1 Enyishondya mʉmɨnye kw'enyɨyagatsya kʉtsɨbʉ bʉshana nemwe, na bʉshana n'abɨkɨrɨtsya b'iLaotikia, na bʉshana n'aboshi bo bathahera banyɨshʉngako. 2 Enyishondya nyɨthɨ emɨthɨma yabo yotsulemo muhwa, na bagende abatsɨɨrana mʉ bʉgʉma, na babone obushoki bwoshi bw'ekwenene bo bʉlethwa n'obwenge bulumirire bʉshana bamɨnye olʉfʉmɨ lwa Gongo. N'olʉfʉmɨ olo ni Kirisito yowene-wene. 3 Kʉshangwa obushoki boshi bw'erithegekania na b'obwenge bibishirwe mw'Ɨye. 4 Enyɨbabwɨra bɨno bʉshana omʉndʉ athabathɨmaga mo bɨnwa bɨwe by'ekishehya bya mabesɨ. 5 Na monyɨthanalɨ hagʉma nemwe mo mʉbɨrɨ, nyɨrɨ hagʉma nemwe mo mʉthɨma. Kandɨ nyimogire erɨbashʉnga ni mwimene n'ɨtsɨbʉhɨrɨra kʉbʉya mo lwɨkɨrɨtsyo lwenyu mʉ Kirisito.

6 Na kʉshangwa momwatsɨga Yesʉ Kirisito nga Nyinya-kowethʉ, mubyeho mo bʉgʉma hagʉma naye. 7 Mulashye mirihi mw'ɨye, na muhire obʉyɨngo bwenyu boshi mw'ɨye. Mwimane kʉbʉya ebɨro byoshi mo lwɨkɨrɨtsyo ɨkwamana n'amakangɨrɨtsya mwahabawa. Na mubye bandʉ b'erɨsɨma kʉtsɨbʉ. 8 Mubye mesho. Hathabyaga mʉndʉ w'ɨbathɨma mo bwenge bʉwe bwa mabesɨ magegene. Yo uyinihire emɨbere y'abandʉ n'emɨtsɨmʉ mɨbɨ yo yɨthegeka ekɨhʉgo, hewethuwe ɨthagemere ko makangɨrɨtsya wa Kirisito. 9 Kʉshangwa Gongo ɨye woshi alɨ mʉ Kirisito, emwishi s'omʉbɨrɨ ʉwe, 10 nemwe kw'ɨtsʉkɨra Ɨye momwahabwa obʉthʉnganene. Ɨye nɨ mʉkʉlʉ w'obuthegeki boshi n'amaka woshi. 11 Mw'ibya mo bʉgʉma naye mwamalire ɨmona. Lɨthalɨ imonibwa na minwe ya bandʉ, hewethuwe mwamamonibwa na Kirisito, n'erimonibwa eryo, lyamabashabʉla ɨthoka mo mɨbere enyu y'obʉthethera bw'omʉbɨrɨ. 12 Aho, mwabere mwabatisibwa, mo mwathabwa hagʉma na Kirisito, na kuthyo mo mwalubuka hagʉma naye. Kʉshangwa momwɨkɨrɨtsya amaka wa Gongo wa mulubukaya mo baholi.* 13 Kera mwabyaga baholi bʉshana n'ebɨbɨ byenyu, mwabyaga bandʉ bathamwene, kandɨ bandʉ b'ebɨhanda. Hewethuwe lɨno Gongo mwabalubukya hagʉma na Kirisito. Mwathʉganyɨra ebɨbɨ byethʉ byoshi. 14 Mwaberenga amarʉba w'eminda y'ebɨbɨ byethʉ n'amathegeko ow'abyaga athusitakire, mwatsimyawo kundu mw'ɨkongomererabyo ko mʉsalaba. 15 Nɨ bathyo ko Gongo ashamʉlaga amaka w'abakʉlʉ n'awabathegeki, mwahemʉlabo embere s'abandʉ mw'ɨkʉrabo nga bandʉ ba muliki, kinzekule ky'erɨsɨndana lya Mʉgala ʉwe. 16 Aho, kuthabyaga mʉndʉ yo wabasoha bʉshana n'ebyo omulya kʉtse ebyo omʉshoma kʉtse linye, kʉtse linye lya mwetsɨ muhya kʉtse kɨrokya Sabato.* 17 Ebɨndʉ byoshi ebyo ni kithuthu ky'ebɨndʉ byo bihika, hewethuwe ekwenene y'ebyoshi ebyo ni Kirisito. 18 Mʉthatsɨgaga ɨsohwa na mʉndʉ woshi-woshi yo uyikangya ko nɨ mʉlonvʉ, n'oyo uramya abamalaɨka. Omʉndʉ w'omʉhanda oyo ayɨkethere ebyo athashʉnga mo humanani, naye ayɨhala bʉsha, bʉshana n'emɨganɨtsye yɨwe nga mʉndʉ, 19 omʉndʉ oyo athalɨ kʉ Kirisito, na Kirisito oyo yo muthwe w'omʉbɨrɨ. Ni ko bushondoli bʉwe, kw'omʉbɨrɨ woshi analɨsɨbwa kʉbʉya n'ihindanibwa hagʉma ly'ebɨthambo n'emiki yawo, nawo niabya nga ko Gongo ashondya.

20 Momwafwa hagʉma na Kirisito n'ɨshabʉlwa ɨthoka mo kagala k'emɨtsɨmʉ ya hano ishi*. Ewono, bʉshana na ki omʉshʉbabya ng'abandʉ b'omo kɨhʉgo kɨno mʉlɨ omʉkwama amathegeko alɨ ng'ano? 21 «Mʉthawathaga kw'eki», «mʉthagetsyaga kɨra», «mʉthakolaga kw'eki.» 22 Ebyoshi ebyo nɨ bɨndʉ ebɨnabɨha byakolesɨbwa, ebyo ni hamuli na makangɨrɨtsya w'abandʉ. 23 Kwenene eso hamuli etho esɨnashʉngɨka nga sa buthegekania kʉshangwa sɨthokene n'eriramya lya abandʉ abo, hagʉma n'obʉlonvʉ bwabo n'esohamuli sabo s'erɨgatsya omʉbɨrɨ. Hewethuwe sithawithe kagala k'ɨkakɨtsya eso ngʉmbʉ s'omʉbɨrɨ.