1 Nkikaako ime, ndimwaange nkaambo kakukutawukila Mwami, ndamukumbila kuti mupone buumi bweelela lwiito oolo ndumwakayitwa aalo, 2 ✝akulifwiinsya koonse amoyo mubombe, amoyo mulamfu, mukunyampuzyaniya mukuli umwi awumwi muluyando, 3 mukuyanda kubamba bukamantani bwaMuuya mubukamantani bwaluumuno. 4 Kuli mubili uumwi aMuuya uumwi, mbuli mbumwakayitwa kubulangilizi bumwi oobo bwakulwiito lwanu, 5 Mwami uumwi, lusyomo lumwi, lubbapatizyo lumwi, 6 Leza uumwi aTaata wesu toonse, uuli atala azyoonse alimwi mukwiinda kuli zyoonse amuli zyoonse.

7 Pesi luzyalo lwakapegwa kuli uumwi awuumwi wesu mukwiinda mumweelo wachipo chaKkirisitu. 8 ✝ Nkikaako nchikwaambwa kuti,

"Naakatanta kuya kujulu

wakazulwida baange weenda aabo,

mpawo wakapa zipo kubantu."

9 Mukwaamba, "Wakatanta kujulu," chaambaanzi eechi pesi kuti alimwi wakaseluka mumasena alaansi amunyika? 10 Ooyo wakaseluka nguunguwe alimwi wakatanta kwiinda majulu woonse, kuti akonzye kuzuzya zintu zyoonse. 11 Alimwi zipo zyakwe zyakali zyakuti bamwi babe batumwa, bamwi babe basinsimi, bamwi babe bakambawusi alimwi bamwi babe beembeli* abayiisi, 12 kuti mubambile basalali kumulimu yabukambawusi, mukuyaka mubili waKkirisitu, 13 mane toonse tukasike kulukamantano lwalusyomo akuluzibo lwaMwana waLeza, mukuzulila kwabuntu, mukweleela chiimo chizwide chaKkirisitu; 14 kuchitila kuti tutabi limbi mbuli bana, bawungwa kufumbwa alimwi kabatolwa kufumbwa iguwo lyanjiisyo isowa, amizeezo yabantu yeneena, abusintaze nibakayeneena mukuyubilila. 15 ✝ Nikuboobo, kwaambuula kasimpe muluyando, kuti tweleede kukomene muzyiimo zyoonse mulinguwe ooyo uli mutwe, ooyo ulinguwe Kkirisitu, 16 ✝ kuzwa kuli ooyo mubili woonse, muukamantene akusumwa aamwi azipanzi zyoonse zipedwe, kuti chizo chimwi achimwi kachibeleka oobotu, chipa kuti mubili ukomene alimwi ulaliyaka kwiinda muluyando.

17 Lino ndamwaambila eechi akupa bukamboni muMwami, kuti mutaponi mbuli bamwi batamwizi Leza mbubapona, mukunyonyooka kwamizeezo yabo; 18 bakasizigwa mukumvwisisya kwabo, bakasosolosegwa kukuzwa mubuumi bwaLeza nkaambo kakubula luzibo luli muli mbaabo, nkaambo kabuyumu bwamoyo wabo; 19 bakaba bantu batachikwe bweeme pe alimwi bakalipeda kuzisusi zibi zyamubili, mubusindya bwakupona mubusofwazi bwazibi boonse.

20 Tee mwakamwiiya pe Kkirisitu munzila eeyo! 21 Kandiyeeya kuti mwakamvwa atala anguwe alimwi mwakayiisigwa mulinguwe, mbuli kasimpe kali muli Jesu. 22 Amuleke chiimo chanu chikulukulu eecho chizwa kubuumi bukulukulu alimwi bukompeme mukwiinda munjalalando ziyunga, 23 mpawo muchitululwe mumuuya yamumizeezo yanu, 24 alimwi akusama chiimo chipya, eecho chilengedwe muchiimo chaLeza mukasimpe kabusalali abululami.

25 Nkikaako, amuleke bubeji, muntu woonse aambuule kasimpe angwaayakilene aawe, nkaambo iswe tulizizo zyamubili uumwi. 26 Amunyeme pesi mutabisyi; mutabbizyi zuba kamunyemede, 27 alimwi utamupi mweenya Sikuchenga. 28 Ooyo mubbi atachinoobbi limbi pe, pesi abeleke, kachita milimu isyomekede amaboko aakwe, kuchitila kuti akonzye kupa aabo babula. 29 Kutazwi twaambo tubi mumilomo yanu, pesi buyo aayo mabotu kukuyaka, mbuli mbukweelede aawo, kuti zikape luzyalo kulibaabo bamvwa. 30 Alimwi mutanyemyi Muuya Usalala waLeza, mulinguwe mwakasinizigwa nkaambo kabuzuba bwakunununwa. 31 Amuleke mfwindiilili zyoonse abukali akunyema akukalala amatusi azizwe akati kanu, amajwi ataluleme woonse, 32 amube abuuya kuli wumwi awumwi, mube amoyo mutete, mulekelelane, mbuli Leza kwiinda muliKkirisitu mbwakamulekelela.