2 SAMUEL 2

David nni pilungnag nge mang pilung nu Judah

1 Tomuren e biney me fith David SOMOL ni ga’ar, "Gu ra yan gu par nga reb fapi binaw ni bay u lan yu Judah ngu’ug gagiyegnag, ma bfel’ fa danga’?"

Me fulweg SOMOL ni ga’ar, "Bfel’."

Me fith David ni ga’ar, "Bin ngan?"

Me ga’ar SOMOL, "Binaw nu Hebron."

2 Me yan David nga Hebron ni yad fa gali ppin rok, ni Ahinoam ni be’ u Jezreel, nge Abigail ni be’ u Karmel, ni figirngin Nabal nike yim’. 3 Miki fek e salthaw rok nge chon e tabinaw rorad ngranod ra pired ngalan e yochi binaw nib liyeg yu Hebron. 4 Me yib e pumo’on nu Judah nga Hebron ngarbad ra gapgep niged David ni nge mang pilung nu Judah.

Fa’ani rung’ag David ni girdi’ ko binaw nu Jabesh ni bay u lan e nug nu Gilead e kar k’eyged Saul, 5 me tay e thin nga l’ugun boch e pumo’on nge l’oegrad ngaram ni ngranod ra ga’argad ngak e girdi’ nu rom, "I SOMOL e nge fal’eg wa’athmed ni bochan e kam daged rogon fanmed yul’yul’ ngak e pilung romed ya kam k’eyged. 6 Ere SOMOL e nge runguymed ngi i par nib yul’yul’ ngomed. Ku er rogon gag ni bfel’ e tin ni bay ug rin’ ngomed ni bochan e tin ni kam ngongliyed. 7 Mpired ni gimed ba gel ma dab mu rusgad! Saul ni Pilung romed e ke yim’, ma girdi’ nu Judah e kar gapgep niged gag ni nggu mang pilung rorad."

I Ishbosheth nni mangnag pilung nu Israel

8 Fare tolang ko salthaw rok Saul, i Abner nib mo’on ni fak Ner, e kar milgow Ishbosheth ni be’ ni pumo’on ni fak Saul kar th’abew e lul’ ni Jordan kranow nga Mahanaim. 9 Mu rom e tay Abner i Ishbosheth ni nge mang pilung ko fa yungi nug nu Gilead, Asher, Jezreel, Efraim, ngu Benjamin, nge ku gubin yang u daken yu Israel. 10 Nap’an nni tay ni nge mang pilung nu Israel ma ke gaman e aningeg i ragag e duw rok, me gagiyeg ni l’agruw e duw.

Machane fare ganong nu Judah e rib yul’yul’ ngak David, 11 me gagiyeg David u lan yu Hebron ngu daken yu Judah ni medlip nge baley e duw.

Mael u Thilin yu Israel nge yu Judah

12 Me yan Abner nge pi tolang ko salthaw rok Ishbosheth u Mahanaim ngalan fare binaw nu Gibeon. 13 Me Joab, ni chitinngin e Zeruyah, nge pi tolang ko salthaw rok David e ra mada’ niged e picha’nem nga charen bangi ran, miyad par u rom nga but’ ni yad gubin, reb e ulung nga barba’ fa gi ran ma reb nga barba’. 14 Me ga’ar Abner ngak Joab, "Ngad pinow nigew boch e pi salthaw ney ni kab pagel u barba’ ngu barba’ ngar chamgad ko talin e cham ngan guy ko mini’ e ra gel."

Me ga’ar Joab, "Errogon." 15 Ma aram e ragag nge l’agruw e salthaw ni owchen Ishbosheth nge fare ganong rok Benjamin, miyad cham ngak ragag nge l’agruw e salthaw rok David. 16 Mra reb fapi salthaw me kol lolugen e en ni puluw rok u barba’ nge rugoy e saydon rok nga p’eyon, ma aram me thig nga but’ fa rliw’ nge aningeg i salthaw u ta’bochyang ni karm’ad. Aram e rengi n’en ni yima yog fithingan u lan yu Gibeon ni "Flang ko Saydon."

17 Ma aram me tabab ba mael nib gel mirin, me gel e salthaw rok David ngak Abner nge salthaw nu Israel. 18 Ma fa dalip i pumo’on ni fak Zeruyah e urmed u rom: Joab, Abishai, nge Asahel. I Asahel e ra mil ma bod payngin ba deer nib malboch, 19 e tabab i tuluf Abner, ni kari tay nga daken ni be lol’oeg. 20 Me changar Abner nga tomur me ga’ar, "I gur Asahel?"

Me fulweg ni ga’ar, "Errogon."

21 Me ga’ar Abner, "Mu tal i tulfeg! Mu tuluf reb e salthaw ngam fek e tin ni bay rok." Machane de tal Asahel i tuluf i yan. 22 Miki ga’ar Abner bayay ngak, "Mu tal i tulfeg! Mangfan ni ga be suryeg ni nggu li’em nga mum’? Uw rogon ni gura sabliy Joab ni walagem?" 23 Machane de tal Asahel; ma aram me rugoy Abner e sarey rok nga wuryel, me kuruf e yal rok Asahel nge yan i for u daken keru’. Me aw Asahel nga but’ nike yim’, ma gubin e pi’in nrabad ko rengi n’em nike aw riy nga but’ ma yigo’ ra talgad ngar sak’iygad u rom.

24 Machane me tabab Joab nge Abishai i tuluf Abner, me yan ni nge aw e yal’ ma kar tawgad ko fachi burey ni Ammah, ni bay ko ngek u Giah ko kanawo’ ni yan nga magargear nu Gibeon. 25 Ma pi pumo’on ko fare ganong rok Benjamin e ra mu’ulunggad ngar liyeged Abner bayay mranod ra pired nga p’ebgul bburey. 26 Me tolul Abner ngak Joab, "Mog, aram e ngu’ud chamgow e chiney i yan ngaram ni dakriy e tal? Damur guy nra tomur riy ma dakuriy ban’en ni kabay ya kemus ni fanenikan? Gamad boch i pi girdi’en e nam romed. Bu uw n’umngin nap’an mfin mog ngak e pi salthaw rom ni ngar talgad i tulufmad?"

27 Me fulweg Joab ni ga’ar, "Kug micheg u fithingan Got ni be par nib fos, ni fa’anmanga damunon, ma pi salthaw rog e dab ra talgad i tulufem nge mada’ ko gabul ni kakadbul." 28 Ma aram me tabab Joab i thoy fare yabul nib pow ngak e pi salthaw rok ni ngar talgad i tuluf e pi salthaw nu Israel; ma aram me tal fare cham.

29 Me yan Abner nge pi salthaw rok ni polo’ e re nep’ i n’em u lan fare loway ni Jordan fithingan; miyad th’ab fare lul’ ni Jordan nga barba’, ma aram e ley ni kadbul e yal’ ko bin migid e rran e ranod ngar tawgad bayay nga Mahanaim.

30 Nap’an ni pag Joab i tuluf Abner, me kunuy e salthaw rok ni gubin nga ta’bang me pir’eg ni ragag nge mereb i yad e demoy ma ku erita’ Asahel ni ku demoy. 31 Ma pi salthaw rok David e kar li’ed ke yim’ 360 e salthaw rok Abner ni be’ ko fare ganong rok Benjamin. 32 Me fek Joab nge salthaw rok fare Idow rok Asahel ngar k’eyagged ngalan fare malangan e yam’ ko fare tabnaw nu Bethlehem. Ma aram mranod ni polo’ e nep’ ma nap’an ni be tatamilang mar tawgad bayay nga Hebron.