1 Efirami bɔnsɔnna na yi falan ti,

birin yi gaxuma nɛn.

A yi binyaxi nɛn Isirayila yi.

Koni a findi sɔn kanna nan na

a Baali suxuren batu, a faxa.

2 Iki e mɔn yulubin nan ligama,

e sawurane rafalama gbeti xulunxin na.

E kɔta suxure rafaladeni,

koni xabuna wanla gbansanna nan e ra.

A falama e ma

a e adamane bama saraxan na!

Koni ɲinge dii suxuren tan,

e na tan sunbuma!

3 Nanara, e ɲanma nɛn

alo xɔtɔn ma kundana,

alo xiila naxan yolonma xɔtɔnni,

alo foyen se gbaxan naxan xalima lonna fari ma,

alo tutin naxan minima banxi sulunna xɔn.

4 Alatala nan n tan na, i ya Ala,

naxan i raminixi Misiran yamanani.

I nama ala gbɛtɛ kolon

fɔ n tan.

I rakisima mi na fɔ n tan.

5 N yengi saxi i xɔn tonbonni, bɔxɔ xareni.

6 Koni, n to e balo, e yi lugo.

E to lugo, e bɔɲɛn yi waso ayi.

Nanara, e ɲinanxi n xɔn.

7 N luma nɛn e xa alo yatana,

alo burunna ɲarina,

n yi e suxu kiraan xɔn.

8 N na e suxuma nɛn

alo sube xaɲɛn naxan ma diiye baxi a yii.

N yi e bɔɲɛni bɔ.

N yi e don alo yatana.

Burunna subene e yibɔma nɛn dungi dungin na.

9 Isirayila, i ya kalan ni i ra,

bayo i kelixi nɛn n xili ma,

n tan, i ya mali ti faɲina.

10 Iki, i ya Mangan minɛn?

A xa i rakisi i ya taane birin yi!

I ya kitisane minɛn,

i yi a falama naxanye fe ra

"Mangan so nxu yii e nun kuntigine?"

11 N bata Mangan so i yii n ma xɔlɔni,

n na a bama nɛn i yii n ma xɔlɔni.

12 Efirami bɔnsɔnna hakɛn nun a yulubin namaraxi.

13 Tɔrɔne fama nɛn a ma

alo ɲaxanla kuiin na keli a ra.

Koni dii xaxilitaren na a ra.

A bari waxatin na a li,

a mi tinɲɛ barɛ.

14 N na e xunbama nɛn laxira sɛnbɛni,

n yi e xunsara sayani.

Faxana, i ya fitinan minɛn?

Sayana, i ya faxa ti sɛnbɛn minɛn?

N mi fa kininkininma.

15 Hali a to sabatixi a ngaxakedenne tagi,

Alatala sogetede foyen nafama nɛn keli tonbonni,

a tigine nun xɔɲinne xɔri.

E se xɔri ramaraden kui gelima nɛn.