1 I rayabu,

n nafan ɲaxanla, i rayabu.

I yɛɛne rayabu alo ganbane

hali dugin soxi i yɛtagin xun na.

I xun sɛxɛn saxi a ma

alo sii kurun nɛma godɛ Galadi geyaan ma.

2 I ɲinne fixa alo yɛxɛɛ kurun

naxan xabe baxi maxabadeni

naxanye kelima e maxadeni.*

E lanxi e boden ma firin firin yɛɛn ma

alo gulunne, e keden pe mi baxi.

3 I dɛ kidine luxi alo luti gbeela,

i dɛɛn tofan han!

I xaden nayabu

alo girenada wudi bogini xabaxina a tagi

hali dugin bata so i yɛtagin xun na.

4 I kɔɛɛn maxidixi

alo Dawudaa sangansona,

sofane yɛngɛ so wure lefa wuli kedenna singanxi naxan na

alo ɲɛrɛna i kɔɛ ra.

5 I xiɲɛ firinne rayabu

alo bolen dii gulun firinne,

naxanye e dɛgema sansi fugaxine tagi.

6 N sigama nɛn na mirihi latikɔnɔnna nun wusulanna yireni

han kuye yiba, dimin yi siga.

7 N xanuntenna, i rayabu,

fɛ yo mi i ra.

8 N ma ɲaxalandi masuxina,

fa n fɔxɔ ra

keli Liban yamanani Amana geyaan xuntagi,

Xerimon geyaan nun Seniri geyaan xuntagi,

yatane xiin dɛnaxan yi,

burunna ɲarine geyane.

9 I n bɔɲɛn nadinma,

i tan sungutunna,

n ma ɲaxalan masuxina,

i na i yɛɛn ti n na keden pe

i n bɔɲɛn nadinma nɛn.

Hali i ya ɲɛrɛn xɔri keden pe,

a na ligɛ n na.

10 I ya xanuntenyaan ɲaxun,

i tan sungutunna,

n ma ɲaxalan masuxina,

i ya xanuntenyaan ɲaxun

dangu manpa faɲin na,

i ya latikɔnɔnna xirin ɲaxun

dangu se xiri ɲaxumɛne birin na.

11 N ma ɲaxalan masuxina,

i dɛɛn ɲaxun alo kumina,

nɔnɔn nun kumin nan i lɛnna bun,

i ya dugine xirin luxi nɛn

alo Liban wudi xiri ɲaxumɛne.

12 I tan sungutunna,

n ma ɲaxalan masuxina,

i luxi nɛn alo n ma nakɔ masansanxina,

n ma tigina,

n ma ige miniden naxan namaraxi n keden peen xa.

13 I fan

alo sansi faɲin sixi nakɔɔn naxan yi,

alo girenada binla

naxanye bogi faɲine raminima,

e nun henna binle

nun naradi sansi xiri faɲina,

14 naradin nun sansi fuge nɛri fuɲiramaan

nun gbala xiri ɲaxumɛne

nun sinamon wudi xiri ɲaxumɛne,

e nun wusulanna kelixi wudin naxanye birin ma

e nun mirihi latikɔnɔnna nun wudi ige xiri ɲaxumɛne

nun sansi xiri ɲaxumɛ faɲine birin.

15 I luxi nɛn alo nakɔ yi tigina,

alo xude xunna naxan godoma

keli Liban geyane ma.

16 Foye faɲin xa fa

sa keli kɔmɛnna nun yiifanna ma,

e yi n ma nakɔɔn xiri faɲin nasiga ayi

alogo n nafan muxun xa fa so a nakɔni,

a yi a bogise faɲine don!