2 SAMUEL 3

1 Bun’uw nap’an ni i cham e yu raba’ i salthaw nma ayweg e tabnaw rok Saul nge tin nma ayweg David. Nap’an ni be gel David i yan, ma aram e pi’in yad be togopluw ngak e yad be waer i yan.

Pifak David ni Pumo’on

2 Nel’ i pumo’on nib aray ni fak David, ni tabab ko en nib nganni’ me yan i mus ko en ni wen, e ni gargelegrad u Hebron: i Amnon, ni chitinngin e Ahinoam, nu Jezreel; 3 Chileab, ni chitinngin e Abigail, nu Carmel ni Nabal e pumo’on rok nike yim’, Absalom, ni chitinngin Maakah, ni be’ nib bpin ni fak Talmai ni Pilung nu Geshur; 4 Adonijah, ni chitinngin e Haggith; Shephatiah, ni chitinngin e Abital; 5 Ithream, ni chitinngin e Eglah. Gubin e tiney e pumo’on ni fak David e yigo’ ni gargalegrad u Hebron.

Abner ni Mang ngak David

6 Nap’an ni be gel e cham u thilin e pi salthaw rok David nge yu raba’ i salthaw nib fol ko tabnaw rok Saul, ma aram e Abner e be gel gelngin i yan u fithik’ e pi’in yad ma un ngak Saul.

7 Me yan i reb e rran me non Ishbosheth ni be’ ni pumo’on ni fak Saul ni be togopluw ngak Abner ni be yog ni kar pirew Rizpah ni reb e bpin rok Saul, ni be’ ni fak Aiah. 8 Ran’ey e ri k’aring e damumuw nib gel ngak Abner, me ga’ar, "Ga be leamnag ma gura sasalap ngak Saul? Gabe leamnag ma yu Judah e gube pigpig ni fan ngak? Ka som’on mug bepar ni gub yul’yul’ nga urngin e tin nib l’ag rogon ngak e chitamam i Saul, nge pi walagen ni pumo’on, nge pi fager rok, ma kug ayuwegmed ni degel David ngomed; ma ke daba’ ma kamog ni kam pir’eg thibngig ni murung’agmow be’ ni bpin! 9,10 Ke micheg SOMOL ngak David ni bayi chuweg e gagiyeg ko pilung u pa’ Saul nge pi’in owchen me tay David nge mang pilung nu Israel ngu Judah, ni mus u baley fare nam nge thang nga baley. Ere chiney e mang e yigi li’eg Got nggum’ ni fa’anra dab gu muruwliy ni nge yib i m’ug e re bug i thin ney nib riyul’!" 11 Ma dakiyag ni yog Ishbosheth ta’ab bug i thin ya kari rus ngak Abner.

12 Me l’oeg Abner e pi tamal’og ngranod ngak David, ni bay u Hebron e ngiyal’nem, ni ngar ga’argad ngak, "Mini’ e en ni nge gagiyegnag e re nam ney? Mu ngongliy ba m’ag u thildow, mug ayuwegnem ngam fek yu Israel ni ga’ngin ngar manged nga ba’ rom."

13 Me fulweg David ni ga’ar, "Ba manigil! Gu ra ngongliy ba m’ag u thildow ni fa’anra gara rin’ e ren’en ni ba’aray: thingar mu fek fare pin ni fak Saul ni Mikal i yib ngog ko ngiyal’ ni garab mu guyeg." 14 Miki l’oeg David e pi tamal’og ngak Ishbosheth ni nge lungurad, "Mu fulweg le’engig i Michal ngog. Kug pi’ puluwon ni nggu le’engiy ni ra’ay e biyach u taban dal’ e pi Filistine." 15 Ma aram me fek Ishbosheth i Mikal rok e pumo’on rok i Paltiel ni be’ ni pumo’on ni fak Laish. 16 Me lek Paltiel fare pin nge mada’ ko fachi binaw nu Bahurim, ni be yornag i yan. Machane nap’an ni ga’ar Abner, "Mu sul nga tabnaw," me sul.

17 Me yan Abner ngak e pi tayugang’ nu Israel me ga’ar ngorad, "Kari n’uw nap’an ni kam athpeged David ni nge mang pilung romed. 18 Irera’ e ngiyal nrayag. Kigimed manang ni yog SOMOL ni ga’ar, ‘Bay gu maruwel ngak e tapigpig rog i David nggu cheweg e girdi’ rog nu Israel u pa’ e pi Filistine nge urngin e tin kabay e to’ogor rorad.’" 19 Miki non Abner ngak e pi girdi’ ko ganong rok Benjamin miki yan nga Hebron ni nge yog ngak David e n’en nike yog e girdi’ rok Benjamin nge piyu Israel nike ta’reb laniyan’rad ngay ni ngan rin’.

