1 Isirayila kaane,

ɛ Alatalaa falan namɛ!

Amasɔtɔ kitina Alatala nun ɛ tan tagi.

A naxa, "Lannaya mi fa na.

Hinan mi na.

Ala kolon mi fa yamanani ito yi.

2 Dangan nun wulen nun faxan nun muɲan nun yalunyaan nan na.

Gbalon bata gbo ayi,

faxan tima a bode fari."

3 Nanara, ɛ yamanani xarama nɛn,

a niimaseen birin yi xɔsi.

Subene nun xɔline,

hali baa yɛxɛne fan faxama nɛn.

4 Koni muxu yo nama matandin ti,

muxu yo nama yamaan mafala,

amasɔtɔ kitina nxu nun saraxaraline nan tagi.

5 Ɛ tan saraxaraline nun nabine tantanma kɔɛɛn nun yanyin na.

Nanara, n na ɛ nga Isirayila faxama nɛn.

6 N ma yamaan bata kala,

amasɔtɔ kolonna dasaxi a ma.

Bayo ɛ bata ɛ mɛ kolonna ra,

n bata ɛ ba n ma saraxaraliyani.

Bayo ɛ bata ɛ Alaa sariyan nabeɲin,

n fan bata ɛ diine rabeɲin.

7 Saraxaraline nɛma wuyɛ ayi,

e yulubine fan gboma ayi.

Nanara, n na e binyen masarama nɛn yagin na.

8 E lugoma n ma yamaan yulubine xɔn.

Yamaan hakɛne e nii yifanma e ma.

9 A ligama nɛn saraxaraline ra alo yamana,

n yi e kɛwanle saran e ra.

10 E e dɛgema nɛn,

koni e mi lugoma.

E suxurene batuma,

koni ne mi e rasabatima.

Amasɔtɔ e bata Alatala rabeɲin,

e yi e sɔbɛ so 11 yalunyaan ma

e nun dɔlɔ fonna nun dɔlɔ nɛnɛ minna.

Ne nan e xaxinla kalaxi.

12 N ma yamaan suxure wudine maxɔdinma,

alo dunganna nan falan tiyɛ e xa.

Amasɔtɔ yalunya xaxinla bata e ralɔ ayi,

e yalunyaan ligama Ala ra.

13 E saraxan bama geya gbeene xuntagi.

E wusulanna ganma geyane fari,

xanamu warine nun wudi tofaɲine nun kondene bun ma,

e nun wudi belebelen naxanye ninin gbo.

Nanara, ɛ dii tɛmɛne yalunyaan ligama

e nun yalunden nan ɛ bitan gilɛne ra.

14 N mi ɛ dii tɛmɛne yulubine saranma e ra

bayo e yalunyaan ligama,

hanma ɛ bitan gilɛne

bayo yalunden nan e ra.

Bayo ɛ tan yɛtɛn yalunyaan ligama ɛ nun yalundene,

ɛ nun ɲaxalan yalunxine saraxan bama.

Yama xaxilitarena a gima a bɔnɔni.

15 Isirayila, xa i lu yalunyani,

ɛ nama Yuda ti hakɛn ma,

ɛ nama siga Giligali yi,

ɛ nama te Beti-Aweni yi.*

Ɛ nama ɛ kɔlɔ Alatala xinli!

16 Xa Isirayila murutɛxi

alo ɲinge mataganxina,

Alatala xa e masuxu di?

Alo yɛxɛɛdina mɛrɛmɛrɛ faɲin ma.

17 Efirami bɔnsɔnna muxune bata kankan suxure batun ma, e lu na!

18 Xa e minseene bata dasa,

e sa dangu yalunyaan ma.

E mangane waxi yagin nan xɔn.

19 Nanara, wuluwunla e xalima nɛn,

e yi yagi e saraxane fe ra.