2 KINGS 10

Pi’in owchen Ahab nni thang e pogofan rorad

1 Immoy medlip i ragag e pi’in owchen Ahab ni Pilung ni ur pired u lan fare binaw nu Samaria. Me yoloy Jehu bangi babyor nge yo’ornag yang nge pi’ yuyang nge yan ngak e pi tagagiyeg ko fare binaw, nge ngak e pi’in tayugang’, nge ngak e pi’in yad ma chathowliy e pi’in owchen Ahab. Regi babyor ney e be ga’ar riy: 2 "Gimed e bmilfan ngomed e pi’in owchen fare pilung, ma bay u pa’med e pi chariot, os, talin e cham, nge pi binaw ni kani yororiy ni fan ko mael. Ere, yug nap’an nra taw e regi babyor ney ngomed, 3 ma ngam mel’eged e cha’ nra bung ni nge pilung u fithik’ e pi’in owchen fare pilung, ngam pilung niged, mi gimed yororiy ko cham nra yib ngak."

4 Fapi tagagiyeg nu Samaria e rrusgad nib gel. Me lungurad, "Urgon ni ngad togopluwgad ngak Jehu, ni fa’anra de yag rok Joram ni Pilung fa Ahaziah ni Pilung?" 5 Ere fare tolang ko salthaw nib milfan fare tafen e pilung ngak nge fa en nib ga’ nib milfan fare binaw ngak, nib mu’un fapi tolang u girdi’en fare binaw ngay nge fapi tachathowliy e pi’in owchen Ahab, e ra pi’ed e re thin ney ngak Jehu: "Gamad e pi tapigpig rom, ma kug fal’eged rogomad ni ngug rin’ed urngin e tin ga ra yog. Machane dab gu ted be’ nge mang pilung; mu rin’ e n’en ni ga be leamnag ni bfel’."

6 Miki yoloy Jehu bang e babyor nge yan ngorad: "Fa’anra gimed bay u ba’ rog ma kam fal’eged rogomed ni ngam rin’ed e tin ni gu ra yog ni ngam rin’ed, me ere mu feked lolugen e pi’in owchen Ahab ni Pilung i yib ngog nga Jezreel ko ngiyal’ney gabul."

Fa medlip i ragag i pi’in owchen Ahab ni Pilung e urmed u tan pa’ e pi tayugang’ nu Samaria, ni yad e ur chugliyedrad. 7 Nap’an ni taw fare gi babyor rok Jehu ngorad, me thang e pi tayugang’ nu Samaria e fan rok fa medlip i ragag i pi owchen Ahab ni gubin, min tay lolgurad ngalan bogi dug, mar pi’ed nge yan ngak Jehu nga Jezreel.

8 Ma nap’an nnog ngak Jehu ni kani fek i yib fapi llug ni lolugen e pi’in owchen Ahab, me yog ni ngan tay ni l’agruw ulung u langan e garog ko fare binaw min digey u rom nge yani kadbul u reb e rran. 9 Me kadbul me yan ko fare garog me ga’ar ngak fapi girdi’ ni yad bay u rom, "I gag e cha’ ni gu makath nib togopluw ngak Joram ni Pilung mug thang e fan rok; gathi gimed e kireb romed e binem. Machane mini’ e ke thang e fan rok e picha’ney? 10 Ren’ey e be micheg ni gubin ban’en nike yog SOMOL ni murung’agen e pi’in owchen Ahab e rra yib i m’ug nib riyul’. I SOMOL e ke rin’ e tin ni micheg u daken Elijah ni profet rok." 11 Ma aram me thang Jehu e fan rok urngin e tin kabay i girdi’en Ahab ni yad be par u lan yu Jezreel, nge urngin e pi tolang ko salthaw rok, pi fager rok, nge pi prist rok; dariy bagyad npag nib fos.

Girdi’en Ahaziah ni Pilung nni thang e fan rorad

12 Me chuw Jehu u Jezreel ni nge yan nga Samaria. U kanawo’, nike taw nga bangi ban’en ni kanog "Gin ma par e pi’in ma gafaliy e saf riy", 13 me mada’eg boch i girdi’en Ahaziah ni immoy ni Pilung nu Judah me fithrad ni ga’ar, "Mini’ gimed?"

Mar fulweged ni lungurad, "Gamad girdi’en Ahaziah. Gamad be yan i yan nga Jezreel ni nggu warod gu fingichiyed pifak Jezebel ni chitinngin e en pilung nge tin kabay u chon fare tabnaw rok e en pilung." 14 Me ga’ar Jehu ngak e pi salthaw rok, "Mu fekedrad ni ka yad bfos!" Mar koled fapi cha’, me thang e pogofan rorad u to’oben ba low u rom. Pi girdi’ nem e yad aningeg i ragag nge l’agruw u gubin, dariy bagyad nni pag nib fos.

Urngin e tin ni magay u girdi’en Ahab nni thang e fan rorad

15 Miki yan Jehu bayay, ni kabay u kanawo’ me mada’eg Jonadab nib mo’on ni fak Rekab. Me nang Jehu salpen me ga’ar ngak, "Gur nge gag e ta’reb rogon ni gadow ma leam. Mog, ga ra pi’ e ayuw ngog?"

Me fulweg Jonadab ni ga’ar, "Gu ra pi’."

