1 Nemwe mo muwithe ko bakobe, mʉgende omʉkolerabo mo bʉthʉnganene na mo kwenene. Mwɨbʉke ko nemwe muwithe Nyinya-kowenyu mo lʉbʉla.

2 Mʉyɨtsɨnge ko mɨshabe. Mʉlɨ omʉshaba, mubye mesho n'ɨsɨma Gongo. 3 Na kuthyo mʉthʉshabɨre bʉshana Gongo athʉkɨngʉlɨre enzɨra y'erɨkangɨrɨtsya ekɨnwa kɨwe, n'ikumbula olʉfʉmɨ lwa Kirisito. Nɨ bʉshana n'ebyo nyɨrɨ mʉndʉ wa muliki lɨno. 4 Aho mʉnyɨshabɨre bʉshana nyikotsye ɨgenda enyɨnegena ko lʉfʉmɨ n'ikanganialo kʉbʉya-kʉbʉya nga ko nyihamulirwe. 5 Mʉgende n'obwenge embere s'abo bathalɨ bakirisito, n'ɨkolesa endambi muwithe yo kʉbʉya. 6 Ebɨnwa byenyu bɨgende ebibya bɨbʉya ebɨro byoshi na byo bɨtholere, na mʉgende omʉmɨnya erɨshʉbɨtsya obʉlɨ mʉndʉ yo kʉbʉya.

7 Mʉgala ethʉ mʉtsɨɨrwa ye Tikiko, mukoli mulikyethu w'iyinihirwa yo thʉkola naye omʉlɨmo wa Nyinya-kowethʉ, andabafʉlɨra omwatsɨ aye woshi. 8 Nyabathʉmɨra ɨye bʉshana abafʉlɨre emyatsɨ ethʉ n'ibashikya mɨthɨma. 9 Aherekeretsɨbwe na Onesime*, mʉgala ethʉ mʉtsɨɨrwa na w'iyinihirwa, ɨye nɨ mʉgʉma wa mw'imwe. N'ɨbo bo bababwɨra ebɨnwa byoshi byo bɨtsʉka hano. 10 Sɨtarɨko y'uminirwe hagʉma nagye, amabaketsya. Na kuthyo Marɨko, mʉsara wa Barɨnaba naye abaketsya*. Mwamalire ɨthegekwa bʉshana naye, amahika kowenyu ni mwamukokya kʉbʉya. 11 Na Yesʉ y'ʉnahʉlwamo Yʉsʉto, naye kuthyo abaketsya. Abandʉ bashathʉ abo basha bona bakirisito bo bathoka mo Bayuta bo bakola hagʉma nangye bʉshana n'obwamɨ bwa Gongo. Nabo abanyishikya mʉthɨma kʉtsɨbʉ. 12 Na Epafʉra* mbʉthɨrwa y'okowenyu naye abaketsya. Naye ni omukoli wa Yesʉ Kirisito athalɨ alʉha mw'ɨbashabɨra bʉshana mʉtsɨbʉhe na mubye bandʉ bashikire kʉbʉya mo bɨnwa bya Gongo, na mʉgende omʉkola erishondya lya Gongo. 13 Nyɨrɨ mutimo w'ebyo akola, ayinubya mw'ɨkola mʉlɨmo n'omuhwa mʉngɨ bʉshana nemwe na bʉshana n'abagala bethʉ b'iLaotikia na b'iHierapoli*. 14 Omʉshake Luka mwira ethʉ na Tema ababaketsya* 15 Mʉketsye bagala bethʉ na balɨ bethʉ bɨkɨrɨtsya b'iLaotikia, na Nimufa na akanisa ko kanahindana mo nyʉmba yɨwe. 16 Amarʉba ano abya amamala ɨsomwa kowenyu, mʉkole kagala kenyu koshi, amarʉba ayo ayasomerwe na mo kanisa k'iLaotikia. Nemwe kuthyo mʉsome amarʉba wo athathoka iLaotikia. 17 Mʉbwɨre ye Arikipo mʉthɨ akole kʉbʉya omʉlɨmo ahabawa na Nyinya-kowethʉ. 18 Ingye Polo nyamabathʉmɨra engetsyo aye, eyo nyamashaka mo minwe aye ingy'owene. Mʉthɨbɨrɨrawa ko nyikinaminire. Olʉkogo lwa Gongo lubye hagʉma nemwe.