1 Kʉshangwa mwamalire ilubukibwa ɨthoka mo baholi n'ibyaho hagʉma na Kirisito, ewo mʉgende omushondya ebɨndʉ bɨrɨ elʉgʉlʉ, eyo Kirisito ikere ko malyo wa Gongo. 2 Mʉgende omushondya ebɨndʉ bɨrɨ elʉgʉlʉ, hewethuwe mʉthagenda omushondya ebɨndʉ bya hano ishi. 3 Kʉshangwa mʉlɨ baholi, n'obʉyɨngo bwenyu bubishirwe hagʉma na Kirisito mʉ Gongo. 4 Obʉyɨngo bwenyu bw'ekwenene nɨ Kirisito, n'ekɨro andahʉlʉka nemwe kuthyo mwandahʉlʉka hagʉma naye mo lʉkengerwa lʉwe.

5 Aho mwithe ebyoshi bya hano ishi ebɨrɨ mw'imwe: Orʉsɨngɨ, emɨkonzɨ, mɨganɨtsye mɨbɨ, ngʉmbʉ nyɨbɨ, n'erɨtsɨɨra esofaranga so kʉtsɨbʉ, nalyo lɨrɨngene n'eriramya ebishoshani. 6 Nɨ ebɨbɨ bɨrɨ ng'ebyo byo bɨnaletha obʉhɨthane bwa Gongo ko bandʉ bo bathamushikitsye. 7 Muthyo ko mwagenda omʉyɨwatha kera, mwabere mʉkɨnathegekawa n'ebɨtsɨbʉ. 8 Hewethuwe lɨno, nemwe kuthyo, mʉthɨnde ebɨndʉ byoshi bɨno: obʉhɨthane, ɨhɨthɨkɨrana n'obʉbɨ, ɨlega mʉndʉ kʉtse ebɨnwa bɨthatholere bɨthathokaga mo mʉnʉ enyu. 9 Mʉthahambɨkanaga imwe kw'imwe, kʉshangwa imwe mwamalire ithokya omʉndʉ wa kera hagʉma n'emɨbere yɨwe yoshi. 10 Kuthyo mwamalire ɨambala omʉndʉ muhya-muhya yo Gongo Muhangiki ethʉ anagenda ahɨndʉla, bʉshana mʉmʉmɨnye kʉbʉya-kʉbʉya. 11 Aho, hathakɨrɨ ndondogoli mo kathi k'abandʉ b'ebɨhanda n'aBayuta, bo bamwene na bo bathamwene, abageni, abasenzi, abakobe na bo bathalɨ bakobe. Hewethuwe Kirisito yo byoshi naye alɨ mo bandʉ boshi. 12 Bʉshana n'ekyo, kʉshangwa imwe mʉlɨ bandʉ ba Gongo babuyirire, ɨye mwabwanza n'ɨbashombola bʉshana naye yowene. Bʉshana n'ekyo, mubye na mʉthɨma w'eshashi, na bʉbʉya, n'eriyihohya, n'obʉlonvʉ, n'erishikya omʉthɨma. 13 Mʉthagenda omʉkwamɨrɨrana na mʉgende omʉganyɨrana imwe kw'imwe, na mʉndʉ amabya na kɨnwa ky'erisitakira mulikyabo, mʉganyɨrane imwe kw'imwe, nga ko Nyinya-kowethʉ abaganyɨraga*. 14 Na kalengyo ko bɨnwa byoshi ebi, mubye n'olwanzo, kʉshangwa olwanzo lolunahindania abandʉ babye mo bʉgʉma obʉthʉnganene. 15 N'obʉholo bwa Kirisito bwikale mo mɨthɨma enyu. Na bʉshana n'obʉholo obo, Gongo mwababɨrɨkɨra ibya nga bɨthambo bya mʉbɨrɨ mʉgʉma. Na mubye bandʉ b'erɨsɨma. 16 Ekɨnwa kya Kirisito kibye mo mɨthɨma enyu hagʉma n'obushoki bʉwe bwoshi. Mukangiritsanie n'ɨhanana mo buthegekania bwoshi. Mwimbire Gongo yo nyimbo mo mɨthɨma enyu yoshi hagʉma n'ɨmʉsɨma mo sosaburi na mo nyimbo s'erisingya na mo nyimbo so sɨshondolerwe n'oMʉthɨma Mwerʉ.* 17 Bʉlɨ kɨndʉ kyo mʉnegena kʉtse ky'omʉkola, mʉkole ebyoshi mw'ɨtsɨna lya Nyinya-kowethʉ Yesʉ mw'ɨsɨma Gongo Thatha ɨtsʉkɨra Kirisito.

18 Imwe bakatsɨ, mʉgende omushikya abw'iba enyu, nga ko lɨtholere embere sa Nyinya-kowethʉ. 19 Nemwe bayira, mʉtsɨɨre abakatsɨ benyu, mʉthagenda omʉkaramɨrabo. 20 Imwe bana mʉgende omushikya ababuthi benyu mo byoshi, kʉshangwa ekyo ekinamoya Gongo. 21 Nemwe bo thatha mʉthagenda omuhithania abana benyu, bʉshana bathalemerawa. 22 Nemwe bakobe mʉgende omushikya abo nyinya-kowenyu ba hano ishi mo byoshi. Mʉthakolaga muthyo mo ndambi babashungire mw'imoyabo, he mushikyebo n'omʉthɨma akwirire, bʉshana n'olushikyo lo mʉlɨ nalo kʉ Nyinya-kowethʉ. 23 Na bʉlɨ kɨndʉ omʉkola, mʉkolekyo na mʉthɨma akwirire, nga bandʉ bo bakolera Nyinya-kowethʉ, hewethuwe bo bathalɨ abakolera bandʉ. 24 Mwɨbʉke ko Nyinya-kowethʉ andabaha olʉhembo abikire abandʉ bʉwe*. Kʉshangwa Kirisito yo Nyinya-kowethʉ w'ekwenene yo mʉkolera. 25 Hewethuwe yo ʉkola ebɨbɨ andahembwa ɨkwamana n'ebɨbɨ akolaga, kʉshangwa Gongo athathondogola*.