Me ga’ar Jehu, "Ere mu pi’ paam ngog." Mar kolew pa’ row, me ayuweg Jehu i Jonadab nge yib ngalang nga langgin e chariot rok, 16 me ga’ar, "Mu’un ngog ngam guy nga owchem rogon feni gub yul’yul’ ngak SOMOL." Mranow u ta’bang u lan fare chariot ngalan yu Samaria. 17 Nap’an nra tawgow ngaram, me thang Jehu e fan rok urngin e pi’in girdi’en Ahab, nde pag bagyad. Irera’ e n’en nike yog SOMOL ngak Elijah nra buch.

Pi’in ma meybil ngak Baal nni thang e fan rorad

18 Me pining Jehu e girdi’ nu Samaria nga ta’bang me ga’ar ngorad, "I Ahab ni Pilung e i pigpig ngak fare got ni Baal ni buchuuw, machane gag e nggu pigpig ngak nib gel. 19 Mu pininged nga ta’bang gubin e profet rok Baal, gubin e pi’in ma meybil ngak nge gubin e pi prist rok. Dariy be’ ni nge magey; nggu pi’ ba maligach nib ga’ ngak Baal, ma en ndabi un ngay e yira thang e pogofan rok." (Biney e ba liyab ku Jehu ni nge thangmit gubin e pi’in ma meybil ku Baal.) 20 Me yog Jehu e n’en ni ngan rin’, "Mogned reb e rran ni ngan tayfan Baal!" Minog reb e rran, 21 me pi’ Jehu e thin nge wear u daken fare nam nu Israel ni ga’ngin. Ma urngin e pi’in yad ma tayfan Baal marbad; dariy bagyad nde yib. Ma yigo’ ranod ngalan fare tempel rok Baal, mar suguyed u baley nge taw nga baley. 22 Ma aram me yog Jehu ngak fare prist nib milfan ngak fapi mad nib n’uw mab thothup ni nge fek e pi mad nem i yib nge pi’ ngak e pi girdi’ nem ni ngar tedfan Baal. 23 Nga tomuren e ren’ey, me yan Jehu ngalan fare tempel ni yow Jonadab nib mo’on ni fak Rekab me ga’ar ngak fapi girdi’ u rom, "Nopa’med ni kemus ni yigo’ pi’in yad ma tayfan Baal e yad bay u roy ma dariy be’ nma tayfan SOMOL u naun." 24 Ma aram mranow Jonadab nga naun ni ngar pi’ew e pi maligach nge pi maligach ni mo’oruf ngak Baal. Ma ke tay meruk i ragag e salthaw u wuru’ e tempel nike ga’ar ngorad: "Go’ ngam li’ed e pi girdi’ ney ngarm’ad ni yad gubin; en nra pag bagyad nge mil e ra pi’ puluwon ni pogofan rok!"

25 Ma yug nap’an ni pi’ Jehu fapi maligach, me ga’ar ngak fapi matnag nge fapi tolang ko salthaw, "Mmarod nga naun ngam li’edrad ngarm’ad ni yad gubin; dab mu paged bagyad nge mil!" Mranod nga naun ni kar feked e saydon miyad thang e fan rorad, miyad girengiy fapi ldow nga wean. Ma aram mranod ngalan e gin nib thothup u lan fare tempel, 26 ngar feked nga wean fare duga’ nib thothup ni immoy u rom, ngar urfiyed. 27 Ere ra gathayed fa ley i duga’ nib thothup nge fare tempel, mar ted fare tempel nike mang ba kolosis — ku aram rogon ke mada’ ko daba’.

28 Aram rogon ni thang Jehu mit e tayfan ni un tay ngak Baal u Israel. 29 Machane miki rin’ e denen ni bod Jeroboam ni Pilung, i waliy yu Israel nga fithik’ e denen ko tayfan ni un tay ngak fapi ya’an pifak e garbaw ni pumo’on ni ngongliy ko gol ni suweg u lan yu Bethel ngu Dan. 30 Me ga’ar SOMOL ngak Jehu, "Ka mu rin’ gubin e tin gub adag ni ngam rin’ ngak e pi’in owchen Ahab. Ere gu be micheg ngom ni pi’in owchem nge mada’ ko bin ni aningeg e mfen e bay ur manged pilung u Israel." 31 Machane Jehu e de fol ni polo’ i laniyan’ ko Motochiyel rok SOMOL, ni Got nu Israel; ya n’en ni rin’ e ki folwok rok Jeroboam, ni waliy yu Israel nga fithik’ e denen.

Yam’ ni tay Jehu

32 Re ngiyal’ i n’em e ke tabab SOMOL i achignag fare nam nu Israel. Me Hazael ni Pilung nu Syria e fek u gelngin urngin yang e but’ nu Israel 33 ko ngek ko fare lul’ ni Jordan, me yan ko yimuch nge taw ko fachi binaw nu Aroer u charen e Lul’ ni Arnon — re gin’ey e ba mu’un e binaw nu Gilead ngu Bashan ngay, ni aram e gin nma par fapi ganong rok Gad, Ruben, nge Ba’ Ni Ngek e Manasseh riy.

34 Gubin e tin kabay ni rin’ Jehu nib mu’un e pi ngongol ni falu’ nge m’uthan’ ngay e kani yoloy ngalan e babyor ni Chepin e Pilung nu Israel. 35 Me yim’ min k’eyag u Samaria, me Jehoahaz nib mo’on ni fak e yan nga luwan nge mang pilung. 36 I Jehu e i gagiyeg u lan yu Samaria ni ir e pilung nu Israel ni rliw’ nge meruk e duw.