1 Saraxaraline, ɛ ito ramɛ!

Isirayila kaane, ɛ liga ki faɲi!

Mangana denbayana,

ɛ tuli mati!

Amasɔtɔ kitina ɛ tan nan xili ma.

Ɛ bata findi woson na Misipa yi,

e nun luti ratixina Taboro geyaan ma.

2 Ɛ bata yili tilinxin ge yamaan yɛɛ ra Sitimi yi.

Koni n tan na feen saranma ɛ birin na nɛn.

3 N na Efirami bɔnsɔnna kolon,

Isirayila mi luxunxi n ma.

Bayo iki, Efirami bɔnsɔnna,

ɛ bata yalunyaan liga.

Isirayila bata a yɛtɛ raxɔsi.

4 E bata kankan e kɛwanle ma,

e mi fa xɛtɛma e Ala ma.

Amasɔtɔ yalunya xaxinla bata so e yi,

bayo e mi fa Alatala kolon.

5 Isirayilaa wason nan sereyaan bama a xili ma.

Isirayila nun Efirami bɔnsɔnna muxune dagalanma ayi nɛn e hakɛni,

Yuda fan birama nɛn e fɔxɔ ra.

6 E na e yɛxɛɛ kurune nun ɲingene ba saraxan na,

e Alatala fen,

e mi a toɛ mumɛ

bayo a bata keli e yɛ.

7 E bata tinxintareyaan liga Alatala ra,

e diine bari e yangane xa.

Iki, kike keden peen nan luxi,

e bɔxɔn yi kala.

8 Ɛ xɔtaan fe Gibeya yi,

ɛ xɔtaan fe Rama yi!

Ɛ yɛngɛ so sɔnxɔni te Beti-Aweni yi!

Bunyamin kaane, yaxune ɛ xanbi ra!

9 Efirami bɔnsɔnna kalama nɛn Fe Saran lɔxɔni.

N ɲɔndin nan falama Isirayila bɔnsɔnne xa iki.

10 Yuda kuntigine bata liga

alo naxanye e bɔxɔn dan gɛmɛne maxɛtɛma.

N ma xɔlɔn fama e ma nɛn alo fufana.

11 Efirami bɔnsɔnna ɲaxankataxi,

a yalagixi,

bayo a biraxi fe fune nan fɔxɔ ra.

12 N bata Efirami bɔnsɔnna tɔrɔ alo setena,

e nun Yuda bɔnsɔnna alo furena.

13 Efirami bɔnsɔnna to a furen to,

Yuda bɔnsɔnna to a furene dɛɛne to,

Efirami bɔnsɔnna yi siga Asiriya yamanani,

a xɛraan nasiga Manga Gbeen ma a mali feen na.

Koni a mi nɔɛ ɛ rakɛndɛyɛ,

a mi nɔɛ ɛ furen dɛɛne raxunbelɛ.

14 Amasɔtɔ, n luma nɛn

alo yatana Efirami bɔnsɔnna xa,

alo yata gbeena Yuda bɔnsɔnna xa.

N ne yibɔma nɛn, n siga e ra,

muxu yo mi e bɛ n yii.

15 N mɔn xɛtɛma nɛn n dɔxɔdeni,

han e yi e ti e sɔnne ra,

e n fen.

E na tɔrɔ tun,

e n fenma nɛn.