2 SAMUEL 17

1 Me ga’ar Ahithofel ngak Absalom, "Mu l’oegeg nggu mel’eg 12,000 e pumo’on mu gu wan nggu lol’oeg David e nep’ ney. 2 Mu gu og ngak nike aw porowon ma ke mulan’. Ya ra rus, me mil urngin e pumo’on ni yad bay rok. Kemus ni David ni Pilung e nggu thang e fan rok, 3 mu gu fulweg ngom urngin fapi pumo’on ni un ngak ni bod rogon be’ ni bpin ni sul ngak figirngin. Ya ri ta’abe’ e ga ba’adag ni ngam thang e pogofan rok; ma tin ni kabay e girdi’ e dabi buch ban’en rorad." 4 Me finey Absalom nge urngin e pi tolang nu Israel ni yad bay u tan pa’ ni bfel’ e re bugithin nem ni keyog Ahithofel.

5 Me ga’ar Absalom, "Nga ni pining Hushai e chiney nge yib, me non ngad rung’aged e tin ni nge yog." 6 Fa’ani taw Hushai me ga’ar Absalom ngak, "Ba’aray e fonow nike pi’ Ahithofel ngomad; gur ngad rin’ed fa danga’? Ra danga’ me ere mog e tin ni ngad rin’ed."

7 Me fulweg Hushai ni ga’ar, "Fonow nike pi’ Ahithofel ngom e yaney e de fel’. 8 Ga manang ni David ni chitamam nge tin ke un ngak e girdi’ e yad ba falu’ ko mael, yad bod feni damumuw ba gamanman ni bear ni bay u magerger ni kan leag pifak rok. Chitamam e be’ nike n’uw nap’an ni i un ko mael, ere ra nep’ ma dabi par rok e tin ke un ngak e salthaw. 9 Chiney e sana be mith u lan ba yiy ara yug bang. Nap’an nra og David ngak e tirom e girdi’, ma en nra rung’ag murung’agen e ra ga’ar e ke gel David ngak e salthaw rom. 10 Ma aram e mus ngak e pi salthaw ndarir rusgad ni bod rogon e pi layon nder ma rus, e ra yib e marus ngorad, ya gubin e girdi’ nu Israel ni yad manang ni chitamam e ba salthaw nib sorok, ma salthaw rok e yad ba falu’ ko mael. 11 Tin kug leamnag e ngam kunuy urngin piyu Israel nga ta’bang u baley e nam nge mada’ nga baley, ni yad bod urngin e yan’ u dap’el’ay, me mang gur e mu fekrad ngam marod ko mael. 12 Ya nga yigi da’da’ David ma kad oggad ngak ko gin ni bay da pir’eged riy. Me ir nge salthaw rok e dariy bagayad nra fos. 13 Ma fa’anra yan i mith ngalan reb e binaw, me mu’ulung urngin e tirodad e girdi’ ngay ni kar feked e gaf ngar m’aged ko yoror riy ngar girngiyed nge puth, nge par ndariy ta’reb e malang riy nra magey u lang."

14 Me ga’ar Absalom nge urngin piyu Israel, "Kabfel’ e tin keyog Hushai ko tin keyog Ahithofel." Ma aram e SOMOL e ke duwgiliy ni nge dab ni rin’ e tin ni bfel’ nike yog Ahithofel, ya nge yib e riya’ ngak Absalom.

David nni pi’ e thin nge yan ngak me mil

15 Me weliy Hushai ngak fa gal prist ni aram Zadok nge Abiathar e tin ke weliy ngak Absalom nge pi’in nib tolang ni yad bay u tan pa’ Absalom, nge tin keyog Ahithofel. 16 Me ul ul Hushai ngay ni ga’ar, "Mu gurgow e chiney ngam pi’ew e thin nge yan ngak David nge dabi par e nep’ ney ko gin yima th’ab e lul’ riy u daken e ted, machane nge th’ab e lul’ ni Jordan nga baraba’ ni papey, nge dabiyag nkolrad e tirok e salthaw ngan li’rad ni yad gubin." 17 Ma bay Jonathan nge Ahimaaz ko fare alublub ni Enrogel fithingan ni yow be son, ya daburow nrichey mi ni guyrow ni karanow ngalan binaw. Ba tapigpig ni be’ ni bpin e i yan ngi i weliy ngorow e pin’en ni yibe rin’, mi yow yan ngar weliyew ngak David ni Pilung. 18 Machane me guyrow ba pagel me yan i yog ngak Absalom; mranow ni yow ba gur ko naun rok be’ nma par u Bahurim. Ma bay ba luwed nib chugur ko naun rok, miyow yan ngalan. 19 Me fek le’engin fare mo’on bangi ban’en nge upunguy nga daken fare luwed, me wereg wom’ngin e woldug ni grain nga daken, ni fan e nge dab nnang. 20 Me yib e pi tolang ko salthaw rok Absalom ngar fithed fare pin ni lungurad, "Bu uw Ahimaaz nge Jonathan?"

Me ga’ar, "Kar th’abew e lul’ nga ba’nem."

Me gayrow fapi pumo’on ma dar pir’eged yow, ma aram miyad sul nga Jerusalem. 21 Nap’an nra chuwgad me yib Ahimaaz nge Jonathan u lan fare luwed ngalang miyow yan ngar weliyew fapi thin ngak David. Miyow weliy ngak e tin ke leamnag Ahithofel nib togopluw ngak me lungurow ngak, "Mu gur nigem ngam th’ab e lul’ nga ba’nem." 22 Ma aram me tabab David nge tin ke un ngak e girdi’ i th’ab e lul’ ni Jordan nga baraba’, ma nap’an ni be puf e woch ma yad gubin ni kar mufgad nga baraba’ fare lul’.

23 Ma fa’ani guy Ahithofel nda nfol ko tin keyog, me af nga daken e dongki rok nge sul ko birok e binaw. Me fal’eg rogon e tirok ban’en, nge mu’ me uchiliy k’angan. Mi ni yan ni chibgiliy ko re low ni ba’aram ni yima chibgiliy girdi’en e tabinaw rok ngay.

24 Nap’an ni th’ab Absalom nge salthaw rok e lul’ ni Jordan nga baraba’, ma ke taw David ko binaw nu Mahanaim. ( 25 Ma ke tay Absalom i Amasa nga luwan Joab, ni ir e ngi i yog e thin ko salthaw. Mi Jether ni ba Ishmael e chitamngin Amasa; mi Abigail e chitiningin, ni be’ ni bpin ni fak Nahash ma walagen Zeruyah ni chitiningin Joab.) 26 Me n’uf Absalom nge piyu Israel e tent rorad u lan e nug nu Gilead.

27 Fa’ani taw David nga Mahanaim miyad mada’ Shobi, ni be’ nib mo’on ni fak Nahash, ni yib ko binaw nu Rabbah ni bay u lan yu Ammon, nge Makir, ni be’ nib mo’on ni fak Amiel, ni yib ko binaw nu Lodebar, nge Barzillai, ni yib u Rogelim ni bay u lan yu Gilead. 28,29 Rabad ni kar feked e chob, nge yu raba’ i pilet, nge th’ib nni ngongliy ko but’. Ma kur feked e ggan i yib ni nge kay David nge salthaw rok, ni wheat, nge barley, nge flour, nge grain ni kan urfiy, nge mame, nge peas, nge honey nib athib, nge chis, nge kurim nge bogi saf. Ya yad manang ni bayi yib e bilig nge belel ngak David nge salthaw rok, ma bay yib e magaer ngorad ni bochan e yan u daken e ted.