1 I tan ɲaxanla

naxan tofan birin xa,

i xanuntenna sigaxi minɛn?

I xanuntenna a xun tixi minɛn na,

alogo nxu fan xa sa a fen i xa?

2 N xanuntenna bata siga a nakɔni,

sansi xiri ɲaxumɛ yireni

alogo a xa a xuruseene raba mɛnni,

a yi sansi fugaxina ndee malan.

3 N xanuntenna gbeen nan n na,

n fan gbeen nan a ra,

a nɛma a xuruseene rabama sansi fugaxine tagi.

4 N nafan ɲaxanla,

i rayabu alo Tirisa taana,

i rayabu alo Yerusalɛn taana,

koni i magaxu alo sofa ganla.

5 I yɛɛn ba n na

alogo e nama n xaxinli fu.

I xunsɛxɛn saxi a ma

alo sii kurun nɛma godɛ Galadi geyaan na.

6 I ɲinne fixa

alo yɛxɛɛ kurun naxanye kelima e maxadeni.

E lanxi e boden ma

firin firin yɛɛn ma alo gulunne.

E keden pe mi baxi e bode ma.

7 I xaden nayabu

alo girenada wudi bogini xabaxina a tagi

hali dugin bata so i yɛtagin xun na.

8 Mangan nɔɛ ɲaxalan manga tonge sennin sɔtɛ nɛn,

e nun konyi ɲaxalan tonge solomasɛxɛ,

e nun sungutun wuyaxi

naxanye xasabi mi nɔɛ kolonɲɛ,

9 koni n tan ɲaxalan keden peen nan kolon.

N ma ganbadin na a ra,

fɛ mi ɲaxanla naxan na.

A keden peen nan a nga yii dii tɛmɛn na.

A nga a tan nan nafisaxi a diine birin xa.

Sungutunne to a to,

e a sɛwana fe fala nɛn,

mangana ɲaxanle nun mangana konyi ɲaxanle fan yi a matɔxɔ.

10 E naxa, "Nde ito ra

naxan fama alo subaxana,

a rayabu alo kikena,

a mayilenma alo sogena,

koni a magaxu alo sofa ganla?"

11 N bata siga nakɔni kantin yireni,

alogo n xa sa se solixine mato xuden dɛ,

alogo n xa a to xa manpa binle maɲingima,

xa girenada wudine bata fuga.

12 Anu n mi a kolon naxan a ligaxi,

n fa n yɛtɛ rasoxi yamaan kuntigine yɛngɛ so wontorone tagi.