2 KINGS 24

1 Nap’an nib pilung Jehoyakim me yib Nebukadnezzar ni Pilung nu Babylonia i kol yu Judah, ma dalip e duw ni par Jehoyakim u tan pa’; ma aram me cheal Jehoyakim nge togopluw. 2 Me pi’ SOMOL yu raba’ i salthaw nu Babylonia, Syria, Moab, ngu Ammon ngar maelgad ngak Jehoyakim ngar thirifed yu Judah u but’, ni bod nike yog SOMOL u daken e pi tapigpig rok ni pi profet nra rin’. 3 Ran’ey e buch nrogon ni yog SOMOL, ya nge chuw e girdi’ nu Judah u p’eowchen ni bochan urngin e pi denen ni i rin’ Manasseh ni Pilung, 4 ma ri bochan urngin e pi girdi’ nde kireb e rorad ni thang e fan rorad. Daki n’ag SOMOL fan u wan’ e ran’ey ni rin’ Manasseh.

5 Gubin e tin kabay ni rin’ Jehoyakim e kani yoloy ngalan e babyor ni Chepin e Pilung nu Judah. 6 Me yim’ Jehoyakim, me yan Jehoyakin nib mo’on ni fak nga luwan nge mang pilung.

7 Fare pilung nu Egypt nge salthaw rok e dakuriy bi’id nra maelgad nga wuru’ yu Egypt, ni bochan e aram e ke milfan ngak e pilung nu Babylonia urngin yang e yungi binaw ni immoy nib milfan ngak yu Egypt, ni mus ko fare Lul’ ni Eufrates me yan i mada ko mathil rok yu Egypt ko lel’och.

Jehoyakin ni Pilung nu Judah

8 I Jehoyakin e ragag nge meruk e duw rok me pilung, me par u Jerusalem ngi i gagiyeg ni dalip e pul. Me Nehushta e chitiningin, ni be’ ni fak Elnathan nu Jerusalem. 9 Me Jehoyakin e i denen nib togopluw ngak SOMOL ni bod rogon e chitamngin.

10 Nap’an ni i gagiyeg me yib barba’ i salthaw nu Babylon, ni pi tolang rok Nebukadnezzar ni Pilung e yad be girengiy, miyad m’ag e mael nga Jerusalem ngar koled. 11 Ngiyal’ nem ni ka ni m’ag e mael ngay me yib Nebukadnezzar nga Jerusalem, 12 me pi’ Jehoyakin ni Pilung ir nga pa’ yu Babylonia, ni ir nge chitiningin nge pifak ni pumo’on, nge pi tolang ko salthaw rok, nge pi tolang ni yad bay nga tan pa’ ni yad ma maruwel u tabinaw rok. U lan e bin meruk e duw nike pilung Nebukadnezzar, me fek Jehoyakin ni aram e nge kalbusnag, 13 me fek urngin e pin’en nib t’uf ma ba tolang puluwon ni bay u lan e Tempel ngu tafen e en ni pilung u Jerusalem nga Babylon. Me yan i aw ni bod ni yog SOMOL u m’on, ya kirebnag Nebukadnezzar urngin e pin’en nni ngongliy ko gol ni Solomon e tay ngalan e Tempel ni fan ko pigpig ko tempel. 14 Me fek Nebukadnezzar e girdi’ nu Jerusalem ko nam rok ni kar manged kalbus, nge urngin e pi tolang ni yad bay u tan pa’ Jehoyakin, nge urngin e pi’in yad ma yog e thin, ni yad 10,000 u gubin. Miki fek urngin e girdi’ ni yad ba salap ko maruwel, nge girdi’ ni yad ba salap ko mongongol wasey, kemus ni girdi’ nib th’abi gafgow e pagrad ngar pired u Judah.

15 Me fek Nebukadnezzar Jehoyakin nga Babylon nike kalbus ni ir nge chitiningin, nge pi le’engin, nge pi tolang ni yad bay u tan pa’, nge pi pumo’on nu Judah ni yad ma yog e thin. 16 Me fek Nebukadnezzar urngin e girdi’ ni yad ma tay murung’agen ban’en nga Babylonia, ni yad 7,000 u gubin, nge 1,000 e girdi’ ni yad ba salap ko maruwel, nib mu’un e girdi’ ni yad ba salap ko mongongol wasey nga fithik’rad, ni yad gubin ni ka yad ba gel nrayag ni ngar uned ko salthaw.

17 Me tay Nebukadnezzar Mattaniah, ni be’ ni walagen e chitamngin Jehoyakin nge mang pilung nu Judah, me n’ag fithingan nge tunguy Zedekiah ngak.

Gagiyeg ni tay Zedekiah

18 Zedekiah e reliw’ nge ta’reb e duw rok me pilung u Judah, me par u Jerusalem ngi i gagiyeg ni ragag nge ta’reb e duw. Ma fithingan e chitiningin e Hamutal, ni fak Jeremiah nu Libnah. 19 Zedekiah ni Pilung e denen nib togopluw ngak SOMOL ni bod ni rin’ Jehoyakin ni Pilung. 20 Me ri damumuw SOMOL ngak e girdi’ nu Jerusalem ngu Judah me n’agrad.