwe. 13 Aboobo ndamukumbila kuti* mutalengwani atala azeezi nzindili kumufwabila, mbuumbubo bulemu bwanu.

14 Nkaambo kacheechi ndilafugama amazwi angu kunembo lyaTaata, 15 kuzwa kuli ooyo impuli yoonse kujulu amunyika mpuzyuunikidwe, 16 kuti mukwiinda mubuvubi bwabulemu bwakwe kuti akamusimye changuzu mukwiinda muMuuya wakwe mumuntu wamukati, 17 alimwi kuti Kkirisitu akkale mumyoyo yanu mukwiinda mulusyomo; kuti inywe, nimuzyatide animunikide muluyando, 18 kuti mukabe anguzu kumvwisisisya aboonse basalali mukukwazama abulamfu alimwi bwimvwi amukunika, 19 alimwi kuti muzibe luyando lwaKkirisitu oolo lwiinda luzibo, kuti mukazuzigwe abuna Leza buzwide.

20 Lino kulinguwe ooyo alanguzu zibeleka mulindiswe ukonzya kuchita zyindilide mubwiingi kwiinda zyoonse nzitukumbila nikuba nzituyeeya, 21 kulinguwe kube bulemu mumbungano amuli Kkirisitu Jesu kumazyalani woonse, kwalyoonse alyoonse. Ameni.