1 Sulemani a sigi fisamantenna.

2 N sunbu marafan sunbuni!

Amasɔtɔ i ya xanuntenyaan ɲaxun dangu manpaan na.

3 I ya latikɔnɔnna xirin ɲaxun.

I xinla luxi nɛn

alo latikɔnɔnna naxan xiri sigama ayi.

Nanara, i rafan sungutunne ma.

4 N suxu n yiin ma!

En na en gi!

Mangan bata n xali a konni.

Nxu ɲaxanma,

nxu sɛwa i ya fe ra,

nxu i ya xanuntenyaan matɔxɔma nɛn dangu manpaan na.

Yoon sungutunne xa,

i rafan e ma!

5 Yerusalɛn sungutunne,

n fatin nan gbeelixi,

koni n nayabu

alo Kedari kaane bubu fɔrɛne,

alo Sulemani a dugin naxanye singanxi a banxini.

6 Koni, i nama n mato,

n to gbeelixi.

Sogen nan n fatin gbeelixi.

Ngaa dii xɛmɛne nan xɔlɔxi n ma,

e yi n findi manpa bili nakɔ kantanna ra.

Koni n mi n yengi luxi n yɛtɛna nakɔɔn xɔn.

7 A fala n xa,

i tan naxan nafan n ma n bɔɲɛni,

i fa i ya xuruse kurun nabama dɛnaxan yi,

hanma i e luma dɛnaxan yi yanyi tagini

alogo n nama lu i fenɲɛ na xun xɔn

alo ɲaxalan kobina

i xɔyine xuruse kurune dɛnaxan yi.

8 Xa i mi na kolon,

i tan naxan tofan ɲaxanle birin xa,

siga i ya sii diine rabɛ yɛxɛɛ kurune funfun xɔn,

xuruse kantanne bubune dɛxɔn.

9 N nafan ɲaxanla,

i luxi nɛn n yɛɛ ra yi

alo soo gilɛ faɲin naxanye Misiran mangana yɛngɛ so wontoron bandunma.

10 I xadene rayabu tunlasone longonna ra,

i kɔɛɛn nayabu ɲɛrɛni.

11 En tunlaso xɛma daxine rafalama nɛn i xa,

naxanye rayabuxi gbeti wuredine ra.

12 Mangan yi a dɛgema waxatin naxan yi,

n ma latikɔnɔnna xiri faɲin yi sigama a ma.

13 N nafan muxun luxi nɛn n xa

alo mirihi latikɔnɔnna se sa seen kui

naxan singanxi n xiɲɛ longonna ra.

14 N nafan muxun luxi n xa nɛn

alo se fuge faɲine

keli manpa bili nakɔne yi En-Gedi yamanani.

15 I rayabu, n nafan ɲaxanla,

i rayabu han!

I yɛɛne rayabu alo ganbane.

16 N xanuntenna, i tofan,

i rayabu han!

En saden findixi sɛxɛ xindene nan na.

17 Suman yiine nan en xunna soon na,

fɔfɔ binle yi findi banxi kankene ra en xa.