2 KINGS 2

Elijah nni fek nga Tharmiy

1 Me taw ko ngiyal’ ni nge fek SOMOL Elijah nga tharmiy u fithik’ ba nanyor. Me chuw Elijah nge Elisa u Gilgal, 2 ma nap’an ni yow be yan me ga’ar Elijah ngak Elisa, "Mpar u roy, ya ke l’ugeg SOMOL ni nggu wan nga Bethel."

Machane me ga’ar Elisa, "Rogon feni bmich ni gub yul’yul’ ngak SOMOL nge gur, e aram feni dab gu pagem." Ma aram mi yow yan nga Bethel.

3 Me yib ba ulung i profet ni yad ma par u rom ngak Elisa me lungurad ngak, "Mog, ga manang ni bayi fek SOMOL e masta rom e daba’?"

Me ga’ar Elisa, "Gu manang, ere dab kud weliyed murung’agen."

4 Me ga’ar Elijah ngak Elisa, "Mpar u roy, ya ke l’ugeg SOMOL ni nggu wan nga Jeriko."

Machane me fulweg Elisa ni ga’ar, "Rogon feni bmich ni gub yul’yul’ ngak SOMOL nge gur, e aram feni dab gu pagem." Ma aram mi yow yan nga Jeriko.

5 Me yib ba ulung i profet ni yad ma par u rom ngak Elisa me lungurad ngak, "Mog, ga manang ni bayi fek SOMOL e masta rom e daba’?"

Me ga’ar Elisa, "Gu manang, ere dab kud weliyed murung’agen."

6 Me ga’ar Elijah ngak Elisa, "Mpar u roy, ya ke l’ugeg SOMOL ni nggu wan ko lul’ ni Jordan."

Me fulweg Elisa ni ga’ar, "Rogon feni bmich’ ni gub yul’yul’ ngak SOMOL nge gur, e aram feni bmich ndab gu pagem." Ma aram mi yow yan, 7 me lekrow wugem fapi profet nga Jordan. Me tal Elijah nge Elisa u to’oben e lul’ ni Jordan, me sak’iy fapi wugem i profet nib orel boch rorow. 8 Me fek Elijah wuru’ e mad rok nge bachiy me toy nga daken e ran; me ki’ e ran u lan e lul’, mi yow yan nga baraba’ e lul’ u daken e but’ nib mlik’. 9 Mu rom e ga’ar Elijah ngak Elisa, "Mog ngog e tin gab adag ni nggu ayuwegnem riy u m’on ndawor ni fekeg ngan chuwegeg rom."

Me ga’ar Elisa, "Mpi’ ngog l’agruw guruy u gelngim ni pi’ Got ngom nggu wan nga luwam."*2:9 GURUY . . . NGGU WAN NGA LUWAM: Elisa e wenig ni ngan pi’ fa guruy nma fek e bin nganni’ i fakey ni pumo’on ni bod rogon ko motochiyel ni yima rin’ (mu guy e Deu 21:17).

10 Me ga’ar Elijah, "Kam wenignag ban’en ngog nib mo’maw’. Fa’an ga ra guy ni ka ni fekeg, ma aram e rayag ngom e tin kam wenignag; ma fa’anra dab mu guyeg, ma dabi yag ngom."

11 Ma nap’an ni yow be yan ni yow be non ma yugu ra gingow ma ke yib ba chariot nib nifiy ni be girengiy bogi os nnifiy, me yib nga thilrow nge weregrow, me fek ba nanyor Elijah nga tharmiy.✝2:11 Rev 11:12 12 Fa’ani guy Elisa me non ni ba ga’ laman ni ga’ar, "Chitamag, chitamag! I gur e ga bod fapi chariot nu Israel nge pi’in yad be yannag ni matanagen e binaw. Ma kam chuw!" Ma daki guy Elisa Elijah bi’id.

Me kireban’ Elisa me guchthuy wuru’ e mad rok nge ruw yang. Elisa ni yan nga luwan Elijah. 13 Me fek Elisa fare wuru’ e mad nike mul rok Elijah, me sul nge yib i sak’iy nga marichlen e lul’ ni Jordan. 14 Me toy fare wuru’ e mad rok Elijah nga daken e ran me ga’ar, "Bu uw SOMOL ni fare Got rok Elijah?" Ma nap’an ni yodorom nge mu’ me ki’ bayay e ran, me yan nga barba’. 15 Me guy fa wugem i profet nu Jeriko Elisa me lungurad, "Gelngin Got ni immoy rok Elijah e ke yag ngak Elisa." Miyad yib ngak ngarbad ra parawgad nga but’ u p’eowchen, 16 me lungurad, "Gamad wugem e pumo’on ni gamad ba’aray, ni go’ gamad ba gel. Ere dab gu warod nggu gayed e masta rom? Ya sana fare kan nthothup rok SOMOL e ke fek ke yan i pag nga daken reb e burey fa ngalan reb e loway."

Me ga’ar Elisa, "Dangay, dab marod."

17 Miyad gelfen ngak nge dakiyag ni nge t’ar lanin’rad me pagrad ngranod. Me yan fa wugem i girdi’, ma dalip e rran nra gayed Elijah u daken e burey ngu lan e loway ma dar pir’eged. 18 Miyad sul ngak Elisa ni be son nagrad u Jeriko, me ga’ar ngorad, "Gathi gog ngomed faram ndab marod ko mogow?"

19 Me yib boch e pumo’on nu Jeriko ngak Elisa me lungurad ngak, "Ga manang ni re binaw ney e rib fel’, machane ran riy e ba kireb, ya be karing e maraggil ko ppin."

20 Me ga’ar Elisa, "Mu ted e sol ngalan baraba’ i ban’en ni kab be’ech ngam feked i yib ngog." Ma fa’anra feked i yib ngak 21 me yan ko fare alublub nge yan i yin’ fapi sol nga maran me ga’ar, "Ba’aray e tin keyog SOMOL: ‘Kug machalbognag e re ran ney, ere dabki yim’ e girdi’ ngay ma dabki maraggilnag e ppin.’"

22 Me par e re ran nem nib machalbog ke mada’ ko bin daba’ e rran ni bod ni yog Elisa.

23 Me chuw Elisa u Jeriko nge yan nga Bethel, ma nap’an ni be yan me yib bogi pagel u lan fare binaw nga wuru’ nguur oged tharan ni be lungurad, "Midro’, mu chuw u roy!"

24 Me cheal Elisa nge sap ngorad me bucheg wa’athrad u fithingan SOMOL. Me yib l’agruw i bear ni ppin u fithik’ e gerger nge k’adrad nge li’ aningeg i ragag nge l’agruw fapi pagel.

25 Me yan u rom ko burey ni Karmel fithingan, ni aram e nge sul nga Samaria.