20 Nap’an ni yib Abner gak David u Hebron nike un rriliw e pumo’on ngak, me pi’ David ba mur ni fan ngorad. 21 Me ga’ar Abner ngak David, "Bay gu wan e chiney nggu yagnag ga’ngin yu Israel nga tan e gagiyeg rom. Bay mfel’ u wan’rad ni gur e pilung, ma aram e bayi yag ngom e tin ni um finey mag gagiyegnag ga’ngin fare nam." Me micheg David ngak Abner ni dabi buch ban’en rok me l’oeg nge yan.

Abner Nthang e Pogofan Rok

22 Me ta’boch me sul Joab nge boch e pi tolang ko salthaw rok David ko mael, ni bo’or bogi ban’en ni kar feked u fithik’ e mael. Machane dakimoy Abner u rom u Hebron rok David, ni bochan e ke pi’ David ke yan nike micheg ni dabi buch ban’en rok. 23 Nap’an ni taw Joab nge pi salthaw rok, minog ngak nike yib Abner i guy David ni Pilung ke micheg David ngak ni dabi buch ban’en rok ma ke l’oeg ke yan. 24 Ma aram me yan Joab ngak fare pilung me ga’ar ngak, "Fin mang e kam rin’? Ke yib Abner ngom — mangfan ni kam pag ke yan ni aram rogon? 25 Ke yib e ngaray ni nge ban nigem ma ngenang urngin ban’en ni ga ma rin’ nge urngin yang ni gama yan ngay. Ma ri gamnang ni aram rogon!"

26 Tomuren ni chuw rok David, me l’oeg Joab e pi tamal’og ni ngranod ra feked Abner, mranod ra sulweged ko luwed nu Sirah, ma David e dariy ban’en ni manang u murung’agen. 27 Ma nap’an ni taw Abner nga Hebron, me pining Joab i Abner nga orel ko fare garog, ni gowa nge non ngak ni go’oyow, ma aram me ruchuy e yar ko yal rok u rom. Ma aram e kan thang e pogofan rok Abner ni bochan e ki thang e pogofan rok Asahel nib mo’on ni walagen Joab. 28 Nap’an ni rung’ag David e n’en nike buch, me ga’ar, "I Somol e manang ni pi’in nib milfarad ngog nge gag e ri debuch e romad ko pogofan rok Abner ni kan thang. 29 Gechig riy e nge aw ngak Joab nge chon e tabnaw rok ni gubin! Lan gubin e mfen ma nge rimbiyo boch e pumo’on u lan e tabnaw rok, fe daraw, fa kemus ni go’ maruwel rok e ppin e rabung ngay, fa yim’ u fithik’ e mael, fa dab i gaman e n’en ni ngi i kay!" 30 Ere Joab nge Abishai ni walagen ni pumo’on e ra falbiyen walagrow i Asahel ni li’ Abner u tan e mael u Gibeon.

Abner nni K’eyag

31 Ma aram me yog David ngak Joab nge pi salthaw rok ni ngar guchthiyed e mad u dakenrad, ngar chuwgad ko mad ni tutuw, ngar yor niged Abner. Ma nap’an e yan nga taliw ko gum’eyag me David ni Pilung e lek taban fare kahol ko yam’. 32 Min k’eyag Abner u Hebron, me yor fare pilung nib ga’ laman u rom ko fare malangne yam’, ma ku errogon gubin e girdi’. 33 Me yin’ David e re dolo’lo’ ni ba’aray ni fen Abner:

"Mangfan ni ngari yim’ Abner ni bod be’ ndariyfan?

34 Dan m’ag rifrifen pa’ nruw raba’,

ma ku dan m’ag rifrifen ay nruw raba’;

Ke yim’ ni bod be’ ni li’ e girdi’ ni kireb!"

Miki yornag fapi girdi’ bayay.

35 Polo’ e rran ni i guy fapi girdi’ rogon ni mange yigi kay David ban’en, machane me micheg u fithingan Got ni ga’ar, "Mang e yigi li’eg Got nggum’ ni fa’an gu ra kay ban’en ndawori polo’ e re rran ney!" 36 Mar nanged e ren’ey me fel’ u wan’rad. Rriyul’, gubin ban’en ni rin’ fare pilung mab fel’ u wan’ e girdi’. 37 Urngin e pi girdi’ rok David nge urngin e pi girdi’ nu Israel ma yigo’ rananged fan ni fare pilung e de nang ban’en u murung’agen Abner ni ngan thang e pogofan rok. 38 Me ga’ar fare pilung ngak e pi tolang ko salthaw rok, "Damur nanged ni re rran ney e ke yim’ reb e tayugang’ nrib ga’ u lan yu Israel? 39 Yug aray rogon ni gag e pilung nike mel’egeg Got, ma kug thamiy ni kug me’waer e daba’. Pi pumo’on ney ni pifak Zeruyah e kay gur tharthargad. Mang e yigi gechignag SOMOL e pi girdi’ ni kireb ney nib m’ag nga rogon e kireb rorad!"